दूतावास मदुगु देशय् राजदूत

सरकारं नेपाःया राजदूतावास हे मदुगु देशय् नापं राजदूत नियुक्त याःगु खायात कयाः सभासद्तय्सं विरोध प्रकट याःगु दु। पुलांम्ह मुख्य सचिव भोजराज घिमिरेयात क्यानाडाया राजदूत नियुक्त यायेगु धकाः सरकारं याःगु निर्णय खःसा क्यानाडाय् नेपाःया दूतावास हे मदुगु खा पिहां वयेवं सभासद्तय्सं थ्व विरोध प्रकट याःगु खः ।

नेपालं छु छु देशय् थःपिनि दूतावास चायेकातःगु दु व गन गन मदु धइगु खाया सामान्य जानकारी तक हे मतसे याःगु थज्याःगु निर्णयं नेपाःयात अन्तर्राष्ट्रिय रुपं हे बदनाम याना बिउगु दु। स्वयम् थःगु देशया बारे हे बांलाक जानकारी मदुपिं मनूत देशया प्रधानमन्त्री मन्त्री जुयाच्वंगु थ्व ति तःधंगु विडम्बना मेगु छु जुइ फइ? थज्याःपिं नालायक मन्त्रीतय् बथानं देशया भिं जुइगु छुं ज्या याइ धकाः कल्पना तक यायेगु नं हास्यास्पद जुइ ।

मुख्य सचिव थेंज्याःगु पदय् थ्यनेधुंकूम्ह घिमिरे भाजुं नं नेपाःया दूतावास हे मदुगु देशय् थःत राजदूत नियुक्त यातं नं उकिया सहर्ष स्वीकार याःगु देय्या प्रशासनयन्त्रया मेगु हास्यास्पद पक्ष खः। वय्कलं धाथें न्हापा गय् यानाः नेपाःया कर्मचारी प्रशासन सञ्चालन यानाच्वन थ्व नं मेगु रहस्यया विषय जूगु दु ।

थ्व प्रकरणं थुलि खा स्पष्ट याःगु दु कि नेपालय् देश चले याये धकाः वयाच्वंपिं राजनीतिक नेतात थ्व देशया धाथेंयापिं सेवक मखु। थुपिं देशयात त्यात्या यानाः नइपिं हिंस्रक परजीवी जक खः। थज्याःपिं नेतातपाखें शासित जुइमाःगु नेपाली जनताया दुर्भाग्य खः। थुकिं देशय् वःगु हिउपाःयात विफल नं याना बीफु ।

More Stories Like this