न्हू जुयाः पिलू वयेत्यंगु यंगाःहिति

येँ महानगरपालिका २१ वडाया यंगाःहिति सुयां ध्यान मवनाः अथें लानाच्वंगु सम्पदा खः। कोलिग्रामया इलय् हे निर्माण जुयाच्वंगु धयातःगु थ्व कलात्मक ल्वहंहितिया स्वपुं हितिं आः तक नं उलि हे लः हायाच्वंगु दनि। थुगु हितिइ ताः ई तक ध्यान मवनेवं स्थानीय मनूतय्सं निजी नं यायेगु नं शुरु यायेधुंकूगु खः। तर देशय् लोकतन्त्र व गणतन्त्रया बहाली नाप नापं नेवाः राष्ट्रिय मुक्ति मोर्चां व्यक्तिगत यानातःपिंत हाथ्या हे बियाः अन तालं ग्वयातःगु ताःफ्वः स्यंकाः कम्पाउण्डय् दुहां वनाः हितियात निजीपाखे सार्वजनिक याना काल। लिपा उगु हितियात छगू सार्वजनिक ज्याझ्वः हे यानाः स्थानीय नेतृत्वयात लःल्हाना बिउगु खः ।

आः उगु हिति नेवाः राष्ट्रिय मुक्ति मोर्चाया नं कब्जाय् मखये धुंकल। उकिं हे अन उगु हितियात जीर्णोद्धार यायेगु निंतिं स्थानीय मनूत हे लगे जुयाच्वंगु दु। यंगाः क्लबया नेतृत्वय् अन अष्टमुनि गुभाजुया संयोजकत्वय् झिंछम्ह दुजः दुगु संरक्षण समिति नीस्वनाः ज्या न्ह्याकूगु खः। उकियात हे आः वयाः उपभोक्ता समितिइ हिलाः ज्या सञ्चालन जुयाच्वंगु दु।
छुं न्हि न्ह्यः उगु हितिया जीर्णोद्धार यायेगु निंतिं ठेक्का बीत टेण्डर आह्वान याःगु खः। उपभोक्ता समितिपाखें ज्या न्ह्याके फइगु स्थिति मखनेवं नगर स्तरीय ज्या न्ह्याकेमाःगु जुयाः स्वीन्यान्हुया म्याद तयाः अन टेण्डर आह्वान याःगु खः ।

ठेकेदारं ठेक्का कयाः हे ज्या न्ह्याकीगु निश्चित जुइधुंकूगुलिं आः संरक्षण समितिया ज्या धइगु निरीक्षण यायेगु हे जक खः। अझ अन उगु ज्या शुरु जूगु सीवं स्थानीय चुकयापिं मनूत जानाः धर्मराज शाक्यया नामं नगरपालिकाय् वनाः उपभोक्ता समिति दयेकातःगु खँ नं पिहांवःगु दु। तर थुपिं फुक्कंयात हाचां गायाः बाःछि दुने हे ज्या न्ह्याकीगु कथं योजना तयार जुयाच्वंगु दु। अन आःया लागिं झिंप्यंगू लाखया बजेट फ्यानाः इन्जिनियर दिपेश श्रेष्ठं नक्सा व योजना तयार यानादीगु खँ नेवाः राष्ट्रिय मुक्ति मोर्चाया उमेश स्थापितं 'सन्ध्या टाइम्स'यात कनादिल ।

येँ महानगरपालिका सम्पदा विभागं जीर्णोद्धार ज्या न्ह्याकेत्यंगु खः। थ्व लागा छगू ऐतिहासिक व सम्पदां भय् बिउगु थाय् जूगुलिं यानाः नं थन चांन्हि हे प्रहरी पाः नं च्वनाच्वंगु दु। छुं ई प्रहरी बल मगात धकाः चांन्हि च्वनेगु मयाःगु इलय् छक्वलं हे गुंगू कलात्मक मूर्ति खुयायन। अन झिंप्यंगू मूर्ति दुगुली वयां लिपा न्यागू मूर्ति जक ल्यं दुगु खः। आः उगु मूर्तियात नं सुरक्षाया लागिं पुरातत्व विभागं यंकातःगु दु। स्वपुं हिति हायाच्वंगु दुसा अन लः जायाः पुखू थें जुयाच्वंगु दु। आः अज्याःगु थासय् निकासया बन्दोबस्त यानाः लिउनेया अंग बांलाकेगु व हिति गाः व्यवस्थित यायेगु जक स्वयाच्वंगु खः। रामदेव धाःम्ह स्थानीय मनुखं थःगु नामय् पूर्जा दयेकाः थःपिं अलग्ग च्वंगु इलय् उगु स्वपु हिति मध्ये बछि बछि यानाः इनेगु निंतिं तकं निगू कित्ता काट याना तयेधुंकूगु यंगाः हितियात नेवाः राष्ट्रिय मुक्ति मोर्चां कब्जाय् कयाःलि कानुनी रुपं नं थ्व सार्वजनिक खः धकाः भ्वं दयेकाः कानुनी प्रक्रिया नं पूवंकेधुंकूगु दु। आः छु जुइ फुक्कं नगरपालिका अन्तर्गत हे जुइ ।

More Stories Like this