स्वंगूगु लिंगीया सापारु

दँय्दसं सापारु कुन्हु सायाः पिहां वइबलय् उकिया दथुइ हे थनया समलिंगीतय्सं नं थःपिनि छगू बिस्कं र्‍याली पिकयाः प्रदर्शन यायेगु चलन वंगु छुं न्हि न्ह्यवंनिसें शुरु जुया वःगु दु। समलिंगीतय् संस्था निलहिरा समाजया ग्वसालय् थज्याःगु र्‍याली पिकायेगु ज्या जुया वयाच्वंगु खः। न्हापा येँ छथासं जक पिकाइगु उमिगु र्‍याली थुगुसी राजधानीं पिने मेमेगु जिल्लाय् नं पिहां वःगु खने दत। गुगु जिल्लाय् उमिगु बांलाःगु उपस्थिति मदु अनयापिं समलिंगीतय्सं चाहिं जिल्लाया प्रतिनिधित्व यासें येँया र्‍यालीइ हे ब्वति काल।
शुरु शुरुइ उमिसं पिकाइगु र्‍यालीयात थन हास्यास्पद रुपं जक काइगु खः। तर आः चाहिं उकियात स्वंगूगु लिंगया अधिकारलिसे स्वानाच्वंगु छगू गम्भीर ज्याझ्वःया रुपय् कायेगु याना हःगु दु। देय्या वर्तमान संविधानसभाय् समलंगीतय् प्रतिनिधित्व यासें निलहिरा समाजया अध्यक्ष सुनिलबाबु पन्त सभासद्या रुपय् वनाच्वंगु दु। उकुन्हु पिहां वःगु समलिंगी र्‍यालीइ सभासद् पन्तं नं ब्वति कया वःगु खः (तपाःगु किपाय् दथुइ लाक्क)। सभासद्तय्सं तकं ब्वति कया वःगु र्‍याली जूगुलिं उकियात अथें नं गम्भीर रुपं काये माःगु खनेदत ।

तेश्रो लिंगीतय्सं आः नेपाली नागरिकताय् पुरुष व महिला निगुलिं मच्वकुसे थःगु बिस्कं लैंगिक अस्तित्व कायम यायेगु ज्या याये हे धुंकूगु दु। आः उमिगु अभियान धइगु संविधानय् हे मिसा व मिजं बाहेक स्वंगूगु लिंगयापिं मनूत नं नेपालय् दु धकाः किटान याकेगु खः। उमिगु माग दु, नेपाः बहुजातीय व बहुभाषिक जक मखु बहुलिंगीय नं खः। संविधानसभाय् थ्वयेकेगु थज्याःगु विषयपाखे हे उमिसं थौंकन्हय् थज्याःगु ज्याझ्वःयात केन्द्रित यायां हयाच्वंगु खनेदु ।

More Stories Like this