न्हूगु सुरक्षा नीति व पार्टीतय् नीति

देशय् शान्ति सुरक्षा कायम यायेत सरकारं हःगु विशेष सुरक्षा कार्यक्रम थुथाय् चर्चाय् वयाच्वंगु दु। न्हूम्ह गृह मन्त्रीं राजधानी येँदेय्यात सुरक्षित यायेगु लागिं सुरक्षाकर्मीतय् ल्याः थपे यायेगु, अपराधीयात कारवाही यायेगु, सूचनाया अझ तःधंगु सञ्जाल दयेकेगु आदि थीथी ग्वसाः दयेकाः न्ह्यःने हःगु दु। गृह मन्त्रीया ग्वसाःयात भ्वँतय् निबन्ध थें ब्वनेबलय् थ्व तसकं बांलाः जू। कुंखिनेथाय् मदु। तर मू न्ह्यसः धाःसा वहे खः, थ्व सुरक्षा कार्यक्रम लागू खुन्हु जुइ ला
?

नेपालय् थौंकन्हय् अशान्ति व असुरक्षा अप्वया वनाच्वंगु केवल अपराधी जक अप्वःगुलिं मखु। थुकिया न्हापांगु श्रय राजनीति व राजनीतिक पार्टीतय्त हे वनी। बिचार व कार्यक्रमया लिधंसाय् चुनाव त्याकेगु औकात मदया वंलिसे राजनीतिक पार्टीतय्सं गुण्डा व थीथी आपराधिक ज्या याइपिं संगठित अपराधीतय्त समेत छ्यलेगु यानाच्वंगु दु। थज्याःपिंत छ्यलाः पार्टीतय्सं चुनाव ला त्याकी, अले चुनाव धुंकाः उमिसं न्ह्यागु हे तःधंगु अपराध याःसां उमित संरक्षण बीत राजनीतिक पार्टीत हे बाध्य जुइ। गुलिखे संगठित अपराध याइगु पुचःया डनतय्सं खुल्ला रुपं हे थःपिंत फलाना पार्टीया कार्यकर्ता धकाः म्हसीका बीगु यानाच्वंगु दु। सुं डनयात गनं ज्वन धाःसा वयात त्वःति वा बांलाक ति धकाः दकलय् न्हापांगु फोन पार्टी नेतापाखें वइ। राजनीतिक पार्टीतय्सं थःगु पार्टीया अपराधीतय्त थुकथं
संरक्षण बीगु चलन ल्यनाच्वंत्तले गृह मन्त्रीं न्ह्याक्व हे बांलाःगु सुरक्षा नीति हःसां व छगू उत्कृष्ट साहित्यिक निबन्ध स्वयां अप्वः छुं मजुइगु खँय् शंका मयाःसां जिउ ।

More Stories Like this