नेवाः म्युजिक भिडियो

नरेन्द्रमान श्रेष्ठ गोगंजु

थौंकन्हय् नेपालभाषा म्येँया म्युजिक भिडियो दयेकेगु छगू कथं लहर हे वयाच्वंगु दु। थज्याःगु म्यूजिक भिडियोयात थीथी नेपाली टेलिभिजन च्यानलतय्सं प्रशारण नं यानाच्वंगु दु। नेपालय् २०४० या दशकंनिसें टेलिभिजन शुरु जूगु खः। शुरुइ सरकारी नेपाल टेलिभिजन जक वःगु खःसां थौंकन्हय् निजीस्तरया थीथी च्यानलत वयाच्वंगु दु। नेपाल टेलिभिजन, एनटिभि-२, कान्तिपुर, इमेज च्यानल, च्यानल नेपाल, नेपाल वान, एबीसी, सगरमाथा, एभिन्यूज, तराई टेलिभिजन आदि नापं भविष्यय् मेगु च्यानलत नं प्रशारणय् वयेगु तयारीइ दु ।

टेलिभिजनयात सञ्चारया सशक्त माध्यम कथं कायेगु नापं मनोरंजनया साधन कथं नं कायेगु याः। नेपाःया टेलिभिजन च्यानलतय्सं समाचार, जानकारीमुलक ज्याझ्वः, टेलिफिल्म, स्वास्थ्य शिक्षा सम्बन्धी ज्याझ्वःत नापं थीथी म्युजिक भिडियोत नं प्रशारण यानाच्वंगु दु। गुलिखे च्यानलत ला म्यूजिक भिडियो प्रशारणं हे जक चले जुयाच्वंगु धाःसां छुं मपाः ।

नेपाल टेलिभिजन व कान्तिपुर टेलिभिजन बाहेक थीथी च्यानलतय्सं खय्या भाय्या ज्याझ्वः बाहेक नेपालभाषाया ज्याझ्वःत नं प्रशारण यानाच्वंगु दु। उकिसनं नेपालभाषां बुखँ, नेपालभाषाया टेलिफिल्म व नेपालभाषाया म्युजिक भिडियो उमिसं प्रशारण याइगु मू ज्याझ्वः खः। थीथी टिभी च्यानलतय्सं नेपालभाषाया म्यूजिक भिडियो प्रशारण यानाच्वंगुलिं नं नेपालभाषाय् म्युजिक भिडियो निर्माण यायेगु लहर हे वयाच्वंगु खः। नेपालभाषाया लोकम्येँ, आधुनिक म्येँ, पप, रिमिक्स जक मखु नेपालभाषा भजनय् नापं म्युजिक भिडियो दयेकेगु कम्पनीत धमाधम न्ह्यःने वयाच्वंगु दुसा उमिसं धमाधम उत्पादन नं यानाच्वंगु दु। थ्व नेपालभाषा ख्यःया लागि बांलाःगु प्रथा खः ।

नेपालभाषाया म्युजिक भिडियो निर्माण यायेगु झ्वलय् थौंकन्हय् पुलांपुलांगु लोकंह्वाःगु म्येँ नं कायेगु यानाच्वंगु दु। तर थ्व ज्या धाःसा गुलि पाय्छि खः, उकी विवाद दु। म्यूजिक भिडियोया निर्देशक जितेन्द्र श्रेष्ठया बिचाः कथं पुलांपुलांगु म्येँ कयाः म्युजिक भिडियो दयेके न्ह्यः उकिया श्रष्टातय्के स्वीकृति कयाः जक यायेमाः। अले श्रष्टातय्त म्युजिक भिडियोलय् सम्मानजनक थाय् बीमाः ।

पुलांपुलांगु म्येँया म्युजिक भिडियो दयेकेबलय् म्येँयात ल्वयेक न्हू पुस्तां नं ययेकी कथं स्वकुमित नं आकर्षित याये फइ कथं ज्या यायेमाः। थुगुसी जक नेपालभाषाय् का न्हि मैंचा, छ हे छम्ह दु, वल वल पाहांचःर्‍हे, मतिनाया मू नापं दर्जनौं म्युजिक भिडियोया भिसीडी, डीभीडी पिहां वःगु दु। थ्व क्रम दँय्दसं अप्वयाच्वंगु दु ।

थौंकन्हय् थीथी टिभीइ प्रशारण जुयाच्वंगु विदेशी म्युजिक भिडियोय् खने दयाच्वंगु अश्लीलता व छाडापह छुं छुं नेपाली म्युजिक भिडियोलय् नं खने दयाच्वंगु दु। नेपाली म्युजिक भिडियो विदेशीया नक्कल यानाः पिकाइगुलिं थथे जूगु खः। यदि इलय् हे ध्यान मबिल धाःसा थज्याःगु अवस्था नेपालभाषाया म्युजिक भिडियोलय् नं मवइ धाये मफु। थुकी ला फुकं सचेत जुइ हे माः। थुकी म्युजिक भिडियोया निर्देशक जक मखु कलाकारत तकं उलि हे सचेत जुइमा। झीसं थःपिनि नेवाः तजिलजि, नेवाः सस्कार आदि विषययात ध्यान बीमाः। कर्किया नक्कल यानाः स्वये हे मजीक म्युजिक दयेकेगु ज्या दिके हे माः। थुकी ला दकलय् न्हापां मोडेलत निं सचेत जुइमाः। निर्देशकतय्सं थःगु स्वार्थया लागि थः चर्चाय् वयेगु लागिं संस्कृतियात स्यंकाः प्रस्तुत याये मजिउ। नेवाः कला ख्यः सभ्य व प्रतिष्ठित जुइमाः।
यदि नेपाली टेलिभिजन च्यानलतय्सं नेपालभाषा ज्याझ्वःयात थाय् बियाः नेपालभाषाया ज्याझ्वः प्रशारण यानाच्वंगु टेलिभिजन च्यानलतय्सं नेपालभाषाया ज्याझ्वःया ई तना बिल धाःसा नेपालभाषाया कला ख्यः नं अझ तब्या जू वनी। कान्तिपुर थेंज्याःगु टेलिभिजन च्यानलं नं खस नापं नेपालभाषा ज्याझ्वःयात थाय् बीमाः। थौंया इलय् नेपाः संघीय लोकतान्त्रिक गणतन्त्र जुइधुंकाः नं देय्या सञ्चार माध्यमतय्सं छगू भाषा नीति ज्वना च्वनेगु अले नेपाःया हे मेमेगु भाय्यात पाखा लिकाः सामुदायिक भावं ज्या यायेगुयात लोकतान्त्रिक धाये फइ मखु ।

More Stories Like this