माओवादीं एमाले ह्ययेकाच्वन
कांग्रेसं उम्मेदवार हिलीगु सम्भावना
येँ (सन्ध्या टाइम्स)/संवैधानिक समितिया न्हूम्ह अध्यक्ष ल्ययेगु ज्याय् माओवादीपाखें प्रस्तावित याःम्ह उम्मेदवार डा. बाबुराम भट्टराईयात एमाले लगायत सुं हे सत्तारुढ दलं मत मबीगु सम्भावना पिहां वःगु दु। अथे खःसां माओवादीं एमालेलिसे निरन्तर संवाद धाःसा न्ह्याकाच्वंगु दनि ।
सूत्रतय्सं बिउगु जानकारी कथं माओवादी नेता नारायणकाजी श्रेष्ठं थौं एमाले अध्यक्ष झलनाथ खनालयात फोन यानाः थ्व बारे सहलह यायेत इनाप यानादीगु दु। लिसलय् खनालं थःपिं थौं सुथंनिसें हे स्थायी समितिया बैठकय् च्वंच्वनागु कारणं बैठक लिपा सहलह याये धयादीगु दु। एमाले स्थायी समितिया बैठकय् नं थ्वहे बारे खँ जुइगु जानकारी सूत्रं बिउगु दु। एमाले बैठकय् नेता केपी ओलीं तःगु शुद्धीपत्र बारे नं सहलह जुइगु खँ धाःगु दु ।
म्हिगः स्वयम् उम्मेदवार डा. बाबुराम भट्टराईनं हे प्रधानमन्त्री माधव नेपालयात फोन यानाः एमालेया भोट थःत बीत इनाप यानादीगु खः। लिसलय् प्रम नेपालं थुकिया बारे पार्टी दुने व सत्तारुढ २२ दल दुने सल्लाह यायेमानि धकाः लिसः बियाछ्वःगु खः ।
म्हिग च्वंगु २२ दलया बैठकय् थुकिया जानकारी बिसें प्रम नेपालं धयादिल, 'थुलि धायेधुंकाः ला वय्कलं खँ थुल हे जुइ नि ।'
म्हिगः च्वंगु २२ दलया बैठकय् कांग्रेसं उम्मेदवार धकाः न्ह्यःने हयातःम्ह निलाम्बर आचार्ययात २२ दलपाखें समर्थन याये मफइगु खँ नं पिहां वःगु खः। आचार्यया बारे अज्याःगु खँ वयेवं बैठकय् वयाच्वंपिं नेतातय्सं आचार्य थःपिनि आधिकारिक उम्मेदवार मखु धकाः लिसः बिउगु खः। वयां लिपा २२ दलय् दुथ्याःपिं चीधंगु दलतय्सं आचार्य बाहेक मेम्ह उम्मेदवार माले माल, कि मखुसा चीधंगु दलयात हे अवसर बीमाल धकाः माग याःगु खः ।
२२ दलपाखें मंकाः उम्मेदवार थनेगु खँ धाःसा बैठकय् मजूगु जानकारी नेपाः राष्ट्रीय पार्टीया मू छ्यांज्ये विजय सैंजूं बियादिल ।
म्हिगःया बैठकय् २२ दल संयन्त्रया बिस्कं ज्याकू चायेकेगु, प्रमया भारत भ्रमणय् प्रमया स्वविवेकं चीधंगु दलपाखें छम्ह दुजः यंकेगु नं निर्णय जूगु खः। बैठकय् प्रमया भ्रमण बारे खँ मजूगुलिं कन्हय् ५ बजे वालुवाटारय् हानं २२ दलया बैठक च्वनेत्यंगु दु ।
