वर्मायात नेपाःया समर्थन
समर्थन कायेत वर्मिज नेतात नेपालय्
येँ (सन्ध्या टाइम्स)/विश्वया गुगुं नं थासय् जुइगु प्रजातान्त्रिक आन्दोलनय् थःपिनि ग्वाहालि दइगु खँ पुलांम्ह प्रधानमन्त्री व कांग्रेस सभापति गिरिजाप्रसाद कोइरालां धयादीगु दु। बर्मा सोलिडारिटी ग्रुपया नेतातलिसे थःगु हे निवास महाराजगञ्जय् थौं नापलायेगु झ्वलय् वय्कलं उगु खँ धयादीगु खः। उगु इलय् वय्कलं प्रजातान्त्रिक आन्दोलन प्रति थःगु समर्थन दइगु खँ कनादिसें बर्माया आन्दोलनय् थःगु ऐक्यवद्धता नं प्वंकादीगु दु ।
वर्माय् जुयाच्वंगु प्रजातान्त्रिक आन्दोलनय् नेपाः सरकारया समर्थन कायेत वयाच्वंगु पुचलय् बर्मा स्वतन्त्र आन्दोलनया अभियन्ता टिन्ट स्वे, भारतीय नेतात सुरेन्द्र भदौरिया, प्रा. आनन्द कुमार लगायतया नेतात दुथ्याः ।
बर्माय् न्ह्यानाच्वंगु आन्दोलनयात समर्थन कायेत वय्कःपिं नेपाः वयाच्वंगु खः। वय्कःपिंत नापलायेगु झ्वलय् कोइरालां वर्माया आन्दोलन प्रति ऐक्यवद्धता प्वंकेत थम्हं सर्वदलीय संसदीय समिति गठन यायेगु आश्वासन नं बियादीगु दु।
बर्मा आन्दोलनया नेतात नापलायेगु झ्वलय् सभापति कोइरालां प्रेस स्वतन्त्रताया अग्रणी अमेरिका, प्रजातन्त्रया जननी बेलायत व दकलय् तःधंगु प्रजातान्त्रिक देय् भारतं चाहे जुल धाःसा बर्माया आन्दोलन सफल जुइगु दाबी नं यानादिल ।
वर्मा आन्दोलनयात समर्थन चूलाकेत सोलीडारिटी पुचःया दुजःत म्हिगः नेपाः थ्यंकः वःगु खः। पुचलं प्रधानमन्त्री माधव नेपाल, एमालेया अध्यक्ष झलनाथ खनाल, माओवादीया अध्यक्ष प्रचण्ड व थीथी मधेसवादी दलया नेतात नं नापलानाः वर्माय् जुयाच्वंगु प्रजातान्त्रिक आन्दोलनय् समर्थन चूलाकेगु कुतः याइगु खँ धाःगु दु।
