थौं सिंहदरवार निघौ ठप्प
सीडीओ ज्याकुथी कर्मचारी पिने
येँ (सन्ध्या टाइम्स)/नागरिक सर्वोच्चता कायम यायेमाःगु व प्रधानसेनापति प्रकरणय् राष्ट्रपतिं ल्ह्वंगु पलाःयात भिंकेमाःगु माग यासें आन्दोलन याना वयाच्वंगु माओवादीं थौं सिंहदरवार घेरे यानाः अनया फुक्कं ज्या ठप्प याना बिल।
थौं सुथय् १० निसें ११ बजे तक सिंहदरवार घेराउ यायेगु ज्याझ्वः दुगु खःसां माओवादी कार्यकर्तातय्सं सुथय् ९ बजेनिसें हे घेराउ शुरु यानाः १२ बजे तक सिंहदरवारय् सुयातं दुत मछ्वःगु खः ।
माओवादीपाखें सिंहदरवार घेराउ यायेगु झ्वलय् अन दुनेया थीथी मन्त्रालयय् ज्या याइपिं कर्मचारीत छम्हेसित हे दुत मछ्वःगु खः। कर्मचारीत सिंहदरवारय् दुहां वने मखनेवं सिंहदरवारया फुक्कं ज्या प्रभावित जूगु दु। माओवादी धर्नाया कारणं सिंहदरवार जःखःया यातायात नं प्रभावित जूगु खः।
माओवादीं थौं येँय् सिंहदरवार घेराउया नापं देय्न्यंकंया जिल्लाय् सीडीओ ज्याकू नं घेराउ याःगु खः। येँ, यल व ख्वपया सीडीओ ज्याकुथी धर्ना बीगुया लिसें अन कर्मचारीतय्त नं दुत मछ्वसे पिने हे तुं तयातःगुलिं अनया ज्या नं ठप्प जुयाच्वंगु दु। माओवादी धर्नाया कारणं थःथःगु ज्या ज्वनाः वःपिं सर्वसाधारण जनता नं प्रभावित जूगु दु।
थ्वहे झ्वलय् माओवादीं थौं नं विधायिक संसदया बैठक न्ह्याके मबीगु खँ धाःगु दु। म्हिगः च्वंगु सदनया बैठक माओवादी विरोधया कारणं विषय प्रवेश तकं मजुसे क्वचाःगु खःसा थौं नं सदन न्ह्याइगु सम्भावना मदुगु खँ धाःगु दु।
माओवादीं सरकार व थःपिं दथुइ लछि न्ह्यः जूगु सहमति कार्यान्वयन यायेमाःगु माग यानाच्वंगु दु ।
