थौं नियुक्तया ज्या क्वचायेकीगु
प्रमुख सचिव उमेश मैनालीया राजीनामा
येँ (सन्ध्या टाइम्स)/थौं च्वनीगु मन्त्रिपरिषद्या बैठकं नेपालं थीथी देशय् नियुक्त यायेमानिपिं राजदूतत नियुक्त यायेगु ज्या क्वचायेकीगु खँ धाःगु दु ।
थौंया बैठकय् थीथी देशय् प्वनाच्वंपिं राजदूतत नियुक्ति यायेगु सम्बन्धय् परराष्ट्र मन्त्री सुजाता कोइरालां नां प्रस्ताव यानादीगु ग्वसाः दु। थौं सम्भवतः नेपाःया लागिं महत्वपूर्ण देय्त भारत, अमेरिका व बेलायतया राजदूत जुइपिनि नां क्वःछीफुगु खँ नं सूत्रं धाःगु दु ।
पूर्ववर्ती सरकारपाखें राजदूत पदया निंतिं फुक्क प्रक्रिया पूवंकाः नियुक्तिया तयारी यानातःपिं सुयातं राजदूत मदयेकीगु खँ धाःगु दु। उकी मध्यय् गुलिसिया नामय् विदेशपाखें एग्रिमो समेत वयेधुंकूगु खः ।
उखे पश्चिम नेपालय् न्यना वनाच्वंगु झाडाबान्ता नियन्त्रण यायेगु निंतिं स्वास्थ्य मन्त्रालयं प्रस्ताव याःगु विशेष राहत प्याकेजयात नं थौंया बैठकं अनुमोदन याइगु खँ सूत्रं धाःगु दु।
अथे हे सरकारं उकुन्हु तिनि बढुवा याःपिं सचिवतय् पदस्थापना यायेगु निर्णय नं थौंया बैठकं याइगु खँ सम्बन्धित सूत्रं धाःगु दु ।
बैठकं प्रहरी अधिकृततय् ३० वर्षे सेवा अवधि लागू याइगु खँ नं सूत्रं धाःगु दु। यदि ३० वर्षे सेवा अवधि लागू जुल धाःसा प्रहरी निकायया १४ गू उच्च अधिकृततय् पद खाली जुइ।
उखे सरकारं थःत राष्ट्रपतिया कार्यालयय् प्रमुख सचिवय् बढुवा याःसां उकिया बारे सरकारं स्पष्ट मयाः धासें प्रमुख सचिव उमेश मैनालीं थौं थःगु पदं राजीनामा बियादिल। थौं न्हिनय् प्रधानमन्त्री कार्यालयय् वय्कलं थःगु राजीनामा पौ दर्ता याना थकूगु खः ।
