गृहयात हाथ्या बीगु निगू घटना

गृह मन्त्री भिम रावलं देशय् शान्ति सुरक्षा कायम यायेगु धकाः सदनय् विशेष कार्यक्रम न्ह्यब्वयाच्वंगु इलय् लाक्क राजधानीइ निगू गुण्डागर्दीया घटना जुल। छगू, वाईसीएल कार्यकर्तापाखें बालाजु औद्योगिक क्षेत्रया महाप्रबन्धकयात हातपात। मेगु, गृह मन्त्रीया हे पार्टीया भातृ संगठन अनेरास्ववियुया कार्यकर्तापाखें त्रिचन्द्र क्याम्पसया चिफयात हातपात। निगुलिं घटनां देशय् अप्वयाच्वंगु अराजकता व उकिं यानाः ब्वलनाच्वंगु आतंकया वातावरणयात बांलाक हे उलाः क्यनाच्वंगु दु। खुँ, लुटेरा थेंज्याःपिंसं ला बहनी सुनां मखंक जक लुटपाट याइ, तर गुपिं सरकारय् दु उमि हे कार्यकर्तातय्सं थथे न्हिनय् हे सकस्यां न्ह्यःने थःपिंसं हे माने यायेमाःपिं शिक्षक व सरकारी अधिकृततय्त आक्रमण याइ। थुकियात पनेगु संयन्त्र गृह मन्त्रीयाके दु ला? वय्कलं खुँ लुटेरातय्त ज्वनेगु कुनेगु योजना ला दयेकातःगु दु जुइमाः, तर थःगु हे पार्टी व थीथी भातृ संगठनया कार्यकर्तातय्त ज्वनेगु कुनेगु गुगुं ग्वसाः धाःसा अवश्य नं दयेकूगु दइ मखु। थौं देय्या गृह प्रशासनयात धाथेंयापिं लुटेरात सिबें नं थज्याःपिं हे राजनीतिक दलया कार्यकर्तातय्सं हाथ्या बियाच्वंगु दु। उमिसं याइगु आतंकया मात्रा जक फरक जुइगु खः सिबाय् रुप धाःसा करिब वहे जुयाच्वनी। सलंसः सशस्त्र पुचः दुगु तराईया खँ हे त्वःते, थौं राजधानी तकं सत्तारुढ पार्टीया कार्यकर्तापाखें सुरक्षित जुयाच्वंगु मदु। थः कार्यकर्तां न्ह्यागु हे अपराध याःसां उमित ज्वनेगु ज्या सरकारं याइ मखु। गृह मन्त्री रावल व वय्कःया पार्टी देशय् शान्ति सुरक्षा कायम यायेत धाथें प्रतिवद्ध खः कि मखु धइगु खँ थःहे कार्यकर्तायात कारवाही याइ लाकि मयाइगु धइगुलिं पुष्टि याइ ।

More Stories Like this