स्वयम्भुइ न्हिं निगू ट्रक फोहोर

कृष्ण

स्वयम्भूइ द्वलंद्वःया ल्याखय् वइपिं श्रद्धालु भक्तजनतय्त सुविधा बीगु निंतिं ज्या यानाच्वंगु स्वयम्भू व्यवस्थापन तथा संरक्षण महासमितियात अनया फोहोर व्यवस्थापन यायेगु ज्या तसकं हाथ्यां जाःगु विषय जुयाच्वंगु दु।
खास यानाः येँ महानगरपालिकां माःकथं अनं वइगु फोहोर मुंकेगु व फोहोर उठे यायेगु ज्या मयाःगुलिं थःगु निजी खर्चं फुक्कं ज्या यायेमाःगुलिं उकथंया हाथ्या ब्वलनाच्वंगु खः। थौंकन्हय् अन न्हिया न्हिथं नीनिम्ह सफाई कर्मचारीत तयाः स्वयम्भू व्यवस्थापन तथा संरक्षण महासमितिपाखे न्हिं स्वंगू चरणय् स्वयम्भू लागाय् फोहोर मुनेगु व सरसफाइ यायेगु ज्या याना वयाच्वंगु दु। स्वयम्भूइ जक न्हिं छगः ट्रक धइथें फोहोर पिहां वयाच्वंगु दु। थौंकन्हय् गुंला जुयाच्वंगुलिं अन वइपिं मनूत न्हियान्हिथं अप्वयाच्वंगु दु। अथे जुयाः अन आः छगूत्या निसें निगू ट्रक तक फोहोर मुनेगु यानाच्वंगु दु। अथे फोहोर अप्वःगु कारण धाःसा थौंकन्हय् न्हिं झिद्वःया ल्याखय् मनूत गुंला हनेत स्वयम्भूइ वयेगु यानाच्वंगुलिं हे खः ।

स्वयम्भू महाचैत्यया सरसफाइ नापं फोहोर व्यवस्थापन यायेगु ज्याय् खुला न्हय्ला निसें निजी श्रोतं यानाच्वनागु खँ स्वयम्भू व्यवस्थापन तथा संरक्षण महासमितिया महासचिव महेन्द्र बुद्धाचार्यं 'सन्ध्या टाइम्स'यात कनादिल। स्वयम्भू लागाय् येँ महानगरपालिकां फोहोर मुनेगु ज्या यानाच्वंगु मदु। थःपिंसं स्वयम्भू लागाया लागिं अलग्ग हे सफाइ मजदुरया व्यवस्था यायेमाः धकाः माग यानाच्वनागुलिं उगु ज्या आः तक पूवने मफयाच्वंगुलिं थःपिंसं हे फोहोर मुंकाः यलय् तक यंकाः डम्पिङ्ग यानाच्वनागु खँ व्यवस्थापन तथा संरक्षण महासमितिं धाःगु दु ।

सुथय्, न्हिनय् व बहनी यानाः अन न्हिं स्वक्वः बँ पुइ। अथे हे फोहोर म्हो जुइमा धकाः सुरक्षा गार्ड हे व्यवस्था यानाः फोहोर नियन्त्रण यायेत स्वयां नं मनूतय्गु भीडया कारणं फोहोर नियन्त्रण याये मफयाच्वंगु खँ नं धाःगु दु ।

थौंकन्हय् स्वयम्भू लागाया मनूत चाःहिलीगु थासय् जक फोहोर सफा यायेगु ज्या यानाच्वंगु दु। स्वसःत्या ति दुपिं माकःतय्तगुपाखें वइगु माकःया खि च्व नापं अन चांन्हिं च्वनीपिं झिंन्याम्ह ति खिचातय्सं याइगु फोहोर ला अथें हे लानाच्वंगु दु। माकःत अप्वः धइथें जंगलय् हे च्वनीगु जुयाः उपिंपाखें याइगु फोहोर जंगलय् अथें लानाच्वंगु खँ व्यवस्थापन समितिं धाःगु दु। अन सफाइ व मर्मत सम्भार छगू प्रोजेक्ट कथं न्ह्यानाच्वंगुलिं आःयात गथे खः अथे हे जक फोहोर व्यवस्थापन यायेगु यानाच्वंगु दु। फोहोर व्यवस्थापनया निंतिं मेगु न्हूगु कथंया छुं ज्या तत्काल न्ह्याके फयाच्वंगु मदु ।

अथे हे थौंकन्हय् स्वयम्भू महाचैत्यया धातुइ लुं सीगु ज्या नेपाल सरकार पुरातत्व विभागया स्वीकृति कयाः न्ह्यानाच्वंगु दु। अमेरिकाया तिब्बती मेडिटेशन इन क्यालिफोर्नि नांगु संस्थापाखें स्वयम्भुया फुक्कं धातुइ थथे लुं सीगु ज्या न्ह्याकाच्वंगु खः। खुला न्हय्ला न्ह्यवंनिसें न्ह्यानाच्वंगु थुगु ज्याया झ्वलय् आः न्याम्ह बुद्ध व प्यम्ह ताराया मूर्तिइ लुं सीगु ज्या क्वचायेकेधुंकूगु दु। अथे हे बज्र छगलय् नं लुं सीगु क्वचायेके धुंकल। अथे हे धार्मिक देगः व त्रियोदश भूवनय् नं थुकथं हे मर्मत सम्भार यानाः लुं सीगु ज्या न्ह्यानाच्वंगु दु। थुगु ज्याया लागिं पुरातत्व विभागया प्रतिनिधि, जिल्ला प्रहरी कार्यालय हनुमानध्वाखाया प्रतिनिधि, येँ महानगरपालिकाया प्रतिनिधि, १५ वडा ज्याकूया प्रतिनिधि, प्रमुख जिल्ला अधिकारी येँ जिल्लाया प्रतिनिधि, स्वयम्भू व्यवस्थापन तथा संरक्षण महासमितिया प्रतिनिधि नापं पुजारी प्रतिनिधि दुगु प्राविधिक पुचलं प्रमाणित याकेगु, मुचुल्का याकेगु व संरक्षण यायेगुली ग्वाहालि यानाः ज्या न्ह्याकाच्वंगु दु ।

येँ महानगरपालिकां येँनं वइगु फोहोर हे सिसडोलय् वाये मफयाः समस्या ब्वलनाच्वंगु इलय् स्वयम्भू व्यवस्थापन तथा संरक्षण महासमितिं मेगु छुं आशा मकासें आःयात यलय् उगु थासं वइगु फोहोर वाकेगु यानाच्वंगु दु। खास यानाः थौंकन्हय् स्वयम्भूइ गुंला पर्व जूगुलिं भ्वय् नइपिंपाखें वइगु लप्ते व सलिं नापं प्लाष्टिकया सामान अप्वइगुलिं थप समस्या ब्वलंगु खँ नं व्यवस्थापन समितिं धाःगु दु ।

संस्कृतिया संरक्षण याना सफाइलय् ध्यान तयेमाःगु थ्व थासय् न्हिं झिद्वःया ल्याखय् वइपिं मनूतपाखें वइगु न्हियान्हिथंया फोहोर, नखःचखः व मू न्हि पंचदान, नागपूजा व गुन्हिपुन्हि सापारु थेंज्याःगु न्हि कुन्हु वइपिं लखौंया ल्याखय् वइपिं मनूतपाखें वइगु फोहोर व्यवस्थापन यायेगुली हे व्यवस्थापन महासमितियात हाथ्या जुयाच्वंगु दु ।

More Stories Like this