गांया मतिनां वामि जूम्ह जगमोहन

सुनिता मानन्धर

झिंन्यान्हु मानि ब्याहा यायेगु.......'

थ्व छपु नेपालभाषाया अतिकं लोकं ह्वाःगु म्येँ खः। थुगु म्ये न्यनेवं झीगु न्ह्यःने जगमोहन वामि दं वइ। वय्कलं थुगु म्येँ न्यय्दँ न्ह्यः च्वयाः थम्हं हे हालादीगु खः ।

ने.सं. १०८० इ वालय् छकः नेवाः भाय्, साहित्य व संस्कृति दुथ्याकाः रेडियो नेपालं 'जीवन दबू' ज्याझ्वः न्ह्याकल। उगु ई लः त्वनेमाःम्हेसिनं थम्हं हे बुंगाःचा मालेमाः धइथेंज्याःगु ई। अबलय् म्येँ च्वइपिं व हालीपिं तसकं म्हो। जीवन दबू न्ह्याकेत झाइम्ह भाजु जगमोहन वामिं नं उखेंथुखें म्ये मालादिल। अथे हे मालेगु झ्वलय् वय्कः थम्ह नं च्वसा न्ह्याकेगु शुरु यानादिल। अले थम्हं च्वयागु म्येँयात थम्हं हे लय्चिनाः आपालं म्येँ हालेगु नं यानादिल ।

दकलय् न्हापां वादेशय् वय्कलं 'गुथिया ख्यालः' नांया म्येँ प्याखं च्वयाः क्यनादिल। थुगु प्याखं वादेय् न्यंकंया त्वाःत्वालय् क्यनेया लागिं सकसिनं ग्वाहालि यात। थुगु प्याखं अतिकं लोकंह्वात। वय्कःयात प्याखं स्वःवःपिं सकसिनं प्रशंसा यात। थःत याःगु थ्व प्रशंसायात हे वय्कलं थुगु क्षेत्रय् हाकनं हाकनं पलाः न्ह्याकेगु चूलाःगु प्रेरणाया श्रोत कथं कयादी। अनं लिपा वय्कलं मदिक्क हे नाटक च्वयाः त्वाःत्वालय् क्यनेगु यानादिल ।

अथे ला वय्कलं स्कूल इलंनिसें हे म्येँ व चिनाखँ च्वयेगु शुरु यानादीधुंकूगु खः। वय्कःयात अप्वः यानाः मतिनाया म्ये हे यः। उकिं वय्कलं थम्हं नं मतिनाया म्ये हे यक्व च्वयादीगु दु ।

थम्हं म्येँ च्वयागु, उकियात लसय् हनागु व थीथी थासय् वनाः हाः वनागु बारे वय्कःयाके आपालं माकुगु फाकुगु अनुभवत दु। वय्कलं गबलें ख्याः यायां म्येँ चिनादीसा गबलें धाथें जूगु छुं घटनाया लिधंसाय् म्येँ च्वयादी। अज्याःगु छगू घटना लुमंकुसें वय्कलं धयादी, 'छन्हु मदनकृष्ण श्रेष्ठ व वया कलाः मोटरसाइकलय् वयाच्वंगु। टेकुइ जितः खनेवं म्ये छपु हालेगु धाल। जिं गज्याःगु म्ये हालेगु धया। थः कलाःयात स्वयाः वय्कलं धयादिल ' न्हापा कलाःयात ह्ययेके थें यानाः ज्या याइम्ह छम्ह हया बी धयागु, लिपा लिथु हयेगु थेंज्याःगु म्येँ दःसा जिउ धयादिल। उकियात ल्वय्क जिं 'छं दुःख स्यूगु खनाः.....' म्येँ च्वया। थ्व म्येँ तसकं लोकं नं ह्वात ।'

वय्कलं च्वयादीगु म्येँ वय्कः स्वयं लगायत मदनकृष्ण श्रेष्ठ, योगेश वैद्य, रत्नमान, ज्ञानु राणा, रमेश ताम्राकार, संगीता शाक्य आदि थेंज्याःपिं गायक गायिकापिंसं नं हालादीगु दु।
थम्हं च्वयागु म्येँयात थम्हं हे लसय् हनाः थःगु हे सलं 'वामिया दबू' नां म्येचाः पिकयादीगु दु। अथे हे वय्कलं 'पुष्पाञ्जली' नांगु भजन संग्रह नं पिकयादीगु दुसा मेमेगु थीथी म्येचालय् नं वय्कःया म्येँ दुथ्यानाच्वंगु दु ।

वय्कःया धाथेंया पूवंगु नां जगमोहन मेहर कायस्थ खः। वय्कः थःगु गांयात अतिकं माया याइम्ह नागरिक खः। उकिं थःगु हे गांया नामं थःगु म्हसीका बीगु ताः तयाः वय्कलं थःगु नां जगमोहनया लिउने वादेय्या नागरिक कथं 'वामि' उपनां तयादिल ।

थौंया संगीत ख्यलय् न्हापा स्वयां यक्व हे हिउपाः वयेधुंकूगु दु। थुकियात कयाः वय्कलं धयादी, 'थौंकन्हय्या संगीत थःगु हे थासय् ल्वकं ह्वाः। तर न्हापाया संगीत ताः ई तक म्वानाच्वन। थ्व न्यनेबलय् नुगलय् चस्स दिनाः नुगः खुल्ल मिं ।'

संगीतया पारखी खयां नं वय्कःया व्यवसाय धाःसा व्यापार खः। अथे जूसां भाषा साहित्यनापं समाजसेवाय् नं वय्कःया सक्रियता उतिकं हे दु। वय्कःया हे पहलय् छुं दँ न्ह्यः तिनि वादेय् यल जिल्लाय् हे दकलय् न्हापांगु विज्ञान संकायया प्लस टु कलेज न्ह्याकेगु ज्या जूगु खः। विज्ञान ब्वनेगु इच्छा व क्षमता दुपिं विद्यार्थीत गामं तापाक वनाच्वनेमाःगु अवस्थायात ध्यानय् वय्कलं गामय् हे विज्ञान संकायया उगु कलेज चायेकेगु पहल यानादीगु खः। व्यापार व समाजसेवाय् लगे जुयाः नं वय्कःया नुगः संगीतं धाःसा अझ नं तापाये मफुनि। आः याकनं हे वय्कःया न्हूगु म्येचाः पिहां वयेगु तयारी नं जुयाच्वंगु दु ।

More Stories Like this