देशभक्त नेतां जक समस्या समाधान याइ

डी. आ. खड्गे

जब देशय् सकारात्मक, सक्षम, विवेकी नेताया ल्हातय् सत्ता संचालनया अवसर वइ, व व्यक्तिपाखें नकारात्मक व्यक्तियात दमन यानाः देय्या समग्र विकास यानाः जनतायात लय्तायेकी। देशभक्तया भावना व विवेक विदेशीमूलया नागरिकयाके दइ मखु। विदेशी मूलया नागरिकयाके खालि चलाकी व धूर्त नीति जक दइ। उमिग छगू जक लक्ष्य दइ, व खः न्ह्याग्गु कुकर्म यानाः नं ध्यबा कमे यायेगु। झीगु स्वनिगलय् विदेशी मूलया नागरिकत वयाः राजनीतिया नामय् सम्पत्ति लुटे यानाच्वन। अझ लुटे यायेगु क्रम अप्वया वनाच्वंगु दु। राजनीति यानाः जक मखु व्यापारया नामं नं अनेक कथं हठकण्डा यानाः जनताया ध्यबा लुटे यानाच्वंगु दु। खालि विदेशी मूलया नागरिक जक व्यक्तिवादी व स्वार्थी मखु पिनें वयाच्वंपिं खस, ब्रम्हूतय्के नं उलि हे स्वार्थ लालच दु। अझ ला खस ब्रम्हूत देय्या व्यवस्थापिका, कार्यपालिका व न्यायपालिका स्वंगुलिं अंग थःगु ल्हातय् लाकेत सफल जुयाच्वंगु दु। राज्य शक्ति छगू जातिं जक कब्जा यानाच्वंगुलि देशय् ततःधंगु काण्ड जुयाच्वन। ततःधंगु काण्ड छुं न्हि तक चर्चा जुइ, लिपा फासांफुसुं जुया वनी। विश्वया यक्व देशय् भ्रष्टाचार मजूगु मखु तर भ्रष्टाचार याःम्ह न्ह्याम्ह हे जूसां वयात कारवाही याइ। झीगु देशय् धाःसा भ्रष्टाचारी नेतातय्सं हे कमिशन व भ्रष्टाचार यानाः देशघातक ज्या यानाच्वनी ।

वंगु छुं न्हि न्ह्यः देय्या उच्चतहया छम्ह अधिकारी नेपाल राष्ट्र बैंकया गभर्नर विजयनाथ भट्टराईनं भ्रष्टाचार याःगु दु धकाः अख्तियारं प्रमाणित यात। तर न्यायपालिकां सफाइ बिल। थ्व मुद्दां छु क्यनाच्वंगु दु धाःसां खस ब्रम्हूयात कानूनं थी फइ मखु ।

स्वनिगःवासीं सिउसां मसिउ पहः यानाच्वंगु खः अथवा भ्रमय् लानाच्वंगु खः। साधारण जनतां सिउ, झीगु थासय् पिनंे वःपिं व्यक्तिं भिं याइ मखु। स्वनिगःयात सभ्य सुन्दरया अवस्थाय् स्वनिगःवासी व अबलय्यापिं जुजुपिं मिले जुयाः दयेकेधंुकल। इतिहासं थ्व नं क्यनाच्वंगु दु। झीगु बांलाःगु स्वनिगःयात पिनें वयाच्वंपिं गैर नेवाःतय्सं स्यंका वनेधुंकूगु खः। आः नं पिनेयापिं गैर नेवाःतय्सं स्वनिगःयात स्यंकाच्वंगु दु धयागु खँ मसिउगु मखु। थ्व नं सत्य खः सुं जातिया ल्हातय् सत्ता वयाच्वनी व जातिं खालि थःगु जातिया जक कल्याण व उन्नतिइ अप्वः ध्यान बियाच्वनी। मेमेगु जातिया कल्याण व उन्नतिइ उलि ध्यान बी मखु। मेगु जातियात झंगः लानाः शोषण, दमन व पक्षपात यानाच्वनी। यदि सकली प्रजातन्त्र व सकली कम्युनिष्टया ल्हातय् शासन वल धाःसा जातिवाद संघीयवादया भाषण बियाः जनतायात झंगः लायेगु ज्या याइ मखु। सकली प्रजातन्त्र वल धाःसा सम्पूर्ण लोककल्याण न्यायपूर्ण व स्वतन्त्रताया लागिं पार्टीइ लगे जुयाच्वनी। सकली कम्युनिष्ट नेताया ल्हातय् सत्ता वल धाःसा वर्गीय संघर्ष धकाः मध्यम व निम्न मध्यम वर्गया हितया लागिं पार्टी नीति दयेकाः ज्या यानाच्वनी ।

झीगु देशय् न सकली प्रजातन्त्र वल न सकली कम्युनिष्टं हे शासन चले यानाच्वन। आःया शासक वर्ग कांग्रेस व कम्युनिष्ट शासनया नामं जनतायात भ्रमय् तयाः जनतायात हे अति शोषण यानाच्वंपिं शोषक वर्ग ख। नेपाःया राज्य व्यवस्थाय् खस ब्रम्हू व भारतीय मूलया मधेशीया हालीमुहाली जुयाच्वंगु दु। थ्व निथ्वः जातिं न्हून्हूगु राजनीतिक नारा हयाः थथे याये अथे याये धकाः जनतायात झंगः लानाच्वन। सत्ताधारी नेतातय्गु थौंकन्हय्या नाटक खः बजाः भाः नियन्त्रण यायेगु धकाः राष्ट्रिय योजना आयोगया उपाध्यक्ष डा. युवराज खतिवडाया नेतृत्वय् छगू टोली गठन याःगु दु। थ्व टोलीं बजाःभाः नियन्त्रण ला याये फइ मखु तर सरकारी धुकूया ध्यबा धाःसा यक्व झ्वाम्म यायेत सफल जुइ। हाकुबन्जाःतय्सं चांचां बजाःभाः थकयाः जनतायात आतंकित यानाच्वनं नं सरकार मौन जुयाच्वंगु कारणं जनता सरकार खनाः मि जुयाच्वंगु दु। जनता सरकारया पहः खना मि जुयाच्वंगु कारणं यानाः वंगु श्रावण १० गते शनिवाः कुन्हु कुलेश्वर, कोटेश्वर व कालिमाटी लागाय् मारवाडीं सुचुका तःगु गोदामय् छापा मारे यानाः छगू नाटक क्यन। करिब ११ गू गोदामय् छापा मारे यानाः अनुसन्धान न्ह्याकाच्वनागु दु धकाः पिने जनतायात धाल। जनतां थ्व खँ नं सिउ कि मारवाडीतय्सं नेतातय्त जक कमिशन बियाच्वंगु मखु उपभोक्ता संघतय्त नं कमिशन बियाः थः यःयःथे भाः थकयाच्वंगु दु। उपिं थः यत्थे भाः थकायेत मग्याःगु कारण हे थुकिं यानाः खः ।

न्ह्याथें जाःम्ह तानाशाही शासकं नं जनतायात माःगु दैनिक उपभोग्य वस्तु संकटया अवस्थाय् नं व्यवस्था यायेत स्वयाच्वनी। थुलि जक मखु बजाःभाः नं नियन्त्रण यानाः जनतायात राहत बीगु स्वयाच्वनी। तानाशाहं देय् विकास मयाःसां देय्यात घात जुइगु ज्या नं मयाः। आः झीसं बिचाः यायेमाः, आःया नेतात ठिक लाकि तानाशाही ठिक? आःया नेतात लोकतन्त्र धाधां विदेशी तन्त्रवादी जुया वनाच्वन। विदेशीया इशाराय् प्याखं हुयाच्वंगुलिं ला देय्या अवस्था स्यना वनाच्वंगु खः। नेतात धनी जुयाच्वंगु कारण नं देय्या अखण्डता व अस्तित्व धरापय् लाकेगु ज्या यानाः थःगु छेँय् डलर व भारुया वा गायेकेगु ज्या जुयाच्वंगुलिं खः। तानाशाही शासकं जनतायात शोषण याःसां देय्या भूमि हे मियाः सत्ताय् च्वनेगु कुतः गबलें नं मयाः। बहुदलवादी खस ब्रम्हू व मधेसीतय्सं प्राकृतिक श्रोत जक बियां मगानाः देय्या भूमि तकं विदेशीयात बियाच्वन। अझ थुलि यानां नं मगानाः विदेशी मूलया मारवाडी व्यापारीतय्त थः यत्थे बजाःभाः थकायेकाः जनतायात सास्ती बीकेगु ज्या यायेत स्वयाच्वन। नेतातय्गु थज्याःगु विदेशीभक्त चरित्रं बजाःभाः नियन्त्रण याइ धकाः म्हगसय् नं खंकेम्वाः। यदि देय्या फुक्क समस्या समाधान यायेगु खःसा सक्षम, विवेकी व देशभक्त नेतृत्वयात हे न्ह्यःने हयेमाः ।

More Stories Like this