नेतातय्त नकीगु जुल व्यंगै व्यंग

ग्लोबल बिजया ग्वसालय् थनिंनिसें शुरु जूगु गाईजात्रा महोत्सव २०६५ स नेपाःया नांजाःपिं कलाकारत नापं नेवाः कलाकारतय्गु नं सक्रिय सहभागिता जुयाच्वंगु दु। नेपाली टेलिसिरियल 'तीतोसत्य'या छुं छुं भागय् च्वनाः नं स्वकुमितय् नुगः सालेत ताःलाःम्ह रबि डंगोल 'बेमान' थुगु महोत्सवय् पूर्ण थापा लिसेया छगू नाटकय् खने दयेकः वइ। उकी नं वय्कलं 'तीतो सत्य' य् थें हे खय् भाय् ल्हाये मसःम्ह नेवालं खय् भाय् ल्हाः थेंज्याःगु हे मिक्स भाषा ल्हानाः स्वकुमितय् नुगः सालेगु कुतः यानादी। वय्कःपिंसं शौचालय व मन्त्रालय नापं तःसा गुलि पाय्छि जुइ धइगु विषयबस्तुयात कयाः स्वकुमितय्त न्हीकेगु व वया दथुदथुइ राजनीतिक ब्यंग्य प्रहार यायेगु कथं शो तयार यानातःगु दु।
ग्लोबल बिज संस्था छगू स्वयम नं ब्यापारिक संस्था खः। अथे जुयाः थुगुसी न्यासः, निसः व सच्छि वंगु टिकट मीगु व शो क्यनाः लबः नयेगु ज्या थुगु संस्थां यायेत्यंगु दु। थीथी वेब साइट दयेकेगुनिसें विश्वन्यंकंया ब्यापारीतय्त स्वापू तयेगु निंतिं बिजिनेश डारेक्टरी दयेकाः ग्वाहालि यानाच्वंगु थुगु संस्थां थीथी कथंया ब्यवस्थापन ज्या यायेगु झ्वलय् थ्व गाईजात्रा महोत्सव-२०६६ या ग्वसाः ग्वःगु खः। मदनकृष्ण श्रेष्ठ व हरिवंश आचार्ययात ज्याझ्वःया उलेज्या याकाः थुगु संस्थां न्हूपिं हास्य कलाकारतय्त उत्साहित यायेगु ताः तयातःगु दु। थुगु संस्थां स्पष्ट रुपं हे थःपिं नाफामुलक ज्या याना वयाच्वनापिं खः धाइ ।

थज्याःगु नाफामुलक गाईजात्रा महोत्सवय् नेवाः कलाकारत धाःसा निम्ह प्यम्ह हे जक दुथ्यानाच्वंगु दु। उकी मय्जु पल्पसा डंगोल छम्ह नं खः। म्ह ग्वाथ्याग्वाथ्या ल्ह्वनाः अथें हे हास्य रस पिज्वइम्ह पल्पसां थुगुसी न्ह्यागुं चीजय् सल्लाह कायेत दिल्ली दरवारय् ब्वाँय् जुइपिं देय्या नेतातय्त स्याचुक्क ब्यंग्य नकादीगु दु। थःगु १४ रोपनी ७५ आना जग्गा दुगुली खालि उखेया तःधिकःम्ह दाइचां मिचे यायां यायां थःत कय्कुंकेत स्वयेवं बिद्रोहया भावना ब्वलंकाच्वंम्ह पल्पसां उकथं हे समस्या समाधान यायेत दिल्ली दरवारया लुखा खनेगु प्रबृत्तियात दुग्यंक ब्यंग्य यानातःगु दु। मुक्कं खय् भासं खःसां सुलेमान शंकर 'इकु' व मञ्जु श्रेष्ठ 'बिजुली' या प्रस्तुतिं नं ब्वज्या झःझः धाइगु आशा यानातःगु दु ।

More Stories Like this