संगीतया ह्युमत

सुनिता मानन्धर

०३७ सालय् दकलय् न्हापा म्येँ हालामि कथं संगीत ख्यलय् दुहां झाःम्ह व्यक्ति खः गोविन्द ह्यूमत। मचांनिसें हे संगीतया लकसय् ब्वलंम्ह वय्कःया अबु सेनाया भैरवनाथ गणय् म्युजिक ब्याण्डय् जुयादीम्ह खःसा मां भजन हालादी। वय्कलं थः मचाबलय् हे थःगु छेँय् गुरु लक्ष्मीनारायण शाही वयाः हार्मोनियम सयेकादिल। वय्कः थः मां द्वारिकादेवीया प्रेरणां हे संगीत ख्यलय् दुहां वयागु खँ कनादी ।

खय्त ला वय्कलं झिपु ति जक म्येँ हालादीधुंकूगु दुसा वय्कःया संगीतय् निसःपु ति म्येँ पिहां वयेधुंकल। वय्कलं धयादी, संगीत तयेगु स्वयाः म्येँ हाले थाकु। वय्कःयात थम्हं संगीत तयागु मध्ये बलिउडया गायक जसविन्दरं हालातःगु 'सुनाप मतिना याये न्ह्यः' बोलया म्येँ अतिकं यःगु खँ कनादी।
वय्कःया संगीतय् बलिउड गायकतपाखें म्येँ हालाः 'छंगु किपा' नांया म्येँचाः नं पिहांवःगु खः। थुगु म्येँचाःया बारे वय्कलं धयादी, 'नेपालभाषाया म्येँ विदेशीतय्त नं हायेके फःसा झन विकास जुइगु मनंतुनां रमेशमान शाक्यनाप सहलह याना। वय्कलं थुकी सहमति बियादिसेंलि जिपिं बम्बई वनाः बलिउडया गायकत नापलानाः उमित म्येँ हायेका। बम्बईलय् वय्कः म्येँ रेकर्ड यानादीगु इलय् दकलय् न्हापां अनुराधा पोडवालं 'पलख झीगु जिन्दगी' म्येँ हालेवं वय्कःयात स्वर्गय् थ्यं थें आनन्द वल ।

वय्कलं संगीत तयादीगु नं न्हापा स्वयां पाःगु खनेदु। वय्कलं न्हापा हार्मोनियमय् जक संगीत तयादीगु खःसा थौंकन्हय् वय्कलं हार्मोनियम व गितार निगुलिं छ्यलाः नं संगीत तयादी। नकतिनि हे वय्कःया संगीतय् नेवाः संकिपा 'बांलाः मय्जु' क्वचाःगु दु। थुकी वय्कःया संगीतय् न्हापा स्वयां हिउपाः वःगु खनेदु। वय्कलं संगीत तयादीगु इलय् गबलें न्यागू मिनेटं क्वचाःसा गबलें प्यन्हु न्यान्हु नं बिउ ।

वय्कलं छुं दँ न्ह्यवंनिसें शास्त्रीय संगीत नं स्यनाच्वनादीगु दु। अथे हे गितार, भोकल व कीबोर्ड नं स्यनाच्वनादीगु दु। धयादी, 'सयेकेगु ई गबलें पूवनी मखु। थःके ई दत्तले थःगु क्षेत्रय् वःगु हरेक न्हू खँयात सयेकां तुं च्वनेमाः ।'

थौंकन्हय् संगीतया क्षेत्रय् ज्या यानाः नं थः न्ह्याः वनेफु धइगु खँयात वय्कल प्रष्ट यानादीगु दु। वय्कलं न्हापा छपु म्येय् संगीत तयेत न्यासः तका कयादीगु खःसा थौंकन्हय् न्याद्वः कयादी। यदि थुकी एरेन्ज नं याये फत धाःसा झन बांलाइ। वय्कलं थम्हं संगीत तयाः थम्हं हे एरेन्ज यानाः मीना प्रजापतिया सलय् 'भिं याःसा भिंगु हे फल' बोलया म्येँ नं पिथनादी धुंकूगु दु ।

वय्कलं नेपालभाषाया संगीत ख्यलय् न्हून्हूगु पहः हयाः उकी अझ विकास याना वनेगु इच्छा दुगु खँ कनादी। वय्कःया म्येँ हायेकाः म्येचाः पिकायेगु इच्छा दु ।

संगीतया लागिं थःगु लजगाः तकं त्वःतादीम्ह वय्कलं थौंकन्हय् प्रगयित कम्युनिकेशन न्ह्याका च्वनादीगु दु। वय्कलं द स्टेजपाखें याःगु ज्याझ्वलय् द ट्यालेन्ट अवार्ड नं त्याकादी धुंकूगु दु। नेपालभाषाया संगीत ख्यलय् वय्कलं यक्व हे न्ह्यइपुगु व म्हाइपुगु घटना कःघानादी धुंकूगु दु। हरेक घटनानाप संघर्ष यायां वय्कः थौं नेपालभाषाया संगीत ख्यःया छम्ह ज्वः मदुम्ह व्यक्ति जुयादीगु दु ।

More Stories Like this