घातक षडयन्त्रयात खतम यायेमाः

डी. आर खड्गे

साधारण जनतां नं सिउगु खँ खः विदेशीया ग्वाहालि व ध्यबा कयाः विदेशीया इशाराय् ज्या यानाच्वंत्तले गबलें नं देश विकास जुइ मखु। तर झीगु देय्या नेतातय्गु सोच व ध्यान बिदेशी ध्यबाया बलं अर्थतन्त्र चले यायेगु, विदेशीया इशारा पालना यानाः ज्या यायेगु जक खनेदु। थज्याःगु सोच व बिचाःयात च्यः मानसिकता धाइ। थज्याःगु सोच लालची, लोभी व संस्कार मदुपिं अविवेकीतय्सं जक तइ। धाथें देशभक्त, सक्षम, विवेकी नेतां थःगु विवेक प्रयोग यानाः देय्यात ठीक लँय् यंकेगु हिसाबं ज्या यानाच्वनी। झीगु देशय् गुलि नं नेतात वयाः सत्ता संचालन याये न्ह्यः जनतायात ततःधंगु आशा क्यनाः वइ। सत्ता ल्हातय् वल कि जनतायात धोखा बियाः ततःधंगु भ्रष्टाचार व कमिशन नयेगु ज्या जक यानाच्वनी। अझ ला देय्यात घातक जुइगु ज्या यानाः थःगु व्यक्तिगत स्वार्थ पूरा यानाच्वनी। यदि धाथें नेतायाके भचा जक इमान्दार व संवेदनशील दुपिं खःसां देय् स्यंकाच्वंपिं समाजय् आतंक यानाच्वंपिं जनतायात गरीब यानाच्वंपिं हाकुबंजाःतय्त नियन्त्रण यायेगु कुतः यायेमाःगु ख: ।

जनतां बहुदलवादी नेतातय्त अविश्वास यानाच्वंगु इलय् लाक्क माओवादीं जनयुद्ध यानाः सामन्ती शोषण न्हंकाः न्हूगु नेपाः निर्माण यायेगु धकाः संघर्ष याःगु खः। गांगांया जनतां माओवादी पार्टीयात विश्वास याना यंकाच्वंगु नं खः। तर माओवादीया उच्च नेतात दिल्लीइ वनाः न्हय्गू दलनाप १२ बुँदे सम्झौता यानावल। १२ बुँदे सम्झौताया निगू स्वंगू बुँदात देय्या लागि कालकुट विष साबित जुयाच्वंगु दु। व खः, छगू जुजुं अस्वीकार यानातःगु नागरिकता विधेयकयात नेतातय्सं याउँक पास यानाः भारतीय नागरिकयात चांचां नागरिकता बीगु ज्या। मेगु, मधेश बन्दया नामं तराईलय् आतंक यानाच्वंगु पुचःया विरुद्ध सेना प्रयोग याये मदइगु सम्झौता। मेगु छगू घातक बुँदा खः, बाँकी दुगु जलश्रोतया अधिकार नं भारतयात बिया वने माःगु सम्झौता। थ्व स्वंगू देशघातक सम्झौतां यानाः नेपाः मछिंगु अवस्थाय् लाःवंगु दु।
जब माओवादी नेतातय्सं दिल्लीइ वनाः १२ बुँदे सम्झौता याना वल, व इलंनिसं स्वतन्त्र राजनीतिक व्यक्तित्वतय्सं धायेगु नं यात माओवादीं देशभक्त अडान त्वःताः विदेशी लय्तायेकेगु लाइन ज्वन। धाथें थ्व खँ प्रमाणित नं जुजुं वल। माओवादीं संविधान सभाय् अप्वः सिट त्याकाः सरकार चले यात। माओवादीं राष्ट्रिय स्वार्थयात ध्यानय् तयाः राष्ट्रवादी अडान कयाच्वंगु खने मंत। खालि थःगु सत्ता क्वातुकेगु ल्याखं जक पार्टी रणनीति दयेकाः ज्या यानाच्वन। आः जनतां द्वपं बियाच्वंगु नं दु, देशय् बजाःभाः थहां वनाः मध्यम व निम्न मध्यम वर्गया हालत स्यना वनाच्वंगु दु। वया पूरा जिम्मेवारी माओवादी पार्टी कायेमाः धयाच्वंगु दु। छाय् धाःसां माओवादीया इलय् भाः यक्व बढे जुयावंगु खः। यदि माओवादी जनताप्रति जिम्मेवारी कयाः ज्या याःम्ह खःसा हाकु बंजाःयात नियन्त्रण यानाः जनतायात राहत बीमाःगु खः। माओवादी सरकारं पिने वल हानं राष्ट्रवादी सः थ्वयेकाच्वन। आःया सरकारयात कतांमरि दलाल खः धकाः द्वपं बिल। माओवादी सरकारं पिहां वःगु इलय् भारतया पत्रपत्रिकाय् थथे च्वयाहल माओवादी नेतातय्सं चीननाप स्वापू क्वातुका यंकूगु कारणं यानाः सरकार त्वःते माःगु खः। भारतया पत्रपत्रिकां धाःगु खँयात मूल्यांकन यान स्वत धाःसा निश्चय नं माओवादीया नेतात नं भारत सरकारया प्रभावय् लानाच्वंगु दु धकाः अनुमान यायेफु। धाथें माओवादी पार्टी भारत अथवा चीनया लबी च्वनेगु त्वःताः राष्ट्रभक्त लाइनय् वने फुसा तसकं बाल। राष्ट्रभक्त अडान काल धाःसा सारा जनतां सक्रिय समर्थन अवश्य नं बी। नेपाः विकास यायेत थाकु मजू। छाय्धाःसा थन यक्व प्राकृतिक श्रोतत दु। प्राकृतिक श्रोतयात सही प्रयोग यायेफत धाःसा देय् विकास जुइ जनताया जीवनस्तर थहां वनी। झीगु प्राकृतिक श्रोतं (जलसम्पदां) भारतया अर्थतन्त्र गुलि मजबुत जुयाच्वंगु दु धयागु खँ झी नेतातय्सं मसिउगु नं मखु। विशाल भारतया ला अर्थतन्त्र झीगु प्राकृतिक श्रोतपाखें मजबुत यानाच्वंगु दु धाःसा चिकिचाधंगु नेपाःया बिकास यायेत छुं थाकुइ मखु ।

नेपाःया प्रधानमन्त्री माधव नेपालं भारत भ्रमण याये न्ह्यः राजनीतिक व्यक्तित्वनाप सल्लाह यायेगु झ्वलय् माओवादीया नेता प्रचण्डनाप नं सल्लाह यात। प्रचण्डं राष्ट्रवादया कडा अडान काल धकाः धाल। नेपाःया जनतां धयाच्वंगु खँ प्रचण्डं प्रस्तुत याःगु जक खः। १) सन् १९५० या सन्धि खारेज यायेमाः। २) सुपुर्दगी सन्धि मयायेत इनाप ३) नेपाः व भारतया न्हूगु सीमा सम्बन्धी हस्ताक्षर मयायेत इनाप। ४) भारतपाखें हतियार न्यायेगु प्रस्ताव खारेज यायेमाःगु। ५) नेपाःया विमानस्थलय् भारतीय सुरक्षा बलयात कवाज म्हितकेगु बन्द यायेगु। ६) पंचेश्वर बहुउद्देश्य परियोजनाया सम्झौता मयायेत इनाप। यदि धाथें माओवादी नेतां राष्ट्रघाती सन्धि मयायेत कडा अडान काःगु खःसा सारा जनता साथ बीत आतुर जुयाच्वंगु दु। राष्ट्रघाती मुद्दा बारे अडान काःगु खःसा सार्वजनिक थासय् वयाः जनताया न्ह्यःने प्रस्तुत यायेगु आँट दयेमाल। यदि प्रचण्डं जनताया न्ह्यःने वयाः प्रस्तुत मयासे पत्रिकाय् जक थथे अथे धकाः धयाच्वन धाःसा माओवादी नेतात नं भारतया प्रभावय् लानाच्वन धयागु खः अनुमान यायेत अःपु ।

भारत व अमेरिकाया कट्टर मुस्मां व चीन विरोधी छगू हे नीति खः। अमेरिकां भारतया मुस्मां विरुद्ध ल्वायेगु लागिं माक्व ग्वाहालि यानाच्वंगु दु। चीन विरुद्ध नं तिब्बतीतय्त व सिन्ज्यांगया मुस्मांतय्त उक्से यानाः चीनयात टेन्सन बीगु यानाच्वंगु दु। झीगु देय्या नेतातय्त नं भारत व अमेरिकाया इशाराय् प्याखं हुइकाः तिब्बत व सिन्ज्यांग प्रान्तय् गोलमाल याकेगु लागिं तःधंगु षडयन्त्र यानाच्वंगु दु। यदि झीसं भारत व अमेरिकाया थ्व घातक षडयन्त्रयात इलय् हे चकनाचुर याये मफुत धाःसा नेपाः नं अफगानिस्तान व इराकया थेंज्याःगु हालतय् लाः वनेफु। अथे जूगुलिं देशभक्तत छप्पँ जुयाः देश घातकतय्त पराजित यायेमाःगु दायित्व वयाच्वंगु दु ।

More Stories Like this