गाडीं क्ययेकाः खुम्ह स्यात

चालक फरार, लँय् विरोध प्रदर्शन

येँ(सन्ध्या टाइम्स)/वंगु चान्हय् थनया रत्नपार्कय् निजी कारया ठक्करं खुम्ह भारतीय नागरिक सीगु दुसा छम्ह घाःपाः जूगु दु ।

थ्व घटनाया विरोधय् उमि छेँजः व स्थानीय मनूतय्सं थौं सुथंनिसें रत्नपार्क न्ह्यःने टायर च्याकाः प्रदर्शन याःगुलिं उगु लागाय् यातायात नापं बजाः नापं प्रभावित जूगु दु ।

सीपिनि छेँजःपिंसं असं, भोताहिति व न्हूसतक लागाय् टायर च्याकाः प्रदर्शन यायेगु नापं अनया पसः नं बन्द याकूगु दु। प्रदर्शनया कारणं रत्नपार्कय् चले जुइगु गाडी बन्द जूगु दु।
घटना लिपा आक्रोशित मनूतय्सं जनसेवा प्रहरीइ नं छझाः धर्ना बिउगु खः। अथे हे उमिसं भारतीय राजदूतावासय् नं धर्ना बिउगु दु। दूतावास न्ह्यःने धाःसा प्रहरीं हस्तक्षेप याःगुलिं उकी लानाः झिंन्याम्ह घाःपाः जूगु दु। अथे हे न्हू सतकय् नं प्रहरीं प्रदर्शनकारीतय्त हस्तक्षेप याःगु दु। उखे जमलय् धाःसा प्रदर्शनकारीतय्सं छम्ह प्रहरीयात ज्वनाः दाःगु दु ।

चान्हय् १ बजेपाखे वीर अस्पतालय् विरामी स्वयाः लिहां वयाच्वंपिं छपुचः भारतीय नागरिकतय्त बा. ४ च ८०३० नम्बरया कारं ठक्कर नकूगु खः। उकी भारतीय नागरिकत धर्मनाथ सिंह, बिना सिंह, मदन गुप्ता, छोटु गुप्ता, कृष्णदेवी गुप्ता सहित खुम्ह सीगु खःसा दीपक गुप्ता घाःपाः जूगु खः।
तीव्र गतिं वयाच्वंगु उगु कारं न्हापां निम्हेसित ठक्कर नकूगु व वयां लिपा ब्याक यानाः मेपिं न्याम्हेसित क्ययेकूगु खँ प्रत्यक्षदर्शीतय्सं धाःगु दु। ठक्कर नकूगु गाडीया चालक विप्लवमान सिंह धाइम्ह विनय डंगोल फरार जुयाच्वंगु दुसा प्रहरीं वयात मालाच्वंगु दु। थौं सुथय् हे हनुमानध्वाखाया जिल्ला प्रहरी ज्याकुथी छगू पत्रकार सम्मेलन यासें प्रहरीं थुकिया जानकारी बिउगु खः ।

उखे प्रत्यक्षदर्शीतय्सं धाःसा प्रहरीं कार चालकयात मज्वँसे बिसिके छ्वःगु द्वपं बिउगु दु। उगु कारय् चालक नापं मेपिं स्वम्ह नं दुगु खँ धाःगु दु। प्रहरीं बिसिउँ वनाच्वंम्ह सिंहयात ज्वनेगु निंतिं सिंहया अबु शान्तिमान सिंह व मां शान्तिमाया सिंहयात ज्वनातःगु दु। सिंह तिपुलिं थः काययात कारवाही यायेगु व पीडिततय्त क्षतिपूर्ति बीत थः तयार दुगु खँ धाःगु दु। उखे प्रहरी शव बुझे यायेत भारतीय दूतावासलिसे खँल्हाबल्हा न्ह्याकूगु दु।