बाह्य चक्रपथया विरोध छाय् ?

सरकारं दयेकेगु धकाः ताः तयातःगु बाह्य चक्रपथयात सतुंगः लागाया स्थानीय जनतां विरोध याःगु बुखँ पिहां वःगु दु। बाह्य चक्रपथ आयोजनां सतुंगलंनिसें हे थ्व ज्या न्ह्याकेगु धकाः ताः तयातःगु खः। थ्व चक्रपथया ६.५ किलोमिटर लँ सतुंगः लागाय् लाः। तर बाह्य चक्रपथ वयेसातकि स्थानीय मनूतय्गु छेँबुँ अतिक्रमित जुयाः अन च्वंपिं किसानतय्त भूमिहिन दयेका बी। जीवनजःछि बुँज्या याना वयाच्वंपिं किसानत बुँ मदयेसातकि रोजगारविहिन जुइ। उमिसं न्हूगु ज्या याये सइ मखु। मुआब्जा कथं सरकारं बिउगु दां नयेत्वने यायां हे फुइ। वयां लिपाया उमिगु जीवन नारकीय जुइ। सरकारं आः तक स्वनिगःया गुलि नं थासय् जग्गा अतिक्रमण यानाः विकास यात व फुकलीसं हे पिनेयापिं मनूतय्सं वयाः लबः काःगु बाहेक स्थानीय मनूतय् धाःसा विजोग हे जक जूगु दसु झीके दु। आः दयेकेगु धकाः चर्चाय् हयाच्वंगु बाह्य चक्रपथं नं स्वनिगःया अत्यधिक नेवाः किसानतय्त वहे हविगतय् लाकीगु निश्चित दु ।

उकिसनं दकलय् खतरनाक खँ ला छु धायेबलय् थ्व चक्रपथ वयेसातकि वया जःखः पिनेयापिं मनूत प्रशस्त मात्रां च्वं वइ। उमिसं उगु लागाया स्थानीय संस्कृति, रहनसहन व जीवनशैलीयात प्रभावित याइगु ला द हे दु उकिया नापनापं पूर्वाधारया कमीं यानाः लः, धः व पर्यावरणया नं उलि हे तःधंगु समस्या पिकया बी। अझ पिनेयापिं मनूतय् चाप अप्वयेकाः थनया स्थानीय नेवाःतय्त नेवाः भूमिइ हे अल्पमतय् लाका बीगु तःधंगु खतरा ला द हे दनि। उकिं बाह्य चक्रपथयात कम से कम नं नेवाःतय् ल्हातय् राज्य शक्ति लाः मवःतले शुरु यायेगु पाय्छि जुइ मखु ।

More Stories Like this