मंकाः ब्वज्याय् खनेदुगु चहपह

नेपालभाषा मंकाः खलःपाखें दँय्दसं थें थुगुसी नं चेम्बर भवन जमलय् मंकाः ब्वज्या जुल। वंगु श्रावण २१ गतेनिसें न्यान्हु तक थुगु ब्वज्या जूगु खः। ब्वज्याया उलेज्याय् हे तथ्यांक विभागया महानिर्देशक उत्तमनारायण मल्लं जनगणना दुने दुवालाः तयार यानातःगु विनोद साय्मिया न्हूगु सफू 'नेवाः तथ्यांक व नेपालमण्डल लागा' नांगु सफू विमोचन यानादीगु खः। नापं उगु हे ज्याझ्वलय् 'स्वनिगःया संस्कृति' नांगु रास जोशीया सफू नेवाः न्ह्यलुवा पद्मरत्न तुलाधरं विमोचन यानादिल। मुक्कं नेपालभाषाया जक सफू, नेपालभाषाया हे सीडि भिसिडी व क्यासेटचा सहुलियत दरं अन मियेज्या व ब्वज्या न्ह्यानाच्वंगु खः। न्हिया न्हिथं सुथय् १० बजे हे निःशुल्क प्रवेशया बन्दोबस्त यानातःसां न्हापा न्हापा स्वयां अन अप्वः हे स्वकुमित उगु ब्वज्या स्वयेत वःगु खनेदत। म्होति नं अन १० प्रतिशतनिसें बच्छि बच्छि मू तयाः ब्वयातःगु सामग्रीया मियेज्या जुयाच्वंगु खः। पुलां पुलांगु सफू व सीडित ला ५० प्रतिशत तकं छुट बिया मियातःगु खः। थथे सफू व सीडिलिसें अन सिद्धिदास महाजुया किपा, सिद्धिचरण श्रेष्ठया किपा, नेपालभाषाया थीथी क्यालेण्डर नापं चित्तधर 'हृदय'या किपा नं ब्वयेगु व मीगु ज्या जुयाच्वंगु खः ।

नेपालभाषाया छगू ज्वःमदुगु ब्वज्या कथं थन थीथी इलय् पिथंगु नेपालभाषाया म्येचा, सीडि, भीसिडी नापं अडियो रेकर्डिङ्गत नं ब्वयातःगु खः। छगू ल्याखं नेवाःत गुलि बैभव धइगु क्यनेत नं थ्व ब्वज्यां गाक्कं ग्वाहालि यानाच्वंगु खनेदु। दुहां वने कथं हे नेपालभाषाया पुलां पुलांगु सफूत ब्वयातःगुलिं यानाः नेवाः समाजय् साहित्य व कलाया स्थान उच्च दर्जाय् दु धइगु क्यनाच्वंगु दु। थुगुसी न्हापा स्वया नं अप्वः स्वकुमितय्सं ब्वज्याया अवलोकन याःगु खः। न्हापांगु दिनय् हे द्वलंद्वया ल्याखय् नेवाः व गैर नेवाःतय्सं उगु ब्वज्याया अवलोकन याःगु खः। नापं ब्वज्यायात अनुकरण यानाः थीथी म्येचाः, सफू व भिसीडीत नं न्याना यंकूगु खः। थथे स्वयेगु इलय् ब्यापारया लागिं स्वया नं प्रचार प्रसारया लागिं नं नेपालभाषा मंकाः खलः थेंज्याःगु पुलां पुलांगु संस्थां हे थज्याःगु ज्याझ्वःत याना च्वनेमाःगु खनेदु। आःयात न्यान्हुया लागिं जूसां थुगु ब्वज्यां नेवाः समाजया न्हाय्कं ब्वयेगु ज्या जूगु थें तायेकेमाः। कन्हय् वनाः थुगु ब्वज्या विकसित जुया वन धाःसा थ्व चिब्यागु चेम्बर भवनं पिने नं वने मालिगु ग्वसाः खलःया अनुमान दु। शुक्रवाः जूगु उलेज्या समारोहय् अज्याःगु हे भचा मछिं मचाः कथं कातुमतु काक च्वनेमाःगु अवस्था पिहांवल ।

नेपाल संवतया प्रवर्तक शंखधर साख्वाःया नीन्यातका व पीतका वंगु चाया निताजि कथंया मूर्ति नं मियातःगु उगु ब्वज्याय् न्हापा न्हापा स्वयां अप्वः स्वकुमित वःगु खँ पेज ३ या सम्पादक दर्शनवीर शाक्यं 'सन्ध्या टाइम्स'यात कनादिल। अन गुलि नं स्वकुमित वःगु खः उगु ज्याझ्वःयात च्वछाया हे वंगु खनेदत। फुसा थ्व ज्याझ्वः थ्व स्वयां भचा तब्यागु थासय् यानाः थप आकर्षण याये कथं थीथी म्ये, हुलाप्याखं वा जानकारीमुलक ज्याझ्वःत याना क्यनेमाःगु खः, गथे छगू इलय् कवि दुर्गालालया जीवनी व वय्कःया जीवन गाथा नं फुक्कं थुगु ज्याझ्वलय् पिज्वःगु खः ।

More Stories Like this