डाक्टरया कला

सुनिता मानन्धर

हरेक वस्तुइ थःगु हे विशेषता खंकादीम्ह व्यक्ति खः डा. सिद्धार्थ रंजित। वय्कः थनिं नीन्यादँ न्ह्यवंनिसें नेत्र अनुसन्धानया ज्याय् व्यस्त जुया च्वनादीगु दु झिंखुदँ न्ह्यवंनिसें त्रिपुरेश्वरया आँखा अस्पतालय् ज्या याना च्वनादीगु दु। थम्हं सयेकागु सीप न्ह्याथेंज्याःगु संघर्ष यायेमाःसां बांलाःगु थासय् छ्यलेमाः धइगु थः अबुया वाणी हे वय्कःया प्रेरणाया श्रोत खः ।

पेशां डाक्टर खःसां शोंख धाःसा वय्कःया थीथी वस्तुपाखें कलात्मक कृतित दयेकेगु खः। चिचीग्वःगु अप्पा, ल्वहं आदि थेंज्याःगु ज्वलं छ्यलाः छेँ, देगः, मनू आदि ब्वसाज्वलं दयेकेगु बिस्कं कला नं वय्कलं सःगु जुयाच्वन। छम्ह डाक्टरं दयेका तःगु अज्याःगु ज्वलं खनीबलय् न्ह्याम्हं अजूचाइ।
डाक्टर धकाः ल्वगियात वासः बीगु ज्या जक मयासे वय्कः समाजया ल्याय्म्ह व शिक्षित मनूतय्त थःगु क्षमता सितिं मछ्वसे समाजय् छ्यलेगु अभियानया छम्ह न्ह्यलुवाः नं जुयादीगु दु ।

कला ख्यलय् वय्कःया न्हापांगु पलाः ल्याण्डस्केपं शुरु जूगु खः। थौंकन्हय् 'मोडेल आर्ट' नं यानादी। धयादी, 'मिखा शिविर याः वनेगु थासय् दुगु अप्पा व ल्वहं मुना हयेगु अले उकियात हे छगू निश्चित आकारय् परिणत यायेगु।'
अप्पा व ल्वहंयात कुचा कुचा यानाः उकियात वय्कलं थःत माःगु आकार बी ताकि उकिं दयेकीगु कला वास्तविक थें खने दयेमा। वय्कःया कलां झीत वहे थासय् च्वंच्वनागु थें भान याका बी। नेवाः वस्ती, नेवाः लागा, नेवाः कलात्मक सम्पदा वय्कःया सिर्जनाया विषय खः। वय्कलं लाय्कू, तपोवन, शिवकुण्ड नापं प्राकृतिक सम्पदाया मोडलत थःगु कला कथं सिर्जना यानादीगु दु। उकी छ्यलातःगु सिमा, स्वां, हः, लः आदि स्वयेबलय् धाथेंयागु हे थें च्वनी। अज्याःगु छगू कृति तयार यायेत वय्कःयात खुलांनिसें दच्छि तकया ई माः।
वय्कःया ज्या यायेगु ई धइगु न्हिनय् विरामी जाँचे यायेगु क्वचायेकाः खः। अप्वः यानाः सुथसिया स्वताः इलंनिसें न्याताः ई तक व बहनी गुताः निसें झिंनिताः तक वय्कःया सिर्जनाया ज्या जुइ। न्यादँ न्ह्यः नेपाल आर्ट काउन्सिलय् वय्कःया न्हापांगु कला प्रदर्शनी जूगु खः। उगु इलय् छगूत्या लाखया कला नं बिक्री जुल। व ध्यबा वय्कलं थःगु हे युवा नेत्र सेवाया नामय् तयादिल। आः मेगु प्रदर्शनीया तयारीइ दी।
वय्कलं थःगु आज्जु बारे कनादी, 'भविष्यय् गुलि नं मिखाया ल्वगित थुगु संस्थाय् वइ, ध्यबा मदु धकाः अनं लिहां वने म्वाःलेमा। ध्यबा मदु धकाः सुं नं दृष्टिविहिन जुइ म्वाःलेमा।' वय्कलं दक्षिण भारतया मदुराइ अरविन्द अस्पताल व अष्ट्रेलिया युनिभर्सिटी अफ न्यूट साउथ वेल्थय् विशेष नेत्र अनुसन्धानया तालिम कयादीगु खः। वय्कलं दकलय् न्हापां सन् १९९० य् नेपालय् क्लिनिकय् कम्प्यूटरपाखें मिखा परीक्षण शुरु यानादीगु खः ।

इच्छा मयाःसा नये तकं थाकुइ। उकिं हरेक पल समाजया लागिं छुं यायेमाः धइगु वय्कःया बिचाः दु। शायद कला प्रतिभा दुम्ह जुयाः हे खइ, डाक्टरी पेशायात नं वय्कलं दां कमे यायेगु विषय तायेकामदी। धयादी, 'ल्वगियात गाहाकि तायेके मजिउ ।'

More Stories Like this