प्रमं भारतयात छु बिया थकीगु खः?

प्रधानमन्त्री माधव नेपालं थः प्रधानमन्त्री जुइधुंकाःया न्हापांगु औपचारिक भ्रमणया रुपय् भारत यात्रा यानादीत्यंगु दु। भाद्र २ निसें वय्कःया भ्रमण शुरु जुइगु ज्याझ्वः नं क्वःछिना तयेधुंकूगु दु ।

नेपाःया मन्त्री प्रधानमन्त्रीत भारत भ्रमणय् वनीबलय् उमिसं नेपाःया प्राकृतिक श्रोतत भारतयात लःल्हाना थकीगु न्हापांनिसेंया परम्परा दुगुलिं थुगुसी नं अज्याःगु हे छुं ज्या याना थकीगु खः लाकि धइगु शंका आम नेपाली जनतां याइगु स्वाभाविक खः। प्रमया भारत भ्रमणया तयारीया लागिं उखे वनाच्वंम्ह परराष्ट्र मन्त्री सुजाता कोइरालां नेपाः-भारत पारवहन सन्धि न्हय्दँय् छक्वः नवीकरण यायेत भारत तयार जुल धकाः 'लसताया खँ' न्यंका हःगु दु। खतुं पञ्चायतकालय् थ्व सन्धि न्हय्दँय् छक्वः हे नवीकरण जुइगु खः। लिपा तिनि भारतं उकियात न्यादँय् छक्वः याना बिउगु खः। आः हानं न्हय्दँय् छक्वः हे नवीकरण यायेत तयार जूगुया लिउने छु रहस्य सुलाच्वंगु दु, व शायद प्रधानमन्त्रीया भारत भ्रमण लिपा सी दइ जुइ। भारतं छुं तःधंगु मकायेवं छुं चीधंगु नं गबलें बी मखु। थ्व वयागु न्हापांनिसेंया हे नीति खः। आः हे नं पंचेश्वर, पश्चिम सेती, कर्णाली, सप्तकोशी आदि थीथी परियोजनाया खँ न्ह्यःने वयाच्वंगु दु। अन थःगु नियन्त्रण जुइगु अवस्था दयेकेत भारतं नेपाःयात ह्ययेकीगु यक्व सम्भावना दु। प्रम नेपाल भारत भ्रमणय् वनीबलय् थुखेपाखे नं विशेष रुपं ध्यान बीमाःगु आवश्यकता दु। नेपाःयाके आः ल्यं दनिगु निपु प्यपु खुसि नं भारतयात लःल्हाना थकल धाःसा माधव नेपाल इतिहासय् कलंकित जुइमालीगु खँयात नं वाःचायेकेमाः ।

More Stories Like this