राष्ट्रपतियात लःल्हाःगु संघर्ष समितिया ज्ञापनपत्र

दस्तावेज

सम्माननीय डा. रामवरण यादवजु,
राष्ट्रपति,
राष्ट्रिपतिया ज्याकू, शितल निवास,
महाराजगञ्ज, येँ ।

सम्माननीय राष्ट्रपतिजु,

विषय: ध्यानाकर्षण

नेपाली जनताया महान त्याग व बलिदानं सफल जूगु लोकतान्त्रिक आन्दोलनं नीस्वंगु लोकतान्त्रिक गणतन्त्र नेपाःया न्हापांम्ह राष्ट्रपतिया रुपय् सम्माननीयजु पदासिन जुयाः क्रियाशील जुयादीगु दु। थ्व नेपाःया आधुनिक इतिहासया छगू न्ह्यथनेबहःगु ई खः। अथे हे इलय् ब्यलय् समसामयिक राष्ट्रिय मामलाया सम्बन्धय् छिपाखें प्वंकूगु बिचाः व धापूत मुक्कं मुलुकया लागिं हे उलि हे अर्थपूर्ण व सरोकारया प्रसंङ्ग खत ।

व्यक्ति न्ह्याग्गु हे दलीय पृष्ठभूमिपाखें राष्ट्रपति जूम्ह जूसां राष्ट्रपति देय्न्यंकंया फुक्कं जनता, समुदाय, वर्ग व आस्थाया मंकाः अभिव्यक्तिया प्रतिमूर्ति खः, थ्व हे संवैधानिक व सैद्धान्तिक मान्यता खः, जिपिं थ्वहे खँय् आस्थावान जुया च्वनागु दु ।

न्हूगु संविधान दयेकाः स्वायत्तता सहितया संघीय नेपाःया रुपय् राज्यया पुनः संरचना यायेत दलतय् दथुइ कायम जूगु राष्ट्रिय सहमतिया लिधंसाय् संविधानसभापाखें लोकतान्त्रिक अभ्यास जुजुं वनाच्वंगु वर्तमान इलय् प्रशासकीय स्वरुप, राज्यया शक्तिया बाँडफाँडनिसें राज्यत दयेकेगु आधार सम्बन्धी बहुल अवधारणा, प्रस्ताव व मागत न्ह्यःने वइगु स्वाभाविक खः ।

थ्वहे सन्दर्भय् विशेषतः नेपाःया आदिवासी जनजाति समुदाय आत्मनिर्णयया अधिकार, स्वशासन सहित जातीय स्वायत्त राज्यया पक्षय् वकालत यानाः आन्दोलनर जुया वयाच्वंगु खँयात सम्माननीय राष्ट्रपतिजु बांलाक थू। संविधानसभाय् थीथी दलया प्रतिनिधित्व यानाच्वंपिं आदिवासी जनजाति सभासदतय्सं नं आः नकतिनि जक छगू आदिवासी जनजाति सभासदसभा (ककस) नीस्वनाः जातीय, भाषिक म्हसीका सहितया स्वायत्त राज्यया अधिकार सुनिश्चितताया निंतिं प्रतिवद्ध जुयाः न्ह्यःने वनेत कुतः यानाच्वंगु दु। थ्वहे झ्वलय् नेपाःया छगू मू आदिवासी नेवाः समुदाय नं प्राचीन नेपालमण्डल दुने नेवाः स्वायत्त राज्य दयेकेगु अधिकार कायेगु निंतिं छुं ई न्ह्यःनिसें सतक आन्दोलनय् दु। नेवाः स्वायत्त राज्य मंकाः संघर्ष समिति अन्तर्गत छप्पँ जुयाः नेवाः समुदायत आः मदिकं जुलुस प्रदर्शन, बन्दया नापं थीथी जनदवाव मुलक ज्या याना वयाच्वंगु दु ।

थुगु संघर्ष समितिइ देय्या मू राजनीतिक दलया नेवाः जातीय मामिला सम्बन्धी भातृ संगठनत नेवाः राष्ट्रिय मुक्ति मोर्चा, नेपाः (एकीकृत नेपाल कम्युनिष्ट पार्टी माओवादी), नेपाल लोकतान्त्रिक नेवाः संघ (नेपाल कम्युनिष्ट पार्टी एमाले), नेवाः मंकाः मुक्ति दबू (पूर्व जनमोर्चा), नेवाः ल्याय्म्ह न्ह्यलुवाः (नेपाः राष्ट्रिय पार्टी), नेवाः राष्ट्रिय संगठन नेवाः देय् दबू, नेवाः देय् गुथि नेपालमण्डल, नेवाः जागरण मञ्च, ज्यापु महागुथि व ज्यापु समाज थेंज्याःगु संस्थाया मंकाः मोर्चा कथं ज्या याना वयाच्वंगु दु। नेपाली कांग्रेसया सभासद माननीय तीर्थराम डंगोल व नेपाली कांग्रेस येँ जिल्लाया उपसभापति भीमसेनदास प्रधानया नापनापं मानव अधिकारकर्मि पद्मरत्न तुलाधर व प्रा. माणिकलाल श्रेष्ठ सल्लाहकार कथं च्वनादीगु दु ।

जातीय स्वायत्तता व स्वशासन राज्य संरचनाया झ्वलय् नेवाः लगायत समग्र आदिवासी समुदायं न्ह्यथना वयाच्वंगु मू मुद्दा खः। अथे जुयाः सम्माननीय राष्ट्रपतिजुपाखें प्वंकीगु सार्वजनिक अवधारणाय् थ्व मुद्दा व भावनाया उचित कदर जुइमा धकाः थुगु ज्ञापनपत्र मार्फत् जिमिसं विशेष आग्रह यानाच्वना। सकसियां मंकाः आस्थाया केन्द्र व संरक्षकया हैसियतं सम्माननीय राष्ट्रपति महोदयपाखें प्वंकीगु गुगुं नं बिचाः व धापू गुगुं खास पुचः विशेषया पक्ष वा विपक्षय् मजूसें उकि निरपेक्षताया वोध जुइमाः धइगु जिमिगु अपेक्षा दु। नापं, राज्य पुनःसंरचना जातीय अधिकार, समुदायगत म्हसीकाया मुद्दा सदां संवेदनशील जुइगुलिं यानाः नं थ्व सम्बन्धी अभिव्यक्तिया हुनिं राष्ट्रपति थेंज्याःगु गरिमामामय पदया भूमिकाय् विवाद ब्वलनीगु स्थिति वयेके बी मजिउ धइगु खँय् नं थुगु समिति सम्माननीयजुयात विनम्रतापूर्वक ध्यान सालाच्वना ।

नेवाः स्वायत्त राज्य सम्बन्धय् थुगु संघर्ष समितिपाखें तयार याःगु राजनीतिक अवधारणा छिगु समितिया प्रायोजनया लागिं थ्वहे ज्ञापनपत्र नापं दुथ्याकागु दु। सुभाय् ।

नरेश ताम्रकार
छ्याञ्जे
नेवाः स्वायत्त राज्य मंकाः संघर्ष समिति
११२९ गुंलागाः ७
(२००९ अगष्ट १२)

More Stories Like this