एमालेय् हानं ओलीया कचवं
बहुपदीय प्रणाली वनेत पंग: थन
येँ (सन्ध्या टाइम्स)/भारत भ्रमणय् वनाच्वंम्ह एमालेया वरिष्ठ नेता केपी ओली लिहां वयाखतं हे पार्टी दुने बबाल शुरु जूगु दु। पार्टीया संस्थापन पक्षं येँ जिल्ला कमिटी भंग यायेगु प्रक्रिया शुरु यायेवं ओली व ओली गुटं थ्व बबाल शुरु याना हःगु खँ धाःगु दु ।
एमाले सूत्रं धाः कथं च्याक्वःगु महाधिवेशन लिपा पार्टीयात बहुपदीय प्रणालीइ यंकेगु लागिं पार्टीया फुक्क हे जिल्ला कमिटी भंग यानाः थौंकन्हय् धमाधम जिल्ला सम्मेलन आयोजक समिति गठन यायेगु ज्या न्ह्यानाच्वंगु दु। थ्व ज्या पार्टीया संस्थापन पक्ष याकःचां याःगु मदु। ओली पक्षया हे बहुमत दु धाःगु केन्द्रीय कमिटीया वंगु असार ५ गते च्वंगु बैठकं थ्व निर्णय याःगु खः। उगु निर्णय लिपा आः तकया दुने करिब ४५ गू जिल्लाय् जिल्ला कमिटी भंग यानाः जिल्ला सम्मेलन आयोजक समिति गठन यायेधुंकूगु दु। ४५ गू तक जिल्लाय् थ्व ज्या जुत्तले सुनां छुं मधाः, आः येँया कमिटी भंग यायेगु प्रक्रिया शुरु जुइसातकि धाःसा विरोध याना हःगुलिं थुकिया लिउने छु रहस्य दु धकाः मालेमाःगु खँ सूत्रं धाःगु दु ।
जिल्ला समिति भंग यानाः गठन जुइगु जिल्ला सम्मेलन आयोजक समितिया दुजःत नं फुक्कं जिल्ला समितिया हे दुजःत जुइ। लिसें उकी मेपिं नं छम्ह निम्ह थपे यायेफु। थ्व समितिं जिल्ला सम्मेलन यानाः चुनाव यासें केन्द्रय् थें अध्यक्ष, उपाध्यक्ष दुगु बहुपदीय प्रणाली कथंया संरचना तयार याइ। थौंकन्हय् एमालेया केन्द्र बहुपदीय जूसां जिल्ला धाःसा एकल पदीय हे जुयाच्वंगु दु ।
येँया जिल्ला कमिटीइ ओली गुटया पकड दु। उकिं ओली गुटं कचवं पिकाःगु अनुमान दु ।
