थौं आदिवासी दिवस जनजातितय् जुलुस व सभा

येँ (सन्ध्या टाइम्स)/झिंन्याक्वःगु विश्व आदिवासी दिवस थौं नेपालय् नं थीथी ज्याझ्वः यानाः हनाच्वंगु दु ।

थ्व झ्वलय् नेपाल आदिवासी जनजाति महासंघया ग्वसालय् थनया रत्नपार्कय् वृहत आमसभा जुयाच्वंगु दु ।
झिंन्याक्वःगु विश्व आदिवासी दिवसया लसताय् थीथी झिंन्यागू हे थासं झाँकी सहित जुलुस पिहां वयाः रत्नपार्कय् सभा जूगु खः ।

नेवाः देय् दबुलिं थनया बसन्तपुलिं जुलुस पिकाःगु खःसा मेगु थीथी आदिवासी जनजातितय्सं थीथी थासं हे जुलुस पिकयाः रत्नपार्कय् मू वंगु खः ।

नेपाल आदिवासी जनजाति महासंघं थुगुसीया आदिवासी दिवसयात आन्दोलनया रुपय् हनेगु निर्णय याःगु खः।
अथे हे थौं संविधानसभाय् दुथ्याःपिं आदिवासी सभासद्तय्सं नं सिंहदरवारं बिस्कं जुलुस पिकाःगु खः। संविधानसभाय् दुथ्यानाच्वंपिं २१९ म्ह आदिवासी जनजाति सभासद्तय्सं थ्व जुलुस पिकाःगु खः ।

न्हू च्वयेत्यंगु संविधानय् आदिवासी जनजातिया अधिकार सुनिश्चित जुइमाःगु, जाति व भाषाया आधारय् जनजातिया बाहुल्यता दुगु थासय् आदिवासी जनजातियात अग्राधिकार बीमाःगु आदि माग यासें थुगुसीया आदिवासी जनजाति दिवस हनाच्वंगु खः ।

सन् १९८२ संयुक्त राष्ट्र संघं छपुचः आदिवासी जनजातिया नेतात नापलानाः सहलह न्ह्याकूगु दिंयात आदिवासी दिवस कथं हनेगु याना वयाच्वंगु खः ।

संयुक्त राष्ट्रसंघं सन् १९९३ या दँय् आदिवासी दशक कथं हनेगु निर्णया यानाः सन् २००३ तक थीथी ज्याझ्वः यानाच्वंगु खःसा वयां लिपां छुं छुं ज्याझ्वः क्वमचाःगु धासें सन् २००३ लिपाया दशकयात नं आदिवासी दिवस कथं हनेगु निर्णय याःगु खः ।

राष्ट्रसंघपाखें स्थायी मञ्चया गठन व घोषणा पत्र जारी जुइधुंकूगु दु।