गुथि संस्थानया विकल्पय् कोष

नेपाः दुनेया जात्रा पर्व धइगु हे खास यानाः नेवाःतय्गु जात्रा पर्व खः। तर थ्व जात्रा पर्व सञ्चालनया जिम्मा कयातःगु गुथि संस्थानं गुथिया जग्गा हिनामिना यायेगु बाहेक गुथि व गुथिपाखें सञ्चालन यायेमाःगु जात्रा पर्व सञ्चालनय् पटक्क हे ध्यान मतःगु खँयात कयाः यक्व न्ह्यवंनिसें हे असन्तोष प्वंकेगु ज्या जुया वयाच्वंगु खःसां थगुनेया यँयाः जात्राय् धाःसा उकियात आन्दोलनया रुपय् हे प्रकट यात। उगु आन्दोलन लिपा सरकार लिसे जूगु वार्तां गठन याःगु उच्चस्तरीय अध्ययन समितिं आः नकतिनि थःपिंसं तयार याःगु सुझाव प्रतिवेदन बारे राष्ट्रिय सम्मेलन हे यासें नेवाःतय् जात्रा पर्व सञ्चालन यायेगु लागिं गुथि संस्थानया विकल्पय् मेगु निकायया प्रस्ताव सिफारिस याःगु दु। उगु समितिं न्ह्यब्वःगु प्रतिवेदनय् आः नेवाःतय् जात्रा पर्व न्ह्याकेत गुथि संस्थानया पलेसा नेवाःतय् संस्कृति सम्पदा संरक्षण व विकास कोष धकाः छगू बिस्कं निकायया प्रस्ताव न्ह्यःने हःगु दु। गुथि संस्थानं नेवाःतय् जात्रा पर्वयात चित्त बुझे जुइक न्ह्याके फइ मखु धइगु सिद्ध जुइधुंकल। उकिं गुमिसं जात्रा पर्व सञ्चालन याइगु खः, वहे निकायया प्रतिनिधित च्वनाः थ्व कोष गठन यायेगु व थुकिं हे जात्रा पर्व सञ्चालनया जिम्मा कायेगु धइगु प्रस्ताव समितिया खः। समितिं याकनं हे थ्व प्रस्ताव सरकारयात लः नं ल्हाइ तिनि। उगु कोष धइगु छगू बिस्कं ऐनपाखें सञ्चालित जुइ। आः नेवाःतय्सं उगु ऐन दयेकाः सदनय् निजी क्षेत्रया ऐन कथं दर्ता यायेगु व पारित यायेत सरकारयात दवाव बीगु प्रस्ताव वःगु दु। संस्कृति संरक्षणया लागिं आः नेवाःतय्सं थ्वहे ऐन व कोष व्यवस्था या धकाः राज्ययात दवाव बी माःगु आवश्यकता दु ।

More Stories Like this