माओवादी हेडक्वाटर पोखराय्
आन्दोलनया गोप्य तयारी जुयाच्वंगु शंका
येँ (सन्ध्या टाइम्स)/सरकार व माओवादी दथुइ जूगु सहमति कार्यान्वयन यायेत कांग्रेस व एमालें असहमति प्वंकेवं आन्दोलनया घोषणा याःगु माओवादीं आन्दोलनयात गुकथं ताः लाके फइ धइगु बारे सहलह यायेत पोखराय् गोप्य भेला यानाच्वंगु खँ सीदुगु दु ।
माओवादी अध्यक्ष प्रचण्ड सहित मेपिं उच्चस्तरीय नेतात पोखराय् वनाः उगु गोप्य भेलाय् च्वनाच्वंगु खँ सूत्रं धाःगु दु।
तर माओवादीं धाःसा थः कार्यकर्तातय्त आन्तरिक प्रशिक्षण बीगु निंतिं थ्व भेला जुयाच्वंगु दाबी यानाच्वंगु दु ।
माओवादी हेडक्वाटर हे पोखराय् वनाः यानाच्वंगु थ्व भेलायात राजनीतिक विज्ञतय्सं अर्थपूर्ण रुपं काःगु दु। माओवादी हेडक्वाटर हे थथे पोखरा वंगु नं थ्वहे न्हापांखुसी खः धाःगु दु ।
उगु भेलाय् ब्वति कायेत अध्यक्ष प्रचण्ड सहित वरिष्ठ उपाध्यक्ष मोहन वैद्य (किरण), उपाध्यक्ष डा. बाबुराम भट्टराई, नारायणकाजी श्रेष्ठ (प्रकाश), महासचिव रामबहादुर थापा (बादल) व मेपिं उच्चस्तरीय नेतात दुथ्यानाच्वंगु दु ।
भेला जुयाच्वंगु थासय् वाइसीएल कार्यकर्तातय्सं कडा सुरक्षा बियाच्वंगु दुसा माओवादी नेतातय् सुरक्षाया निंतिं नेपाल प्रहरी व सशस्त्र प्रहरीं नं सुरक्षा बियाच्वंगु दु ।
भेलाय् जिल्लास्तरीय नेतातय्त तकं दुमकाःगु खँ सम्बन्धित सूत्रं धाःगु दु। भेलाय् तमुवान राज्य समिति व मगरात राज्य समितिया दुजःत जक दुथ्यानाच्वंगु दु।
अन न्ह्यानाच्वंगु ज्याझ्वःया उलेज्याय् छझाःया निंतिं जक पत्रकारतय्त दुत छ्वःगु खःसा वयां लिपा फुकसितं पिने छ्वया हःगु खः ।
माओवादीं थ्व भेलायात केन्द्रीय समितिं याःगु निर्णय बारे कार्यकर्तायात जानकारी बीत व पार्टीइ सकलें नेतात छप्पँ जुयाच्वंगु दु धकाः क्यनेत ग्वसाः ग्वयागु धकाः पिने धायेगु यानाच्वंगु दु ।
भेला बारे कन्हय् छगू पत्रकार सम्मेलन हे यानाः जानकारी बीगु खँ सचिवालय दुजः हितराज पाण्डें कनादीगु दु।
उखे माओवादीं यायेत्यंगु आन्दोलनया बारे सहलह यायेत थौं सरकारय् सम्मिलित २२ दलया मंकाः बैठक च्वनेत्यंगु दु। न्हिनय् च्वनीगु बैठकं माओवादी आन्दोलनया विश्लेषण याइगु खँ धाःगु दु ।
