कांग्रेसयात अवधारणा व मागपत्र
नेवाः स्वायत्त राज्य मंकाः संघर्ष समितिया छगू प्रतिनिधि मण्डलं थौं सत्तारुढ नेपाली कांग्रेसया उपसभापति गोपालमान श्रेष्ठयात नाप लानाः नेवाः स्वायत्त राज्य सम्बन्धी अवधारणा व मागपत्र लःल्हात ।
प्रतिनिधिमण्डलपाखें संघर्ष समितिया छ्याँजे व नेवाः देय् दबूया नायः नरेश ताम्राकारं मागपत्र न्ह्यब्वसें संघीय नेपाःदुने थःगु ऐतिहासिक नेपाल मण्डल भूमिइ अग्राधिकारलिसेंया नेवाः राज्यया माग नेवाःतय्गु जूगुलिं उकिइ नेपाली कांग्रेसं नं सम्बोधन यानाः संविधानय् दुथ्याकेत पहल यायेमाःगु खँ तयादिल ।
प्रतिनिधि मण्डलय् दुथ्याःम्ह संघर्ष समितिया सल्लाहकार मल्ल के. सुन्दरं नेपाली कांग्रेसं नेवारतय्गु मागया सम्बन्धय् थःगु विचाः व प्रतिकि्रया बिइमाःगु धयादिसें बेवास्ता जूसा स्थितिं गम्भीर रुप कायेफुगु खँ धयादिल ।
माग पत्र व अवधारणा पत्र लःल्हाना कयादीम्ह कांग्रेस उपसभापति गोपालमान श्रेष्ठं थम्हं नं थ्व सम्बन्धय् अध्ययन यायेगु व सहलहया नितिं उगु मागपत्र व अवधारणा न्ह्यब्वयेगु खँ तयादिल ।
प्रतिनिधि मण्डलय् संघर्ष समितिया गुंगुलिं घटकया प्रतिनिधिलिसें नेपाली कांग्रेसया सभासद् तीर्थराम डंगोल व भीमसेन दास प्रधान नं झायादीगु खः ।
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
