संवैधानिक समितिइ धेंधेंबल्लाः
माओवादी व कांग्रेसया लबिङ तीव्र
येँ (सन्ध्या टाइम्स)/संविधान च्वयेगु निंतिं दयेकातःगु दकलय् उच्चस्तरीय समिति संवैधानिक समितिया चुनाव सतिना वःलिसे कांग्रेस व माओवादीं नं थःपिनि उम्मेदवारत त्याकेगु निंतिं सहलह शुरु तीव्र याना हःगु दु। थ्वहे झ्वलय् थौं माओवादीं चीधंगु राजनीतिक पार्टीत लिसे सहलह याइगु जूगु दु ।
माओवादीं उपाध्यक्ष डा. बाबुराम भट्टराईयात संवैधानिक समितिया अध्यक्ष उम्मेदवार कथं घोषणा याःगु दु। डा. बाबुराम भट्टराईयात त्याकेगु निंतिं थौं चीधंगु दलतलिसे माओवादीं सहलह ब्याकेत्यंगु दु ।
उखे कांग्रेसं नं थौं थःपिनि आधिकारिक उम्मेदवारया घोषणा यायेगु तयारी यानाच्वंगु दु। कांग्रेसं सभासद् व संविधानविद् निलाम्बर आचार्ययात समितिया अध्यक्ष उम्मेदवार कथं न्ह्यःने हःगु दु। संविधानसभाया अध्यक्ष एमाले व उपाध्यक्ष माओवादीयात वनाच्वंगुलिं संवैधानिक समितिया अध्यक्ष थःपिंत बीमाःगु दावी कांग्रेसं यानाच्वंगु दु ।
संवैधानिक समितिइ न्हापा प्रधानमन्त्री माधव नेपाल अध्यक्ष जुयाच्वंगु खःसा वय्कः प्रधानमन्त्री जुइधुंकाः उगु पद प्वनाच्वंगु खः ।
अन्तरिम संविधान कथं संवैधानिक समितिया अध्यक्ष लछि स्वयां अप्वः प्वने मजिउगु खःसा राजनीतिक पार्टीतय् दथुइ ब्वलंगु विवादया कारणं समिति नेतृत्व विहिन जुयाच्वंगु खः ।
थ्वहे वइगु भदौ १ गते अध्यक्ष ल्ययेत निर्वाचन यायेगु ज्याझ्वः क्वःछिनातःगु दु। ताः ई तक नं संवैधानिक समितिया अध्यक्ष विहिन जुयाः समितिया बैठक तकं च्वने मफयेवं सभामुख सुभाष नेम्वाङ्गया विशेष पहल यानाः चुनाव यायेगु मिति क्वःछिउगु खः ।
