गुंपुन्हि हन

थौं छेँय् छेँय् सुचुकुचु यानाः, म्वःल्हुया थःगु कुल कथं ब्रम्हू, आचाजु वा गुभाजुपिनि ल्हातं म्हासुगु कचिकाया जनै (रक्षा बन्धन) मिजंतय्सं जव ल्हातय् व मिसातय् खव ल्हातय् चिउगु दु । थुकी ब्रम्हा, विष्णु व रुद्रयात आह्वान यासें गायत्री व ब्रम्हसूत्र मन्त्र पुयाः ईकाः पःकाया प्वः नं घायेगु याः । थ्व ल्हातिइ चिइगु रक्षा का लिपा स्वन्तिया सा पुजा यायेबलय् साया न्हिप्यनय् चिइगु चलन दु ।

अथेहे म्हय् जनी चिनातयेगु चलन दुपिंसं दच्छिया छकः थुकुन्हु हे जनै हिलीगु चलन कथं थःथःपिंनि म्हय् चिनातःगु जनै हिउगु दु ।

पुन्हि निसें कृष्णाष्टमी तक गुन्हुयंक हनीगु जूगुलिं थ्व नख:यात गुंपुन्हि धाःगु खः । थौं गुजु वसाः पुनाः, गुक्वः छेँ दुहांपिहां जुइगु नं चलन दु । अथेहे गुता बूबः - भुति, मुस्या, चाना, सिम्पु, माय्, पःमाय्, तग्वः कय्गू, चिग्वः कय्गू, मू तयाः ल्वाकछ्याना क्वाति दायेका त्वनेगु नखः नं थ्वहे खः ।

थौंया न्हि बुद्ध कामेच्छां मुक्त जूगु न्हि नं खः । अथेहे यमराजं धर्मात्मातय्त लोकेश्वरया रुप दर्शन याकाः धर्मोपदेश ब्यूगु न्हि नं खः । गुंपुन्हि कुन्हु गुम्ह बहिद्यः दर्शन यायेगु चलन दु । अथेहे थौं कोन्ति महाद्य:, खोना, सिलु तीर्थय् मेला लगे जूगु खः ।

More Stories Like this