सत्यमोहनया नापनापं

सुनिता मानन्धर

तःभुखाय् ब्वःबलय् जि गुदँ दत। जिगु छेँ यलया म्वःम गल्लि घःमाः लिधंगु छेँ खः। तःभुखाय् ब्वः कुन्हु छेँय् बाज्याया सराद जूगुलिं पाहां सःताः तयागु। जि बजां न्याः वनागु इलय् दकलय् न्हापा तच्वकं ग्वःफय् वल। बर्मू बाज्यायात बजां त्वंकाच्वनागु इलय् भुखाय् ब्वल। छेँय् ज्वरे याना तयागु दक्वं अथें तयाः सकलें क्यबय् च्वं वया। भुखाचं यलया तलेजु देगःया गजू दुन। क्वाल्खुया ल्वहं देगः नं दुन। यक्वसिया हे छेँ दुन। तःम्हमछिं हे मनूत ल्हात। उगु हे इलय् जिमि पाजुपिंथाय् जंक्व जूगुलिं केहेँ अन च्वं वंगु। व ला अन भुखाय् ब्वःबलय् ल्हात। ल्हानाः प्यन्हु लिपा तिनि वयात लिकात। खमूली तयाः वयात छेँय् हल। तुतिइ तच्वकं लाःगुलिं तुति छपु वासः पाकाः बिचाः याना। प्यला तक बिचाः यानाः नं घाः मलं। अनंलि अथें मंत। जिमि पासा छम्ह नं ल्हाःगु तर वयात धलिमं कानाच्वंगुलिं छुं मजुल। भुखाय् ब्वये धुंकाः क्यबय् पाल तयाः च्वं वःपिनि गुलिसियां ल्हाःतुति त्वःधू। गुलिसिया छ्यनय् घाः लाःसा गुलिं अन हे नं सित। घाः जूपिंत वैद्यखानायापिं वयाः वासः याःवल।
न्हापा न्ह्याथेंजाःगु ल्वचं कःसां वैद्य क्यनेगु चलन। अस्पताल धइगु जिं सि हे मसिउ। वैद्यखाना छगू जक सिउ। जिमि पासापिनि गलः वल धकाः येँय् त्रिपुरेश्वरय् वनाः गलःया वासः नः वनीगु। खुन्हु न्हय्न्हुया निंतिं मात्रा मिले यानाः वासः बिया हइ व नयाः गुलिसियां गलः मदया नं वन। गुलिसियां गलः ध्यनेमाःगु जुल ।

जि मचांनिसें यक्व हे कासा म्हिता। तेलकासा, सुलाकासांनिसें ख्वःसिं ह्वानाः ह्वागरा म्हितेगु, पाँय् म्हितेगु, खाःपुचः म्हितेगु नं याना। जि मचाबलय् प्याखं ल्हुइगु नं याना। उगु इलय् म्ये हालाः प्याखं हुला जुइ तसकं लय्ताः। यलया कात्ति दबुली प्याखं क्यनीगु इलय् जिमि बानं मृगाल थाइगुलिं बानापं च्वनाः अन प्याखं स्वस्व द्यना छ्वयेगु जितः थौं तलें लुमं ।

जितः मचांनिसें भान्तांलं, जंगवा सुरुवाः, तके यानातःगु भोटो फिकी। उगु इलय् खाद्वंगा (कपाय्या थानातःगु गा) दमरकुमारी गा न्ययेगु चलन। १४ दँ दुबलय् जिगु ब्याहा जुल, भाजु सत्यमोहन जोशीलिसे। अबलय् वय्कः झिंगुदँ दुगु। ब्याहा जूसां नखःचखः जात्राबलय् जक छेँनं सःतके हइ। प्यन्हु अन च्वनाः हाकनं थःछेँय् हे लिहां वयेगु। ब्याहा जुयाः प्यदँ ति लिपा तिनि जि छेँय् च्वं वया। उगु इलय् नं थःछेँय् च्वनेबलय् लं सुरुवाः फीगु खःसा छेँय् वनेबलय् पर्सि हे सिनेगु ।

जि झिदँ दसांनिसें भुतू ज्या यायेमाः। छेँय् मां भचा म्हं मफुगुलिं सुथ न्हापां दनाः वसिबँ पुनाः मंगलंनिसें लः हयेमाः। नित्य पूजा यायेगु, द्यइके वनेगु निसें मस्त स्वयेगु ज्या तकं यायेमाः। थुकथं न्हापांनिसें छेँज्या यानाच्वनागुलिं ब्याहा जुइधुंकाः छेँज्या याये छुं थाकु मजुल। सुथसिया प्यताः इलय् दना मस्तय्त जा क्वाका नकाः लः काःवनेगु। सुथय् दनेवं हे कुति वायेगु। मचा लुकुं छिनाः कुति वायेमाःसां थाकु मचाः। माजुबाःजुं मस्त स्वकाः थः क्यबय् ज्या याः वनेगु। चीधीकःम्ह मचा जूसा क्वथाय् थ्यनाः लुखाय् चुकू तयाः वसः हिउ वनेगु। मचा ख्वःगु सः ताल कि मचा काः वयेगु। लिपा मस्त तःधिकः जूलिसे वं वयात वं वयात स्वयेगु यात ।

न्हापा मोहनि व जात्रा जूसा जक न्हूगु लं पिनेगु याइ। थःपिंसं इताः फ्यनाः मिया वःगु ध्यबां वसः न्याइ। बेलायत, जापानं वःगु पर्सि धकाः थान थान ज्वनाः मिउ वइ। उगु पर्सि छत्वाःया निर्का न्याम्वह पाय्म्वलं लाः। इताः फ्यनेत तुलसी मेहरया पसलय् वनाः कपाय् न्याः वनेगु। छधानी कपाय्या छम्वह दां काः। कापः नं छगजया झिगः ध्यबां लाः। न्हापा बांलाक सिन्हः तीत ख्येंया तुयूगु ब्वय् मिश्री तयाः सिन्हः दयेकाः ती। थुकिं सिन्हः टल्के जुइ। जात्रा व मोहनि जूसा स्वाःना दामं ल्हाः जायेक बम्बई चुरा न्ह्याये दु। जिमि मां नं तिक, सिरबन्दी, पंचरत्नया चुरा न्ह्यानाः जन्तर क्वखाइ। उगु इलय् लुँस्वां छुइपिं नं दु। न्हापा छतोला लुँया नीन्यातकानिसें न्यय्तका जुजुं निसः तुल। जि बिया हःबलय् नम्बरी लुँ तोलां न्यय्तका सा वहः छतोलाया छसुका दामं लाः। बं पू वइपिंसं लुँ थी मजिउ धाइगुलिं उमिसं लुँ मतिउ। नारांद्यः धकाः वहःया जन्तर जक क्वखाइ ।

जिमि बाःजु डिट्ठा जूबलय् नीतका दामं छेँजः लहीत गाः। छम्वहया जाकि न्याःसा फछि बिउ। उसिना जाकि जूसा निफा हे वः। बाःजुया मोहन शम्शेरयाथाय् जागीर जूबलय् तलब मबिसे वा बीगु। झिंन्यामुरि वा वइगु भकारी थनेत गाः।
न्हापा माजु-बाजुपिनि न्ह्यःने गा त्वये मजिउ। पिलाक्व क्यने मजिउ। सँ फंफं तये मजिउ। लाकां मन्ह्यासे ल्हाः तुति सिलाः जक निलः कया हयेमाः। थी मजिउ छकः जूसा थः द्यनाथाय् बँ इलाः लः हाहा यानाः नीसी यायेमाः। जाति तकं हायेके बी मखु। उगु इलय् घडी न्ह्यायेगु चलन नं मदु। मचा बुइबलय् लुँ ध्वाखाय् दुने च्वंगु पानी अड्डाय् लः घः बाःपिंसं स्वः झाइ। अन च्वंपिंसं गुलि बजे जुल धकाः च्वयाः बिया हइ। चिकंपाय् निभाः वःगु स्वयाः नं ई सीका काइ। अथे हे तोप तल कि 'न्हेखां हाल लिखां हाल' धाइ ।

थौं स्वयां थ्यंमथ्यं पीखुदँ न्ह्यः जहानलिसे पाकिस्तान, कलकत्ता, कोरिया व चीनय् वना। कोरियाय् बाःछि ति च्वना। अन भचाभचा भाय् नं सःगु खः। लिपा ल्वःमन। चीनया थीथी थासय् चाःहिला। अन प्यदँ च्वना। अनया गांचापतिं चाःहिला। अनया कम्युनिष्ट शासनय् तसकं बांलाःगु नियम दु। सकसिनं समान कथं थःथःगु ज्या यायेमाः। ल्याय्म्ह ल्यासेतसें थाकुगु ज्या याःसा बुराबुरीं भचा अःपुगु ज्या याइ। थाय्थासय् ज्वाँय्ज्वाँय् सिसाफुसा सिमा दःसा उकियात यःयःथे यानाः सिसाबुसा खाइ मखु। ई कथं ल्याय्म्हतय्सं खाना बी। बुराबुरीं सिसाबुसा ल्ययाः तइ। विदेशीत जूसा बसय् टिकट काटे यायेम्वाः। सिट मदुसा थःपिनिगु सिट त्वःता बी। सकसियां ज्वःलाःगु लं फी। सुयां तिसा तीगु चलन मदु। जा न्याः वंसा तसकं दं। स्वंगः ध्यबाया छगः तग्वःगु कपय् जायेक बी। पसः वनेबलय् बास्केटय् जायेक सामान तया बी ।

अथे ला न्हापां झीथाय् नं छचालं यचुपिचु जू। जिमि छेँया छचालं गुभाजुत। नसात्वँसाया भाः तसकं दं। बरां, मुस्या न्यायेत ध्यबा छगः ध्यबा निगः दःसा गाः। गनं तापाःथाय् द्यइके वंसा पालि हे मना वयेक न्यासि वनेमाः। बुराबुरीतसें साखःबजि जँय् जनी ची थें प्वःचिना यंकी। जिगु इलय् आखः ब्वनेगु धइगु नं चलन मदु। यलया मंगलय् दकलय् न्हापां जिमि जहान व पासापिं मुनाः ब्वनेकू चायेकूगु खः। अन हे जिमि सकलें मस्त आखः ब्वन। छँय् ससःअबुं मस्तय्त आखः ब्वंकूगु स्वस्वं जिं नं भचाभचा नेपाली आखःग्वः सयेका ।

न्हापा क्यबया सिमाहः, छुसि, कःनिमा, मल्तामा दक्व तयाः सिँ छका पासा तयाः जा थुइमाः। जिगु ब्याहाबलय् सुकू, कुइँ, यं, च्वलेचा, कन्तुर व छज्वः बसजाः क्वसः बिउगु खः ।

More Stories Like this