सर्वदलीय बैठकय् विवाद
छुं हे निर्णय मयासे बैठक क्वचाल
येँ (सन्ध्या टाइम्स)/एनेकपा (माओवादीं) आन्दोलनया घोषणा यायेवं राजनीतिक गतिरोध चीकेगु निंतिं थौं सरकारं आह्वान याःगु सर्वदलीय बैठकय् विवाद जुयाः बिना निष्कर्ष बैठक हे क्वचाल ।
प्रधानसेनापति प्रकरणय् राष्ट्रपति डा. रामवरण यादवं ल्ह्वंगु पलाःयात सुधार यायेमाः धकाः माओवादीं तःगु प्रस्तावयात एमाले व कांग्रेसं विरोध यायेवं बैठकय् विवाद जुयाः अन्ततः छुं हे निर्णय मयासे बैठक क्वचायेकेमाःगु खः ।
राष्ट्रपतिया सन्दर्भय् माओवादीं धयाच्वंगु छुं नं खँय् एमाले व कांग्रेसं सहलह याये मफइगु खँ कांग्रेस संसदीय दलया नेता रामचन्द्र पौडेलं धायेवं माओवादी नेतातय्सं यदि उकी छलफल मयायेगु खःसा थःपिं छाय् थज्याःगु बैठकय् च्वनेगु धकाः न्ह्यसः तःगु खः ।
बैठकय् विवाद तच्वया वयेवं माओवादी नेता डा. बाबुराम भट्टराईनं 'थ्व बैठकं छुं नं निर्णय याये फइ मखु' धासें दथुइ हे बैठक त्वःताः पिहां झाःगु खः ।
सत्तारुढ एमाले व कांग्रेसया नेतातय्सं धाःसा राष्ट्रपतिया पलाःयात सरकारं समर्थन हे यायेधुंकूगु कारणं आः उकियात कयाः मेकथं बिचाः याये फइ मखु धकाः अडान काःगु खः।
डा. भट्टराईनं नागरिक सर्वोच्चता स्थापित यायेगु थःपिनि मागया सम्बन्धय् कांग्रेसया उपसभापति रामचन्द्र पौडेलं माग संवोधन जुइ धुंकल धकाः लिसः बीवं उकी असहमति प्वंकादीगु खः ।
डा. भट्टराईनं पिहां वयेगु झ्वलय् पत्रकारतलिसे खँ ल्हासें सहलह ज्याझ्वलं निकास पिहां वइगु सम्भावना मदु धयादीगु खः ।
वय्कलं माओवादी व कांग्रेसं थःपिनि अडान मत्वःतूगुलिं नं स्थिति सहज मजूगु खँ धयादीगु दु ।
माओवादीं प्रधानसेनापति प्रकरणय् राष्ट्रपतिया पलाः भिंके माःगु माग यासें सदनय् चले याके मबीवं वंगु असार २२ गते सरकार व माओवादी दथुइ सहलह जुयाः लछिया दुने माओवादीं ल्ह्वनाच्वंगु मागयात संवोधन यायेगु सहमति जूगु खःसा सरकारं लछिया दुने छुं हे कथंया कुतः मयाः धासें माओवादीं म्हिगः आन्दोलन घोषणा याःगु खः ।
थौंया सर्वदलीय बैठकय् उपेन्द्र यादवया मधेशी जनअधिकार फोरमं धाःसा ब्वति मकाः। बैठकय् संविधान निर्माण प्रक्रिया, संविधानय् दुथ्याकेमाःगु बुँदा बारे नं खँ जूगु खः ।
