नेपाःया परराष्ट्र नीति छु ?

प्रधानमन्त्री माधव कुमार नेपालया भारत भ्रमण कन्हसंनिसें शुरु जुइत्यंगु दु। थ्व वय्कःया न्हापांगु औपचारिक विदेश यात्रा खः। नेपालय् न्ह्याम्ह हे न्हूम्ह प्रधानमन्त्री वःसां वं थःगु न्हापांगु विदेश यात्रा भारतय् हे यायेमाःगु छगू अघोषित विधान हे तयार जुइधुंकूगु दु मानौं गुगुं देशय् न्हू नियुक्त जूम्ह राजदूतं अनया राष्ट्रप्रुमख समक्ष थःगु ओहोदाया प्रमाण-पत्र लःल्हाइगु खः। पूर्व प्रधानमन्त्री पुष्पकमल दाहालं भारत मवँसे चीनय् न्हापांगु भ्रमण याःगु हे कारणं भारतलिसेया वय्कःया स्वापू हे त्वाःदल। नेपाः न्ह्याक्व हे स्वतन्त्र व सार्वभौम मुलुक खः धाःसां भारतया प्रभाव क्षेत्रं गबलें नं मुक्त मखु धइगु खँया थ्व ति बल्लाःगु प्रमाण मेगु छु दइ ?

आः नकतिनि हे नं भारत भ्रमण क्वचायेकाः वःम्ह परराष्ट्र मन्त्री सुजाता कोइरालां भारतीय भूमिइ च्वनाः नेपाःया स्वापू चीनलिसे स्वयां नं भारतलिसे अझ सती धकाः सगर्व घोषणा हे याना थकल। परराष्ट्र मन्त्रीं थःगु देय्या परराष्ट्र नीति स्वयां पाःगु खँ न्ववाये मजिउ। अले नेपाःया परराष्ट्र नीति धइगु थः जःलाखःला देय् चीन व भारतलिसे समदूरीया स्वापू तयेगु खः। तर परराष्ट्र मन्त्रीं हे उगु नीति स्वयां पाःगु बिचाः न्ह्यब्वसें नेपाःया स्वापू चीनलिसे स्वयां भारतलिसे सती धकाः न्ववायेगु याना हल। भारतप्रति थज्याःगु भक्तिभाव क्यनेगु ज्यां नेपाःया छबीयात अन्तर्राष्ट्रिय रुपं बांमलाकीगु ला द हे दु, उकिया नापनापं नेपाःया स्वतन्त्र अस्तित्वयात नं बुलुका बीगु सम्भावना दु। परराष्ट्र मन्त्रीं थःगु भ्रमणय् याना थकूगु थज्याःगु गल्तीयात आः प्रधानमन्त्रीं थःगु भ्रमणया इलय् सुधार यायेगु कुतः याना थकेमाः ।

More Stories Like this