विश्व आदिवासी दिवस व नेपाः

थुगु दँया आदिवासी दिवस थौं विश्वन्यंकं थीथी ज्याझ्वः यासें हनाच्वंगु दु। दँय्दसं ९ अगष्टयात विश्व आदिवासी दिवस कथं हनेगु याना वयाच्वं थें नेपालय् नं थौं थ्व दिवस तःजिक हनाच्वंगु दु। न्हापा जूसा नेपालय् विश्व आदिवासी दिवस थीथी कथंया सांस्कृतिक मेला यानाः नखः थें यानाः हनीगु खः। तर थुगुसी देशय् वयाच्वंगु हिउपाः व उकी देय्या जनजातितय्सं म्हितेमाःगु भूमिकायात ध्यानय् तयाः आदिवासी दिवसयात नखःया रुपय् मखु आन्दोलनया रुपय् हनेगु ज्या जुयाच्वंगु दु ।

धाथें धायेगु खःसा थौं नेपाः गुगु हिउपाःया लुखाखलुइ लानाच्वंगु खः उखेपाखे विश्वया सम्पूर्ण आदिवासीतय् ध्यान सालेमाःगु खनेदु। छाय्धाःसां थौं नेपाःयात राज्य पुनर्संरचना यानाः न्हूगु नेपाः दयेकेगु धकाः गुगु अभियान न्ह्यानाच्वंगु खः, व धइगु हे वास्तवय् थनया आदिवासी जनजातिया अधिकारयात सुनिश्चित यायेगु धाःगु खः। सदियौंनिसें जातीय, भाषिक, सांस्कृतिक, आर्थिक रुपं उत्पीडनय् लानाच्वंपिं थनया आदिवासी, दलित आदि समुदाययात राज्य संचालनया मूलधारय् हयेगु धइगु हे नेपाःया सही राज्य पुनर्संरचना खः। उकिया लागिं हे नेपाःयात संघीय व्यवस्थाय् यंकेगु व जातीय भाषिक लिधंसाय् प्रदेशत निर्माण यायेगु अभियान थौंकन्हय् न्ह्यानाच्वंगु दु। तर थुकिया विरोध याइपिं गुलिखे पुलांगु राज्यसत्ताया अवशेष तत्वतय्सं धाःसा अझ नं थ्व अधिकार मबीगु षडयन्त्र याना हे च्वंगु दनि। उकिं थज्याःगु षडयन्त्रयात परास्त यानाः विश्व समुदायपाखें दवाव वयेकेगु लागिं थज्याःगु आदिवासी दिवस मार्फत विश्व आदिवासीतय् ध्यान थुखे सालेत झी ताःलायेमाःगु दु ।

More Stories Like this