शपथया भाषा बारे संविधान संशोधन

उपराष्ट्रपति परमान्द झां हिन्दी भासं काःगु शपथयात सर्वोच्च अदालतपाखें खारेज यायेधुंकाः आः वय्कःयात खस नेपाली भासं हे शपथ कायेमाः धकाः हानं मेगु आदेश बिउगु दु। सर्वोच्च अदालत मुलुकया दकलय् तःधंगु न्यायिक संस्था जूगु कारणं देशय् जुइगु छुं नं कथंया राजनीतिपाखें थ्व प्रभावित जुइ मजिउ धइगु सर्वमान्य मान्यता खः। तर देय्या भाषिक राजनीतिइ धाःसा सर्वोच्च अदालत स्पष्ट रुपं हे सहभागी जू वःगु खः लाकि धइगु आभास उपराष्ट्रपतिया भाषा प्रकरणं याका बिउगु दु। सर्वोच्चय् प्रधानसेनापति रुक्मांगद कटवालया उमेर सम्बन्धी छगू मुद्दा लानाच्वंगु दँदँ दयेधुंकल, स्वय्म कटवाल हे आः पदमुक्त जुइधुंकल तर सर्वोच्चं उकिया फैसला बीगु आवश्यकता आः तक मतायेकूनि। तर उपराष्ट्रपति परमान्द झाया मामिलाय् धाःसा लाबलाया दुने सर्वोच्चं निगू तक आदेश जारी यायेगु फुर्सद पिकाल ।

थ्वहे झ्वलय् आः राष्ट्रपतितय्सं नं थःथःगु मांभासं शपथ ग्रहण याये दइ कथं संविधान संशोधन यायेगु बारे राजनीतिक पार्टीतय् दथुइ सहमति जूगु खँ प्रकाशय् वःगु दु। उकियात लसकुस हे यायेमाः। नेपाः आः पञ्चायतकालीन हाकुगु युगय् मदु। राज्यपुनर्संरचना यानाः न्हूगु युगय् दुहां वनेगु यात्राय् नेपाः दु। थज्याःगु इलय् हरेक नागरिकयात थःथःगु मांभासं शपथ ग्रहण यायेगु अधिकार दयेमाः।
राजनीतिक पार्टीतय्सं थुकियात महसुस यानाः बांलात। बरु सर्वोच्चं उपराष्ट्रपति विरुद्ध याकन याकनं आदेश जारी याः थें संविधान संशोधनया थ्व ज्या नं याकनं यायेमाःगु खनेदु। देय्या फुक्क नागरिकं सम्मान व समान महसुस यायेखनीगु लँपु थ्वहे जक खः। बांलाःगु ज्याय् छाय् लिबाका च्वनेगु?

More Stories Like this