राजदूतावास हे मदुगु देशय् राजदूत सिफारिस

येँ (सन्ध्या टाइम्स)/राजदूतावास हे मदुगु देशय् राजदूत सिफारिस याःगु धासें संसदीय सुनवाई समितिया सभासद्तय्सं आपत्ति प्वंकेवं थौं जुयाच्वंगु राजदूततय् सुनुवाई ज्या हे स्थगित जूगु दु। राजदूतावास हे मदुगु देशय् राजदूत सिफारिस याःगु बारे समितिं सरकारयाके जानकारी कायेगु निर्णय नं याःगु दु ।

सरकारं आः नकतिनि क्यानाडाया निंतिं पुलांम्ह मुख्य सचिव भोजराज घिमिरेयात राजदूत नियुक्त याःगु खः। तर क्यानाडाय् धाःसा आः तक नेपाःया राजदूतावास हे चायेकूगु मदुनि। दूतावास हे मदुगु देशय् राजदूत नियुक्त याःगु खँ सीवं सभासद्तय्सं थ्व विरोध याःगु खः। थ्व बारे पूरा विवरण कयाः जक कारवाही न्ह्याकेगु कथं आः थ्वहे वइगु श्रावण २८ गते तकया निंतिं सुनुवाई ज्याझ्वः हे स्थगित याःगु खः।
क्यानाडाय् नेपाःया राजदूतावास मदुगुलिं अनया फुक्कं ज्या अमेरिकाय् च्वंगु नेपाली दूतावासं हे स्वयेगु याना वयाच्वंगु खः ।

क्यानाडाया निंतिं राजदूत सिफारिस जूम्ह घिमिरेया विरुद्ध निगू उजुरी लानाच्वंगु दु। वय्कः विरुद्ध लाःगु उजुरीइ वय्कलं मुख्य सचिव जुयाच्वंगु इलय् कर्मचारीतन्त्र अस्तव्यस्त याःगु व प्रशासनिक सुधारया ज्याय् ध्यान मबिउगु द्वपं बियातःगु दु ।

तर वय्कःयात ला दूतावास हे मदुगु देशय् राजदूत सिफारिस याःगु खँ पिहां वयेवं वय्कःयात लानाच्वंगु उजुरी सिबें नं सरकारं छु छु देशय् थःपिनि राजदूत दु मदु धइगु हे मसीक थपाय्धंगु गल्ती गय् यानाः यात धइगु खँय् बैठक केन्द्रित जूवंगु खः ।

लिसें समितिपाखें नियुक्तिया निंतिं सिफारिस याये मते धकाः निर्देशन बियातःपिं मनूतय्त हे सरकारं राजदूत पदय् सिफारिस याना हल धकाः नं बैठकय् वःपिं सभासद्तय्सं आक्रोश प्वंकूगु दु ।

थौंया सुनुवाई समितिइ क्यानाडाया निंतिं घिमिरे व श्रीलंकाया निंतिं पुलांम्ह सभासद् सुशीलचन्द्र अमात्यया बारे सुनुवाई जुइमाःगु खः। अमात्य संविधानसभाय् माधव नेपालयात सीट त्वःता बिउम्ह पुलांम्ह सभासद् खः ।