भ्वँतय् जूगु तःजिगु कन्या पूजा

कृष्ण

दँय्दसं भाद्र कृष्ण पक्ष पञ्चमी कुन्हु भ्वँतय् नेवाः कन्या पूजा समिति दछुत्वाःया ग्वसालय् नेवाः कन्यातय् सार्वजनिक पूजा जुइ। थ्व सकसिनं सिउगु हे खँ खः। २००४ सालंनिसें आः तक नं नियमित रुपं थ्व पूजा न्ह्याना हे वयाच्वंगु दु। व नं उकुन्हु लाक्क हे। थ्व ज्या अन उगु इलय् पर्ति जग्गा कब्जा यानाः च्वनेत ख्वपं वःपिं छगू सिँकःमि ज्या याइपिं प्रजापति परिवारं यानाच्वंगु जुयाच्वन। उगु इलय् ख्वपं अन वंगु छगू परिवारयात अनया चण्डेश्वरी द्यःया जग्गा रेखदेख यायेगु जिम्मा बियाः थ्व बापत स्थानीय कन्यातय् पूजा यानाः भ्वय् नकेगु परम्परा चले यानातःगु खः। तर थ्व ज्या लिपा वनाः भ्वय् नकेगु सम्भव मदया वनेवं थीथी मरिचरि व सिसाबुसा जक कन्यातय्त दान बीगु वा छायेगुली सीमित जूवन ।

थथे दँय्दसं हे थुकुन्हु लाकाः भ्वँतय् छगू सांस्कृतिक पर्व कथं कन्या पूजा यायेगु चलन जुया वयाच्वंगुलिं यानाः आः उगु लागाय् थुकुन्हु कन्यातय्त पूजा याइपिं वा दान बीपिं नं आपालं दातात दयेधुंकूगु दु। अथे जुयाः सुनां छु देछायेगु, सु दातां गुलि कन्यातय्गु निंतिं दान याये मालीगु धइगु न्हापा हे मूल्यांकन जुयाच्वनी। स्थानीय भ्वँतया समाजसेवी ज्ञानकाजी मानन्धरया कथं थ्व परम्परायात निरन्तरया बीगु निंतिं ताः ई न्ह्यवंनिसें थीथी दातातय्सं ग्वाहालि याना वयाच्वंगु दु। थ्व झ्वलय् थुगुसी न्हापांखुसी ख्वपं अन श्वेत भैरव बाजं खलःया पुचः वनाः बाँसुरी नं पूवन। थ्व इलय् नं बनेपा नेवाः कन्या पूजा समिति दछु त्वाःपाखें अथेहे नीन्याम्ह ति स्वयम सेवकत शुरुंनिसें लिपा थ्यंक हे झ्वः मिले यायेत खिपः प्यनाः लाइनय् मनूतय्त थाय् मिले याना बीगु निसें लः त्वंकेगु, हुल मिले यायेगु आदि इत्यादि ज्या याना जूगु खः ।

कन्या पूजाया चलन वा कुमारी पूजाया प्रचलन नेवाः समाजय् न्हापांनिसें हे चले जुया वयाच्वंगु संस्कार खः। अथे जुयाः ग्वसाः खलकं थुगुसी याःगु कन्या पुजाय् नं मेगु जातया कन्या कुमारीत मलायेमा धकाः माइकिङ यानाः नेवाः कन्यात जक झ्वः छुइत इनाप यानाच्वंगु खः। तर मेपिनि टिकट ल्हातय् लाकाः खः वा गथे खः न्हासय् फुली दुपिं कन्या कुमारीत नं आपालं हे उगु हुलय् झ्वः छुनाच्वंगु खनेदत। गुम्ह मिसामचा कन्या खः व गुम्ह मिसामचा कन्या मखु धइगु नेवाःतय् सीकेगु छगू निश्चित आधार दु ।

गुम्हेसित इहि याइ मखुनि वयात कन्या कथं कयातःगु दु। न्ह्याक्व हे नच्चाम्ह खःसां यदि इहि यायेधुंकल कि वयात नेवाः समाजय् कन्या कथं नाली मखु। थ्वहे मापदण्डया आधारय् बनेपा नेवाः कन्या पूजा समितिं परम्परागत नेवाः संस्कार व संस्कृतियात निरन्तरता बीगु ल्याखं थ्व ज्या थीथी खलः पुचःया ग्वाहालिं याना वयाच्वंगु खः ।

नेवाः कन्यातय्त जक पूजा याइगु तर मेगु जातया कन्यातय्त पूजा मयायेगु धाःगुलिं गैर नेवाः जाति दुने बेमेल नं खने दयाच्वंगु खः। तर नेवाः जाति दुनेया थ्व छगू विशेष प्रथा जूगुलिं थःथःगु धर्म संस्कृति माने यायेगु छुट निश्चित जातियात दया हे च्वनी। थथे जुइ नं माः। मेपिनि संस्कार व संस्कृतियात नं सद्भाव तयेगु झी नेवाःतय् परम्परा दु ।

हिन्दूत बौद्ध धर्मया थीथी द्यःयाथाय् वनीगु व बौद्धतय्त नं हिन्दूतय् द्यः माने याना जुइगु छुट थन दु। बनेपा नेवाः कन्या पूजा समितिं आः तक नं थ्व ज्यापाखें कोष हे मुंका वयाच्वंगु दु। आः थुगु समितियाके न्हय्गू लाख दांया कोष दु। आः थुगु कोषयात झिगू लाख थ्यंकेगु कुतः जुयाच्वंगु दु। समितिपाखें हे सगं बीगु व प्रसाद ग्रहण याकेगु यानाः न्ह्याःगु थुगुसीया कन्या पूजाय् नेवाः नापं आपालं गैर नेवाःत नं दुथ्यानाच्वंगु खनेदु। ज्याझ्वलय् भ्वँत देय्न्यंकंया स्वीन्यासःम्ह कन्यातय्सं ब्वति काःगु खः। ज्याझ्वः छगू कथंया मेलाया रुपय् सम्पन्न जूगु खः ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया