थिकेगु बेसाः भाः व राजनीतिक पार्टीत

तिर्थमान महर्जन

आव २०६६/०६७ या बजेट भाषण लिपा कर्मचारीतय्सं सिंहदरवारय् न्याद्वः तका दां अप्वयेकेमाःगु माग यासें विरोध जुलुस व थाय् थासय् प्रशासनिक ख्यलय् पेन डाउन, सभा आदि यानाः आखिर तलब अप्वयेकां तुं हे त्वःतलसा हरेक कर्मचारीतय्त महँगी भत्ता वापत झिंनिसः तका दां बीगु मन्त्रिपरिषद बैठकं निर्णय याःगु दु। सरकारया उगु निर्णय नं छखे कर्मचारीतय्त लय् तायेकेगु ज्या याःगु दुसा मेखे सर्वसाधारण जनता धाःसा बेसाः भाः थिके जुयाः छ्यं स्याकाच्वंगु दु। थ्व सरकारय् च्वंपिं कर्मचारी व सभासदतय् तलब भत्ता अप्वयेकाः नयेगु नियत थें च्वं ।

मेगु खः प्राइभेट, फर्म, न्हिं न्हिं भारी क्वबिया न्हिं खाना न्हिं नयेमाःपिनिगु तलब, ज्याला धाःसा गबलें हे बढे मजूसा बेरोजगारतय्गु निंतिं नं छुं ज्याझ्वः मदु। उकिं सरकारं थुखेपाखे नं पलाः न्ह्याके माःथें च्वं। प्राइभेट फर्म, निजी ज्याकुथिइ ज्या याइपिनिगु तलब नं सरकार थुलि प्रतिशत अप्वयेकेमाः धकाः क्वःछिना बिउसा बांलाइ थें ताः। मखु धइगु खःसा दक्वसिनं जुलुस पिकाये माली थें च्वं। मेगु खः कर्मचारीतय्त न्ह्याक्व हे तलब अप्वयेका बिउसां नं थुमिसं घुस, कमिशन नयेगु त्वःती मखु। थुकिया दसु मालपोत, भुमिसुधार स्वास्थ्य, जलविद्युत आदि थासय् न्ह्यागु यानाः नं घुस, कमिशन नयाच्वंगु दइ। थुमित कारबाही यायेगु निकाय नं सरकार दयेकेमाः। मखु धइगु खःसा अख्तियारयात पूरा पूरा अधिकार बियाः दक्व अफिसया गतिविधि स्वयेगु याकेमाः ।

देशय् न्ह्यागु ख्ललय् नं भ्रष्टाचार, कमिशन, घुसखोरीतय्गु बोलवाला जुयाच्वंगु दु। बेसाः भाः थिके जुयातुं च्वनी, कर्मचारीतय्गु तलब बढे हे जुइ। आखिर नयेत्वने मखना जनता सिना हे च्वनी। तर थिके जुइगु छाय् व छु कारण खः धकाः आः तक सुनां नं अनुगमन याःगु मदु ।

सरकारय् च्वंपिं राजनीतिक पार्टी, कर्मचारीतय्गु बानी धइगु हे देशय् बेसाः भाः थिके यायेगु, कमिशन नयेगु खः। जब कमिशन नइ, भ्रष्टाचार अप्वइ अले न्ह्यागुं थिके जुइ। गुलि कमिशन नइ मखु उलि सामान दनी। भ्रष्टाचारया कारणं देशय् स्वास्थ्य सेवा थिके जुइ। अप्रेशन यायेमाःसा द्वलंद्वः लखौं लख तका ध्यबा माः। डाक्टरतय्सं सरकारी अस्पतालय् जागिर नःसां नं प्राइभेट क्लिनिक, प्राइभेट हस्पिटलय् ज्या यानाच्वंगु दु। गुकिं यानाः सरकारी सुविधा प्राप्त अस्पतालय् क्यं वनेगु धइगु डाक्टरतय्त प्राक्टिस याकेगु जक जुयाच्वंगु दु। अथे हे सरकारी अस्पतालय् डाक्टरतय्स बांलाक स्वइ मखु। थःगु क्लिनिकय् सःती, प्राइभेट अस्पतालय् सःती। अथे जुयाः डाक्टरतय्सं नं अस्पताल धइगु प्राक्टिस यायेगु थाय् खः धकाः मती मतसे बांलाक जाँचय् यायेमाः ।

थुलि जक मखु कि हरेक स्कुल कलेज सरकारी ब्वनेकुथी ब्वंकीपिं मास्टरतय्सं नं अथे हे ट्यूशन ब्वनेत सःती। थुमिसं ट्यूसन ब्वंकीबलय् ब्वनीपिं पास जुइसा मब्वपिं फेल जुइ। उकिं सरकारी ज्या याइपिंत पिने छुं नं ज्या याये दइ मखु धकाः नियम कानून दयेकेमाः। गथे कि सरकारी स्कूलय् ब्वनीपिं विद्यार्थीत अप्वः धइथें फेल। बोर्डिङ्ग स्कूलय् ब्वनीपिं धाःसा १०० प्रतिशत अप्वः हे पास जुइ। थ्व गथे जुयाः खः थुकि नं सरकार व जनता ध्यान बीमाः थें च्वं। खाली तलब भत्ता, कमिशन जक नयेगु याइपिंत न्ह्यागु ख्यलय् नं चीकेमाः ।

थौं देय् हरेक ख्यलय् झन् झन् असफल जूगु दु। थौं बेसाः भाः न्हियान्हिथं थिके जुयाः वनाच्वंगु दु। स्वास्थ्य सेवाय् नं वासः मथ्यं, गनं डाक्टर मथ्यनाः जनता सिनाच्वंगु दु। शान्ति सुरक्षा नं स्यनाच्वंगु दुसा सरकारं शान्ति सुरक्षा याये धाःसा नं थीथी कथंया अपराध अप्वःया वनाच्वंगु दु। जनताया सुरक्षाया ग्यारेन्टी सरकारं बी फयाच्वंगु मदु।
सरकारय् च्वनाच्वंपि नेता, कर्मचारी, आसेपासेतय्सं जनतां पुलातःगु कर, मालपोट आदिया दुरुपयोग यानाः तलब घुस नयाच्वंगु दु ।

थौं देया राजनीतिइ छगू विकृति ब्वलनाच्वंगु दु। राजनीति यायेगु धइगु जनतायात झंगः लायेगु, जनताया छ्यंनय् कःनि मुस्या सियाः नयेगु व जनतायात हे क्वत्यलेगु थौंया राजनीति जुयाच्वंगु दु। थुमिसं जनतायात थकायेगु ज्या गबलें याःगु मदु। खालि गथे यानाः जिल कुर्सी च्वनेगु, कुर्सीं क्वफायेगु, जनतायात आश्वासन बीगु, बन्द, जुलुस, हडताल यायेगु व थःथःगु स्वार्थ पूवंकेगु ज्या राजनीतिक पार्टीतय्सं यानाच्वंगु दु ।

राजनीति धइगु हे झीगु देशय् थौंकन्हय् विकृति थें जुया वयाच्वंगु दु। राजनीति यायेगु, झंग लायेगु, कमिशन, घुस, भ्रष्टाचारी यानाः आलिशान महल दयेकेगु जुयाच्वंगु दु। देया छुं पर्वाह धइगु राजनीति याना च्वंपिं नेतातय्के मदु। थौं भारतं नेपाःया भूमि मिचे यानाः नेपाली जनतायात पितिना हःसां थ्व सरकारं चिउताः क्यनाच्वंगु मदु ।

अथे हे दकलय् मदयेकं मगाःगु लः खः। त्वनेगु लः स्वनिगलय् प्यन्हु न्यान्हु, च्यान्हुइ छकः लः छ्वया हयेगु यानाच्वंगु दु। जब कि थन लः मीगु ग्वाः ग्वाः कम्पनी दु। उमिस धाक्वः लः आपूर्ति यायेफुसा सरकारं गुलि कमिशन नयाः लःया हाहाकार यात जुइ? थुकि सर्वसाधारण जनतां बिचाः यायेमा कि पिने जार का जार, बोटलका बोटल लः ट्यांकर फालाफाल न्यायेगु दु धाःसा थ्व सरकारं लःया व्यवस्था छाय् मयात? जनताया समस्याय् सरकारं छाय् ध्यान मबिल? जनतां थुमितं हे त्याका छ्वःसां झीगु देशय् मत्याःपिं सरकारय् दुहां वनाः मन्त्री जूगुलिं खः कि? स्वनिगःया सभासदत मन्त्रिमण्डलय् मथ्यंगुलिं खः कि? अथे जुयाः झीसं धाये माः कि नेतातय्सं हे झीत झंगः लायेगु ज्या जक यानाः उमिसं थःगु स्वार्थपूर्ति यानाच्वंगु दु।
जनता धाःगु खँ आः तक सुनां नं खँ न्यंगु मदु। खालि जनताया छ्यं जक स्याकातःगु दु ।

जनताया सरोकार शान्ति सुरक्षाया अनुभूति बीपिं आः तक सु नं पार्टीत वःगु मदुनी। खालि जनतायात छ्यं स्याकाः थःगु स्वार्थपूर्ति याइपिं नेतात जक वयाच्वंगु दु। उकि जनता जर्नादन होशियार जुइमाःगु दु, नेतात खनाः ।

More Stories Like this