लिटिल नेवाः ज्याझ्वलं नेवाः भाय् ल्हाये सल

सुनिता मानन्धर

थौं स्वयां निदँ न्ह्यः च्यादँ दुम्ह छम्ह नच्चाम्ह मचां मिस लिटिल नेवाः ज्याझ्वलय् ब्वति काः वल। हिसिचा दुम्ह नच्चाम्ह मचां ज्याझ्वलय् ब्वति काःवःगुलिं सकलें अजू चाल। सकसिनं वयात स्वयाः माया नं यात। ज्याझ्वःया अन्तिम न्हि कुन्हु वं धेंधेंबल्लाःया फर्स्ट रनरअपया ताज नं त्याकल। अबलय् फर्स्ट रनरअप जूम्ह मचा श्रीषा ताम्राकार।
श्रीषा ताम्राकार आः झिदँ दत। श्रीषा मचांनिसें चकचके जुयाः छालय् ग्यः। वयाके मछाः पहः मदु। मिस लिटिल नेवाः ज्याझ्वलय् ब्वति काःगु इलय् न्हियान्हिथं बहनी न्याताः इलंनिसें न्हय्ताः ई तक ट्रेनिङ जुइ। बहनी प्यताःत्या इलय् स्कूलं लिहां वयाखतं ट्रेनिङ्गय् वनेमाः। गबलें हे ट्रेनिङ्गय् वने म्हाः मधाः। न्हियान्हिथं ठमेलया जिएए हलय् थ्यंकः वनी। अथे जूसां वया होमवर्क याये मलाः नं गबलें मजू। धाइ, 'जि ट्रेनिङ्गं लिहां वयाः भचा आराम याये। अनं लिपा निघौ होमवर्क याये। छुं थाकु मजू ।'

मिस लिटिल नेवाः ज्याझ्वलय् त्याकूगु फर्स्ट रनरअपया उपाधि हे श्रीषाया जीवनय् त्याकूगु न्हापांगु पदक खः। न्हापांनिसें महत्वाकांक्षी जूसां थुगु ज्याझ्वलं वयागु आत्मविश्वासयात धाःसा झन अप्वयेका बिउगु दु। चिनाखँ च्वयेगु, बाखं सफू ब्वनेगु व प्याखं हुलेगु श्रीषाया शोख खः। धाइ, 'मिस लिटिल नेवालय् पदक त्याकेधुंकाः जिं चिनाखँ च्वयेगु व हुला प्याखनय् नं न्हाप सिरपाः त्याका ।'

व नेवाः भाय् बांलाक मसः। थः अजि व ततापिं नापं जक श्रीषां नेवाः भासं खँ ल्हाइ। 'जिं नेवाः भाय् ल्हायेबलय् भाय् वः। शुद्ध मजू धकाः जितः गिजे नं याइ। उकिं नेवाः भासं खँल्हाये ग्याः। न्हापांनिसें नेवाः भाय् स्यनातःसा जिउगु खः। तर मिस लिटिल नेवाः ज्याझ्वलय् ब्वति कायेधुंकाः धाःसा जि न्हापा स्वयां यक्व हे नेवाः भाय् सया वःगु दु' भाय्या विषयय् श्रीषाया अनुभव खः थ्व ।

उमेर म्होचा तिनिसां टेलिभिजन स्वस्वं थम्हं हे डान्स कम्पोज यायेसः वं। धाइ, 'जिं नेवाः डान्स थःम्हं कम्पोज यानाः स्कूलय् प्याखं नं हुलेधुन।' उकी नं वं न्हाप हे सिरपाः त्याकूगु जुयाच्वन ।

थौंकन्हय् धाःसा वं न्ह्याम्हनाप नं निर्धक्क जुयाः खँ ल्हायेफु। वयाके छुं कथंया ग्याःचिकु धइगु नं मदु। न्ह्यागु ज्या नं जिं यायेफु धइगु आत्मविश्वास दु। मिस लिटिल नेवाः धुंकाः मेमेगु नं आपालं ज्याझ्वलय् ब्वति कायेधुंकूगु दु। अले ब्वति काःकथं न्ह्याबलें न्हाप सिरपाः नं त्याकी।
भविष्यय् वनाः छम्ह सफल ड्रेस डिजायनर जुइगु श्रीषाया आज्जु दु ।

More Stories Like this