संवैधानिक समितिया अध्यक्षया ल्यज्या

एमाले नेता माधव नेपालं त्वःतूगुलिं खाली जुयाच्वंगु संवैधानिक समितिया अध्यक्ष ल्ययेगु लागिं पहल शुरु जूगु दु। थुकिया अध्यक्ष जुइगु लागिं आः माओवादी व नेपाली कांग्रेस दथुइ धेंधेंबल्लाः जुयाच्वंगु दु। माओवादीपाखें डा. बाबुराम भट्टराई व कांग्रेसपाखें निलाम्बर आचार्ययात थुकिया उम्मेदवार दयेकूगु दु ।

निगू पार्टीया थ्व धेंधेंबल्लाखय् खास यानाः सत्तारुढ पार्टी नेकपा (एमालें) सुयात थःगु भोट बी, वहे त्याइगु निश्चित दु। तर एमालें धाःसा आः तक थःगु स्थिति स्पष्ट मयाःनि। एमाले थौंकन्हय् कांग्रेसलिसे जानाः सरकार चले यानाच्वंगु दु। उकिं एमालेया मत कांग्रेसयात वनीगु सम्भावना यक्व दु। तर छखे वामपन्थी उम्मेदवार दनाच्वंगु दयेक दयेकं एमालें वाम उम्मेदवारयात मत मबिसे कांग्रेसयात बिउ वन धाःसा उकिं एमालेया वाम छबीइ बांमलाःगु हाकः किकी। संवैधानिक समितिया अध्यक्ष ल्ययेगु धइगु सरकार दयेके थें गठबन्धन यायेगु विषय नं मखु। आःया संविधान गणतन्त्र, संघीय व्यवस्था व राज्य पुनर्संरचनाय् आधारिक संविधान खः। अले थ्व विषय धइगु गबलें नं कांग्रेसया एजेण्डा मखु। नेपाःया सन्दर्भयात कयाः धायेगु खःसा थ्व नितान्त क्रान्तिकारी व परिवर्तनकामी विषय खः। कांग्रेसं थुकियात संवोधन याइ धकाः आशा यायेगु उपयुक्त जुइ मखु। अझ नं थुपिं एजेण्डाय् कांग्रेसं स्पष्ट बिचाः बिउगु मदुनि। छुं जुयाः सुयां नं कारणं देशय् बांमलाःगु संविधान निर्माण जुल धाःसा द्वन्द्व हानं नं जारी जुइ। अय् जूगुलिं संविधान दयेकेगु ज्याया थ्व मूली ल्ययेगु प्रक्रियायात अतिकं गम्भीर रुपं कायेमाःगु अतिकं आवश्यक दु ।

More Stories Like this