जाजरकोटया प्रकोप व संघीय व्यवस्था

जाजरकोटय् न्यनाच्वंगु झाडाबान्तां कयाः मनू सीगु क्रम अझ नं दिउगु मदुनि। म्हिगः तक नं निम्ह मनू सित धइगु समाचार पिहां वःगु दु। सरकारं झाडाबान्ता पनेगु लागिं अनेक कुतः यानां नं पने मफयाच्वन धकाः पिने धायेगु यानाच्वंसां अनया यथार्थ धाःसा हानं मेगु हे जुयाच्वंगु खँ स्थानीय मनूतय्सं धायेगु याः। जाजरकोटया झाडाबान्ता नियन्त्रण यायेगु लागिं सरकारपाखें छ्वःपिं गुलिखे चिकित्सकत अन थ्यं हे मथ्यंगु व थ्यंपिं नं थःत हे ल्वय् सरे जुइ धकाः अनं बिसिउँ वयाच्वंगु समाचार वःगु दु। उगु लागाया झाडाबान्ता प्रकोप निरीक्षण यायेत स्वास्थ्य मन्त्री जक मखु स्वयम् प्रधानमन्त्री हे अन वनाः स्वया वयेधुंकलं नं पाय्छि मात्रां वासः छ्वये मफुनिगु खँ नं धाःगु दु। थुकिं यानाः उगु लागाया झाडाबान्ता नियन्त्रण मजुयाच्वंगु खः।
थुुथाय् नेपाःया प्रशासन जक मखु जनताया सेवा याये धइगु शपथ नयाः चिकित्सा ख्यलय् वयाच्वंपिं चिकित्सकतय्गु नैतिकतायात कयाः नं न्ह्यसः थनेमाःगु जुयाच्वंगु दु। चिकित्सकतय् हक हितया सुरक्षा यायेगु ताः तयाः गठन जुयाच्वंगु चिकित्सक संघ दु। लिसें मेमेगु नं चिकित्सकतय् निकाय दु। तर नेपाःया हे छगू जिल्लाय् अपाय्धंगु महामारी जुलं नं सुं चिकित्सक पुचलं थःपिं अन वनाः उद्धार याये धकाः मती मतः। थ्व तसकं दुर्भाग्यपूर्ण खँ खः ।

वास्तवय् जाजरकोटय् थ्व महामारी जूगुया मू कारण वासः छचाःया निंतिं समेत राजधानीया ख्वाः स्वया च्वनेमाःगुलिं खः। थज्याःगु अवस्था मदयेकेगु लागिं नं नेपाःयात संघीय व्यवस्थाय् यंकेमाःगु आवश्यकता दु। संघीय व्यवस्था जूसा अज्याःगु समस्यायात अनं हे समाधान याये फइ ।

More Stories Like this