सत्ताया निंतिं न्ह्यागुं याइपिं

कृष्ण प्रजापति

हाकनं छक्वः माओवादीं आन्दोलन घोषणा याःगु दु। राष्ट्रपतिया असंवैधानिक पलाः भिंकेगु व नागरिक सर्वोच्चता कायम यायेगु धाःसांतबि भाद्र तकया दुने थःपिनि सरकार दयेकेगु कासाय् केन्द्रित जुयाः थ्व आन्दोलन न्ह्यानाच्वंगु खः धइगु द्वपं दु। डा. बाबुराम भट्टराईया संयोजकत्वय् संघर्ष समिति नीस्वने धुनेवं हे माओवादीं राष्ट्रिय सरकारया माग यायेधुंकूगु दु। व नं थःगु हे नेतृत्वय्। छुं अवधि प्रतिपक्षीइ च्वनेवं हे माओवादीं थःपिं हाकनं सरकारय् वयेगु संकेत बिउगु दु। सरकारय् संलग्न व समर्थन यानाच्वंगु नीनिगू दल नापं नागरिक समाजया भावना अःखः माओवादीं बन्द, हडताल व तोडफोड याये मखु धाःसां खम्बुवान, लिम्बुवान लगायत जातीय राज्यया माग यानाः माओवादीयात समर्थन यानाच्वंगु राजनीतिक शक्तितय्सं हे सशस्त्र आन्दोलन न्ह्याका हयेवं धाःसा सरकारयात तःधंगु दवाव लाःवंगु दु ।

माओवादीं थुकियात स्वंगूगु जनआन्दोलनया नां नं बिउगु दु। यदि स्वंगूगु जनआन्दोलनया नां बिउ थें थुगु आन्दोलनया लक्ष्य देशय् समातामुलक समाज निर्माण यायेगु वा समाजवादी क्रान्ति पूवंकेगु जूसा पाय्छि नं खः। तर थुगु आन्दोलनया नाराय् न थःपिं न्हूगु समाज सिर्जना यायेत न्ह्यचिलेगु धइगु दु, न त ब्यवस्था हे परिवर्तन यायेगु खँ दु। छम्ह संवैधानिक निकायया प्रमुखयात कारवाही यायेगु मामलां न्ह्याःगु खिचाल्वापुयात स्वंगूगु जनआन्दोलन धकाः नां बीगु हास्यास्पद ज्या खः। माओवादीया आन्दोलनय् जनतायात सहभागी यायेत जक बेसाःभाः थहां वंगु विरोधय् ल्वायेगु वा मेमेगु जनजीवन नापं सतीगु आधारभूत मागत न्ह्यथनातःगु खनेदु। वास्तवय् माओवादीया मू माग धइगु त्वःफिनाच्वंगु थःपिनि सत्ता चूलाकेगु हे जक खः। सत्ता प्राप्त यायेगु व पुलांगु हे सत्ताय् वनेगु खःसा थुकियात स्वंगूगु जनआन्दोलन धायेगु पाय्छि मजू। न्हापांगु जनआन्दोलन २०४६ पाखें पंचायती ब्यवस्था पतन जुल। २०५२/५३ या जनआन्दोलनं गणतन्त्र स्थापना जुल। आः स्वंगूगु जनआन्दोलनया लक्ष्य छु खः? माओवादीयात सरकारय् छ्वयेत याइगु आन्दोलनयात हे अथें स्वंगूगु जनआन्दोलन धायेगु ला ?

राजनीति याइपिं नेतातय्क राजनीतिक इमान्दारिता दयेमाः। तर थन सत्ताय् थ्यंकेगु लागिं याइगु हठकण्डायात हे राजनीति धायेगु चलन दु। राजनीतिया मूलभूत लक्ष्य जनताया सेवा खः। तर झीथाय् जुइगु राजनीतिया लक्ष्य मात्रा सत्ता व सत्तां बीगु थीथी कथंया सुख सुविधा जुयाच्वंगु दु। छगू ल्याखं धायेगु खःसा बेइमानी हे नेपाःया राजनीति खः। पार्टी इमान्दार जूसा हे जक देश व जनतां सुख सी। पद व ध्यबाया लागिं जक ज्या यायेगु खःसा जागिर नःसां जिल, ब्यापार व्यवसाय याःसां जिल। तर नेपाःया नेतातय्सं राजनीतियात हे जागीर व व्यापार दयेकाः नयाच्वंगु दु गुगु छतिं नं पाय्छि मजू। राजनीतिक इमान्दारीता दुगु खःसा मन्त्री, प्रधानमन्त्री व सुं नं विदेशीया न्ह्यःने राजनीतिक कार्यकर्तातय्सं झुके जुइ मालीमखु। यदि तःधंगु राजनीतिक पार्टी हे जूसां थःपिसं गल्तीयात वा तःधंगु हे बांमलाःगु ज्यायात धाःसा उकिं राजनीतिक कार्यकर्तातय्गु नं मान हानी जुयाबी। राजनीतिक नेतातय्सं ध्यबा दयेवं हे देशयात स्यंकेगु वा देशयात मभिंकेगु कथंया छुं नं ज्या याये मजिउ। भिंगु ज्या याना देश व जनताया सेवा याये मफइगु खःसा वा खाली सत्ताया लागिं वा ध्यबाया लागिं हे जक ज्या यायेगु खःसा जागिर नःसां जिउ वा ब्यापार याना जीवन निर्वाह याःसां जिउ। जनतायात संगठित यानाः देश व जनताया सेवा जुइगु ज्या यायेगु अःपुगु ज्या नं मखु। तर खः थें न्यंक सेवाया भावना ब्वलंकाः जनतायात मखुगु मजिउगु थासय दुफ्वायेगु ज्या राजनीतिक पार्टीतय्सं कदापि याये मजिउ।
थौं भारतीय समर्थन व अमेरिकी इसाराय् देशय् शासन चले जुइगु गलत परिपाटी वःगु दु। थज्याःपिं राजनेतातय्सं देश व जनताया सेवा स्वयां नं थः सत्ताय् च्वना हे च्वनेगु ह्वःताः चूलाकेगु लागिं विदेशीया गुलामी याइगु सम्भावना दु। अथे जुल धायेवं नेपाली जनतां त्याकाछ्वःपिं सभासद् व मन्त्रीतय्गु न्ह्यपु स्यंगु धायेगु स्वयां मेगु छु धायेफइ? राजनेता हे खराब जूसा देश व जनतां दुःख सी। थौं भारतीय निर्देशनय् देशय् मन्त्री प्रधानमन्त्री जुइपिंसं कन्हय् वनाः पश्चाताप नं चाये मालेफु। पदय् च्वनाः गल्तीयात धाःसा कन्हय् भारतं नं नेपाली नेतातय्त धोखा बीफु। उगु इलय् नेपाली नेतातय्सं जक मखु कि देशं हे तःधंगु दुर्गति भोगे याये मालेफु। आन्दोलन यायेगु जनतायात न्ह्याबलेंया लागिं जागरुक याना तयेगु नियमित ज्या खः। तर आन्दोलनया नामय् ज्या लगे मजूगु कथंया आन्दोलन यानाः जनतायात म्वाः मदुगु थासय् दुफ्वायेगु ज्या नं राजनीतिक पार्टीतय्सं याये मजिउ ।

म्वाः मदुगु आन्दोलन यानाच्वनेगु खःसा देश झन कमजोर जूवनेफु। उलि जक मखु कि देशय् इमान्दार नेतातय्गु अभावय् कन्हय् चीन व भारत थेंज्याःगु तःधंगु देशं हमला हे जुल धाःसां नं नेपाली जनता उकिया विरोधय् प्रतिकार यायेगु शक्ति दुपिं सचेत जनता कथं तयार मजुइफु। पार्टी सिद्धान्त व राजनीतिक आदर्श धइगु थःगु परिवार व थःथिति स्वयां तसकं हे तःधंगु चीज खः। अथे जुयाः नं न्हापां देश व जनताया सेवा याइपिं इमान्दार नेतात थ्व देशयात मालाच्वंगु दु। अथे जूसा हे जक थ्व गणतान्त्रिक धाःगु देशय् न्हूगु परिवर्तन वयाः जनतां सुखपूर्वक सासः ल्हायेगु ह्वःताः चूलाइ। मखुत धाःसा म्हिगः छम्ह शासकया विरोधय् ल्वायेमाःपिं झी नेपाली जनता हाकनं मेपिं शासकत नापं ल्वानाः थःगु अधिकार सुरक्षाया लागिं संघर्ष यायेत नं तयार जुयाच्वने मालेफु। थुगु संविधानसभां न्हूगु संविधान हे दयेके मबीगु कथंया आन्दोलन याये त्यनागु खँ माओवादीया नेता प्रकाशं धाये धुंकूगु थ्व इलय् म्हिगः जंगलय् च्वंगु इलय् थें हे अराजकतापूर्ण आन्दोलन जक जुयाः देश व जनतायात झन जक अधोगतिइ यंकीगु खःला धइगु नं सम्भावना जुयाच्वंगु दु। उकिं सत्ता प्राप्तिया लागिं जक जुइगु आन्दोलनयात उचित आन्दोलन कथं विकास यानाः अराजकता ब्वलंकेगु स्वयां राष्ट्रिय सरकार हे नीस्वनेगु आन्दोलन खःसां उकियात फुक्कं पार्टीयात नाला वनेफइगु आन्दोलन कथं विकास यायेमाः ।

More Stories Like this