सरकारय् वनेवं एमालेय् हानं ल्वापु

सत्तारुढ पार्टी नेकपा (एमाले) दुने हानं निगू गुटया विवाद पिहां वःगु दु। झलनाथ खनालया संस्थापन पक्ष व केपी ओलीया विपक्षी दथुइ थ्व विवाद पिहां वःगु खः। खतुं पार्टी सरकारय् वनेसातकि सरकारय् वंगु गुट व मवंगु गुट दइगु विवाद व कचवं पिहां वइगु सामान्य नेपाःया राजनीतिक पार्टीतय्गु ल्वय् हे धाःसां जिउ। एमाले न्हापा न्हापा सरकारय् च्वंबलय् नं अन दुने थज्याःगु विवाद पिहां वःगु खः। तर थुगुसी पिहां वःगु विवाद धाःसा न्हापाया स्वयां छुं भचा पाः ।

एमाले आः बहुपदीय प्रणालीइ वनेगु तयारी यानाच्वंगु दु। उकिया निंतिं पुलांगु कमिटीत भंग यानाः न्हूगु दयेकेगु ज्या शुरु याःबलय् थज्याःगु विवाद पिहां वःगु खः। थ्व झ्वलय् पार्टी दुने अल्पमत पुचःया नेतृत्व यानाच्वंम्ह नेता खड्ग ओलीं पार्टीया संस्थापन पक्षं यानाच्वंगु मिले मजूगु ज्या धकाः छगू धलः हे पित बिउगु दु। यदि पार्टीं उकियात संवोधन मयात धाःसा उकियात क्वय्या कमिटीइ तक हे यंकेगु ख्याच्वः नं बिउगु दु। वास्तवय् छगू पक्षं हःगु बिचाःयात क्वय्या कमिटीइ तक यंकाः छलफल याकेगु धइगु पार्टी दुने छगू कथंया भू कीगु हे ज्या खः। थुकिं एमालेयात बल्लाकी मखु। आः हे नं एमाले वैचारिक विचलन, सांगठनिक कमजोरी, नेतातय् विलाशी जीवन व माओवादीलिसे यायेमाःगु प्रतिस्पर्धां यानाः एमालेया अवस्था न्हापा स्वयां तसकं कमजोर जुइधुंकूगु दु। संविधानसभाया चुनावं थ्व खँ प्रस्ट हे याना बिउगु खः। तर उकियात भिंकेगु पलेसा पार्टी आः हाकनं थवंथवय् हे ल्वानाच्वनेगु खःसा थुकिं पार्टी जक मखु नेपाःया हे भविष्ययात तकं लिच्वः लाकीगु खतरा दु ।

More Stories Like this