छाय् उसि चायेगु?

प्रा. नर्मदेश्वर प्रधान

फ्युजन। अंग्रेजी खँग्वः। मिश्रण। क्वाति। थ्वया अर्थ। संगीतय् फ्युजनया खँ वः। लोकसंगीत। आधुनिक संगीत। मिश्रण जू। पश्चिमी धून। पूर्वीय लय्। थुमि दथुइ मिलन। थीथी देय्या बिस्कं प्रकारया संगीतया ल्वाकःबुकः। सांगीतिक फ्युजन जुया बी। संगीतय् जक मखु। थौं कन्हय् फुक्क ख्यलय् फ्युजनं प्रभाव याइ। नयेगु। त्वनेगु। पुनेगु। नखःचखः। नृत्य। राजनीति। संस्कृति। समाजशास्त्र। फ्युजनया प्रभाव फुक्क ख्यलय् तीव्र जुइ। तिक्ष्ण खनेदइ। लांमरु तताजु। लुमना वइ। वया काय म्हाय् तःधिक जुया वइ। जिजाभाजु स्वइ। भौ माली। वं न्ह्याबलें धयाच्वनी 'क्वें छकू शुद्ध जुइमाः। मेगु धयागु थथे हे खः। थः थःगु भाग्यया खेल।' क्वें सुया शुद्ध। सुया अशुद्ध। सुनां धायेफु? तर लांमरु तताजुया थःगु हे मापदण्ड दइ। मान्यता दइ। जिद्दि दइ। (जात थःगु स्तरया जुइमाः। शुद्ध। ल्वाकःबुकः जुइ मजिउ। वया आग्रह जुइ। लांमरु तताजुं मस्तय् ज्या उकथं हे याइ। मेगु खँत फुक्क गौण तायेकी। क्वें छकू शुद्ध। वया प्राथमिकता जुइ। थ्व हे वया सुत्र। थुकिइ व अडिग जुइ। जिजाभाजु माली। भौ ल्यइ। व सफल जुइ। व गर्व तायेकी। तर ई हिली। समाजय् फ्युजनं प्रवेश याइ। लांमरु तताजुया काय छ्य। वं गुरुङ्गनी हइ। वया म्ह्याय् छ्य मिम लिना वनी। अन्तरजातीय विवाह। फ्युजन। वैगु कूलय् वइ। थीथी जातजाति दथुइ विवाह थौं प्रचलनय् वइ। क्वें छकू शुद्धम्ह। लांमरु तताजुया मान्यता। थौं क्वपुलांगु राग जुइ। समाजय् जातिगत मिश्रणं थाय् कयाः हइ ।

नयेगु, पुनेगु ख्यः। फुक्कय् फ्युजनया छ्याप छ्याप्ती प्रभाव लाइ। थ्व मिसाया वसः। थ्व मिजंया। थज्याःगु तिसा मिसातय्सं जक ती। थ्व विशुद्ध मिसातय् श्रृंगार। न्हापा लिपा। लक्ष्मण रेखा दइ। अफ्रिकाय् छगू देय् दु। मिजनं मिसाया, मिसां मिजंया वसः पुने मदु अन। थ्व नियम पालन मयाःपिंत ज्वनी, कुनी। कठोर दण्ड बी। छगू मुस्मां देय्। ल्यासेम्ह मय्जुं पाइन्ट न्ह्याइ। कानुनं वयात त्वःती मखु। व अपराधी जुइ। पहिरनया विशुद्धताया खँ हइ। वकालत जुइ। कानुन थःगु मान्यताय् जवरजस्त जुइ। रुढ परम्परागत समाज। फ्युजन थन निषेधित जुइ ।

फ्युजन। क्वाःघासा। क्वाःघासा संस्कृति। गुलिखें देशय् विकास जुइ। मिसां पाइन्ट न्ह्याइ। कोट फिइ। टप सुइ। मिजंतय्सं गन्जी फिइ। मिसातय्सं ब्रेसियर। थौं थ्व पुलांगु मान्यता जुइ। पहिरनय् फ्युजन वइ। मिजंतय्गु निंतिं ब्रेसियर। विज्ञापन जुइ। मिजंतय्सं ब्रेसियर फिइ। वसःया ढांचाय् जातीय, लैङ्किक, देशीय, विदेशी मिश्रण खनेदइ। विशुद्धता, पृथकताया धारणा विघटन जुइ ।

न्हू दँ न्यायेकी। नव वर्ष माने याइ। न्यू इयरय् मस्ती जुइ। जन्मन्हि वइ। सुकुन्दा च्याकी। पुजा याइ। केक ताइ। मैन मत स्याइ। भ्यालेन्टाइन डे। प्रेम-प्रेमिकातय् दिवस। ल्याय्म्ह ल्यासेतय् दथुइ गुलाव आदान प्रदान जुइ। अप्रिलफूल। ख्याः याना न्ह्याइपुकीपिं नं दइ थन। गुंपुन्हि वइ। ख्यालःया उत्सव मानये याइ। ई थौं छगू संस्कृतिइ जक सिमित जुइ मखु। संस्कृति फ्युजनं त्वपुया हइ ।

माओवादी क्रान्तिकारी पार्टी। क्रान्तिं हे जक हिउपाः सम्भव जुइ। थ्वया अथक विश्वास जुइ। थ्व विश्वासं क्रान्ति याइ। युद्ध न्ह्याकी। युद्धयात तार्किक निष्कर्षय् थ्यंकीगु आज्जु काइ। शान्ति वार्ता जुइ। सम्झौता याइ। शान्ति तार्किक निष्कर्षय् हयेगु खँ वइ। क्रान्ति व शान्ति दथुइ फ्युजन जुइ। राजनीतिक मिश्रण। कक्टेल। क्रान्ति व शान्तिया मिलन। मिजंम्हं ब्रेसियर फिनाच्वंगु। दृश्य लुमनी। मतिइ लुइ। थ्व जिउ, व मजिउ। खँ जुइ मखु। फ्युजनय्। जा लिसे केक नये जिउ। धौबजि लिसे पुलाउ स्यायेगु जिउ। फ्युजन शास्त्रं धाइ।
उखुन्हु छपाः किपा खना। नांजाःगु पत्रिकाय्। डाक्टर बाबुराम भट्टराई व मय्जु हिसिला। जरी दुगु सितुमाः। निम्हेसिनं क्वखाया तइ। किपा स्वये। मतिइ लुइ। स्वयंम्वरया थें च्वं। सायद इहिपाया न्यय्दँ बुन्हि न्यायेकू ला? मखु मखु। गनं न्यय्दँ दइ वय्कःपिनि इहिपा। ल्यासे ल्याय्म्ह तिनि। न्ह्यपु थासय् हये। टि.भी.इ वहे दृश्य खनी। छगू ज्याझ्वः। अस्पतालया लागि छम्ह धार्मिक पण्डितं ध्यबा संकलन याना बिउगु। करौडौं मुंका बी। ध्यबा लःल्हाःगु जुयाच्वन डा. बाबुराम भट्टराईयात। ज्याझ्वलय् डा. भट्टराईजुं न्वंवाइ। छुं अंश जिं न्यना। 'जिपिं धर्म विरोधी मखु। धर्मया सामन्तीया प्रयोगया विरोधी जक खः।' न्यना। मतिइ लुइ। मार्क्स दर्शनय् नं फ्युजन प्रवेश जुल। जि मार्क्सवादया सामान्य पाठक। विद्यार्थी। जिगु पठन रुढ जुल ला मसिउ। मार्क्स भौतिकवादी। वं धर्म माने मयाः। धर्मयात अफिम धाइ। जिं सिउगु विशुद्ध मार्क्सवादया खँ थ्व हे जुइ। धाइ। थौं फ्युजनया ई। गुगुं खँय् विशुद्धताया खँ ल्हाये मजिउ। अव्यवहारिक जुइ। असफल जुइ। जिं थुइके मार्क्सवाद व धर्म दथुया फ्युजन। न्हूगु ज्ञां जुइ। जिं काये ।

१७ शदी। छथ्वः कवि दु। अंग्रेजी साहित्य। उमित मेटाफिजिकल कवि धाइ। उमिसं धाइ। ''असम्बन्धित वस्तुत, खँत दथुइ, स्वापू स्वनी। समानता श्रृजना याइ। अजूचाइपुगु बिम्ब निर्माण याइ। कुशल कविपिंसं। मौलिकता, श्रृजनशीलताया प्रतिक जुइ। व अभूतपूर्व बिम्ब श्रृजना। डा. बाबुराम भट्टाराईजुया मार्क्सदर्शन व धर्मया फ्युजन। मिश्रण। मेटाफिजिकल कवितय्सं न्ह्यब्वइगु अजुचाइपुगु बिम्ब थें ताइ। राजनीति व धर्म दथुइ लूगु फ्युजनया बिम्ब। नवीन अनुभूति। न्हूगु प्रयोग।
थौंकन्हय्। साहित्यय् नं युजनया हालिमुलि जुइ। बाखं थथे हे जुइ। कविता अथे जुइ। निबन्ध अथे जुइमाः। विशुद्ध लक्ष्यणतय् खँ हइ। विधागत शास्त्रं। फ्युजनया युग न्ह्याइ थौं। विधागत मान्यता, परिभाषा शिथिल जुइ। भंग जुइ। कविता बाखं थें जुइफु। बाखं निबन्ध थें। उपन्यास वार्ता थें च्वयेफु। थ्व अथे हे जुइ। व अथे हे जुइ। विशुद्धताया खँ। फुक्क थौं। काल्पनिक जुइ। सम्भव जुइ मखु। अन्तरविधाया खँ वइ। विधागत फ्युजन। प्रचलनय् वइ। क्वाति विधा। बजारय् खने दइ ।

नेपाली भाषाया माध्यमिक युग। मोतिराम भट्ट प्रमुख कवि। उबलय् क्वाति कविता रचना जू। नेवाः भाय्, नेपाली, हिन्दी, अंग्रेजी थीथी भाय् मिश्रित कविता। भाषिक फ्युजन। भाषिक सहिष्णुताया बिम्ब। भाषिक समावेशी श्रृजना। लिपा। नेपाली भाषाया दबदवा जुइ। मेमेगु भाय् ध्याकुनय् लाइ। क्वाति कविताया रचना दी। कुण्ठित जुइ ।

जैविक विज्ञानं न्हूगु चमत्कार हइ। जैविक फ्युजन। मनू थेज्याःम्ह धुँ। धुँ थेज्याःम्ह छुं। सर्प थेज्याःम्ह किसि। किसि थेज्याःम्ह सल। थीथी पशुपंक्षीया जिन मिश्रण यानाःन्ह्याथे ज्याःम्ह प्राणी दयेके फइ। जेनेटिक इन्जिनियरं धाइ। क्वाति जीव। निर्माण संभव जुइ। मिश्रित प्राणी। सामान्य जुइ। कला, भवन निर्माण, स्थापत्य कला। फुक्क ख्यलय् थौं फ्युजनया हावी जुइ। फ्युजन मेगु अर्थय् क्वाति खः। खिचडी। क्वाःघासा। क्वाति संस्कृति सभ्यतापाखे उन्मूख जुइ थौंया युग। देशय् थौं क्वाति सरकार। छाय् उसि चायेगु। थ्व ईया देन जुइ ।

More Stories Like this