अध्यक्षया चुनाव भदौ १२ गते
सहमतिपाखें अध्यक्ष ल्ययेगु पहल
येँ (सन्ध्या टाइम्स)/संविधानसभा कार्यव्यवस्था समितिया थौं सुथय् च्वंगु बैठकं संवैधानिक समितिया अध्यक्ष ल्ययेगु निर्वाचनया तिथि लिछ्याःगु दु ।
सभामुख सुवास नेम्वाङया अध्यक्षताय् च्वंगु उगु बैठकं कन्हय् जुइगु निर्वाचन लिछ्यानाः आः थ्वहे वइगु भदौ १२ गते यायेगु निर्णय याःगु दु ।
कार्यव्यवस्था समितिया उगु निर्णययात थौं च्वनीगु संविधानसभाया बैठकं अनुमोदन याइगु खँ सीदुगु दु।
संवैधानिक समितिया अध्यक्ष बारे सहमति कायम यायेगु निंतिं थप राजनीतिक पार्टीतय् दथुइ सहलह यायेमाःगु खँ धासें म्हिगः एमाले, कांग्रेस व माओवादी दुथ्याःगु बैठकं सभामुखयात निर्वाचन तिथि लिछ्यायेत इनाप यायेवं थौं कार्यव्यवस्था समितिया बैठक च्वनाः निर्वाचन लिछ्यायेगु ज्या याःगु खः ।
प्रधानमन्त्री माधव नेपाल याकनं हे भारत भ्रमणय् वनेत्यंगु व माओवादी अध्यक्ष पुष्पकमल दाहाल 'प्रचण्ड' युरोपया भ्रमणय् वनाच्वंगुलिं बांलाक सहलह मजूगु व थप सहलह यायेत निर्वाचनया ज्याझ्वः लिछ्याःगु खः ।
समितिया अध्यक्ष माधव नेपालं प्रधानमन्त्री जुइवं पदं राजीनामा बियादीगु खःसा आः उगु पदय् माओवादी व कांग्रेसं दाबी यानाच्वंगु दु। उगु पदया निंतिं राजनीतिक सहमति कायम जुइ मफयेवं कांग्रेसं सभासद व संविधानविद् निलाम्बर आचार्ययात अध्यक्षया उम्मेदवार दयेकूगु खःसा माओवादीं डा. बाबुराम भट्टराईयात उम्मेदवार कथं न्ह्यःने हःगु खः ।
उखे अध्यक्ष पदया निंतिं सत्तारुढ २२ दलं थःपिनिपाखें मंकाः उम्मेदवार बीगु धाःसां एमालें माओवादीयात नं सहमतिइ हयाः जक अध्यक्ष ल्ययेमाःगु अडान कयाच्वंगु दु । उगु पदय् कांग्रेसयात ग्वाहालि यायेगु वा माओवादीयात ग्वाहालि यायेगु धइगु बारे एमाले दुने विवाद ब्वलनाच्वंगु दुसा मेखे सत्तारुढ दलय् दुथ्याःगु चीधंगु दलतय्सं नं अध्यक्ष पद थःपिंत बीमाःगु माग याना वयाच्वंगु दु ।
माओवादी अध्यक्ष प्रचण्ड विदेश भ्रमणं लिहां वयेवं थुकिया बारे सहमति कायम यायेत सहलह जुइगु खँ सम्बन्धित राजनीतिक पार्टीतय्सं धाःगु दु ।
