दरवार हत्याकाण्डया जिम्मा काःम्हेसित ज्वन
येँ (सन्ध्या टाइम्स)/तत्कालिन जुजु वीरेन्द्रया वंशनाश जुइक जूगु दरवार हत्याकाण्ड थम्हं यानागु धकाः दाबी याःम्ह तुलप्रसाद शेरचनयात प्रहरीं ज्वंगु दु। वयात थौं सुथय् थनया लुँहितिइ च्वंगु छगू होटेलं ज्वंगु खः ।
वंगु बुधवाः रिपोर्टर्स क्लबय् छगू पत्रकार सम्मेलन यासें २०५८ साल जेठ १९ गते नारायणहिति दरवारय् तत्कालिन जुजु वीरेन्द्र नापं वया फुक्क हे छेँजःया हत्या थःगु हे योजना कथं जूगु दावी वं याःगु खः ।
थःत दरवारया सुरक्षा निकाय रोयल इन्टिलिजेन्स ब्यूरोया प्रमुख धकाः दावी याःम्ह शेरचनं थः २०३२ सालंनिसें उगु पदय् दुगु खँ नं कंगु दु ।
पत्रकार सम्मेलनय् शेरचनं विदेशं नेपाःया जनतायात धकाः बिया हइगु ग्वाहालिया दां हिनामिना याःगुलिं कारवाही स्वरुप थम्हं उगु हत्याकाण्ड यानागु खँ कंगु खः ।
विदेशं वइगु ग्वाहालिया ६० प्रतिशत विदेशय् हे च्वंगु बैंकय् तयाः बाँकी दुगु ४० प्रतिशत दां जक नेपाः दुहां वइगु दावी नं वं धाःगु दु ।
दरवार हत्याकाण्डया इलय् थः नेपालय् तुं च्वंच्वनागु धासें शेरचनं उगु हत्याकाण्डया योजना थम्हं २०३२ सालय् दयेकागु खःसां २०५८ सालय् वयाः तिनि मूर्तता बीफुगु खँ नं धाःगु दु। वं दरवार हत्याकाण्डया ग्वसाः थम्हं बेलायतय् च्वनाः दयेकागु दावी नं याःगु दु ।
तत्कालिन युवराज दीपेन्द्रया हत्या धाःसा थम्हं यानागु मखु धासें शेरचनं दीपेन्द्रयात मेपिंसं हे स्याःगु व अबलय् दीपेन्द्रया नकाब पुनाः मनूत वःगु दावी नं याःगु खः।
प्रहरीं शेरचनयात आः महानगरीय प्रहरी परिसर हनुमानध्वाखाय् तयाः अनुसन्धान न्ह्याकाच्वंगु दु। अनुसन्धानया झ्वलय् दकलय् न्हापां वयागु दिमाग ठीक जू मजू धकाः परीक्षण निं याना स्वयेगु खँ प्रहरी प्रमुख नवराज सिलवालं कनादिल ।
शेरचनयात ज्वंगु इलय् वया लिसें मेपिं नं दुगु खःसां प्रहरीं वयात जक ज्वना हःगु खः। मनूतय्सं शेरचन देशय् अस्थिरता ब्वलंकीगु छुं पुचःलिसे आवद्ध जुइमाः धकाः अनुमान याःगु दु ।
