थ्व नं तानाशाही हे मखुला ?

जःथि बरे

राजतन्त्र लिपा गणतन्त्र जुल किं अतिकं हे सुख-शान्तिया अनुभव याये खनी धकाः आशा कयाच्वपिं जनतायात सुख-शान्तिया सः छगः हे काये मखंबलय् तसकं हे निराश जुयाः मिखाय् ख्वबि ततं हे लिमलात। जि जनताया काय मचा खः, जिं थः बुगु थासय् तसकं दुःख सियाः संघर्ष याना वयाम्ह,उकें सकल जनताया दुःख जिगु थःगु हे दुःख खः धाःम्ह गणतन्त्रया न्हापाम्ह राष्ट्रपति डा. रामवरण यादवया खँ आः वया गुलि तक पाय्छि जू धइगु क्यनाच्वन। न्हापा राजतन्त्र जुयाच्वंबलय् जुजु गनं पिहां वने माःसा घण्टौ न्ह्यःनिसें लँ पनाः जनतायात दुःख बियाः जनताया नयत्वने खं मखं छुं मतलब मदु। थः व थः परिवार दरवारय् च्वनाः मोजमस्ति याना जुल। उकें जुजुयात तानाशाही, जनताया दुःख कष्ट मथुम्ह थजाःम्ह मनूयात जुजु याना तःसा देय् ध्वगिकः स्यनाः गरिबि जनतात नयेत्वने मखंका सीका धयाः गणतन्त्र माग याना जनताया हे काय मचायात राष्ट्रपति दयेका देय्यात न्हूगु तरिकां न्ह्याकेमा धकाः थःथःगु ज्यान तक बिया उलिमछि मनुत शहिद जुया देशय् गणतन्त्र पलिस्था जुल। तर न्हूगु नियम कानून, तरिका छुं हे पलिस्था मजुल। गज्याःगु विडम्बना? नेतात खिचा ल्वाः थें ल्वानाच्वंगु दु। गरिब जनता नय् मखना प्वाः सुकू गंका सिनाच्वंगु दु। देशय् हत्या हिंसा, अपहरण झन झन अप्वःया च्वंगु दु। नेतातय् थः प्रधानमन्त्री, मन्त्री जुइ मखंनी धकाः ब्वाँय् ब्वाँय् जुजुं लिमलानाच्वंगु दु। थन यापिं नेतातय्त राजतन्त्र वांछ्वया गणतन्त्र हयेगु मखुसे जुजुयात लिकया थः हे जुजु जुयाः शासन चले यायेगु कुनियत दयेकाच्वंगु शंका यायेमाःथें च्वं! मखुसा थः जनताया काय मचा खः धाःम्ह राष्ट्रपति भाजुं थः गनं पिहां वनेबलय् छाय् माःसां म्वाःसां जनतायात हे दुःख बियाच्वंगु? घण्टौ न्ह्यः निसें थः लिहां थिहां जुइगु लँपुइ सवारी साधन फुक्कं पनाः मनू छम्ह हे मछ्वसे राष्ट्रपति भाजु छु यायेत्यंगु खः? अथेभनं गनं छकः पिहां वनेत ग्याःम्ह राष्ट्रपति जुइगु हे छाय्? कि मखुसा व वंथाय् तक आकास मार्ग जुयाः वंगु जूसा जिउगु खनी। वय्कःया निंतिं ला हेलिकोप्टर लँ च्वनाच्वंगु दु जुइमा, छाय् जनतातय्त दुःख बियाच्वंगु? लोकतान्त्रिक गणतन्त्र वयेधुंकाः राजतन्त्रया अवशेष तक हे ल्यंका तये मजिउ धाइपिं नेतातय्सं जुजुं यानाः वयाच्वंगु ज्यायात छाय् निरन्तरता बियाच्वंगु? यँया पुन्हि, भोटो क्यनेगु व मेमेगु सांस्कृतिक जात्रा पर्व धइगु न्हापा न्हापा पौराणिक बाखं कथं जुजुयात विशेष थाय् बियाः ब्वति कायेकातःगु जुइमाः। आः गणतन्त्रया ई खः। चुनावय् त्यानाः प्रधानमन्त्री, राष्ट्रपति जुयाः पौराणिक बाखं नापं छु स्वापू दु ?

राष्ट्र प्रमुख जुयाः ब्वति कायेत थ्व फुक्कं छु जुजु हे जुइ धकाः वःगु मखु ला? न्हापा जुजु राष्ट्र प्रमुख जुयाः ब्वति काःवइबलय् घण्टौ न्ह्यःनिसें लँ पनाः जनतायात गुलि दुःख बियाच्वंगु दु। थ्व खँ आः यापिं नेतातय्सं मसिउगु खः ला? थौं थः प्रधानमन्त्री, राष्ट्रपति जुल धायेवं हे थथे लँ पनाः दुःख बिमाःगु छाय्? नेपाःया धर्म संस्कृति, जात्रा पर्व माने यायेगु वा मयायेगु धइगु थःथःगु अधिकारया खँ खः। थज्याःगु अधिकार नेता, मन्त्री, प्रधानमन्त्री, उपराष्ट्रपति, राष्ट्रपतियात नं दु। थःपिं अज्याःगु जात्रा, पर्व, स्वयेत राष्ट्र प्रमुखया हैसियतं औपचारिक रुपं वयाः जनतायात दुःख बीगु व जनताया अधिकार हनन यायेगु वय्कःपिंत अधिकार मदु। वय्कःपिं अन वल धायेवं जात्रा झःझः धाइगु व बांलाइगु मखु। जात्रा बांलाइगु धइगु सकल जनताया सहभागिता व शान्ति दत कि खः। जनतायात शान्ति-सुरक्षा बी मफुपिंसं कमसेकम आतंकित ला यायेमते आवलिं वय्कःपिसं थः औपचारिक वा अनौपचारिक रुपं छु नं ज्याझ्वलय् ब्वति कयादीमाःसा जनतायात घण्टौ न्ह्यःनिसें लँ पनाः दुःख बिया मदित इनाप ।

More Stories Like this