चैन लाकौल त्याकाः दंग श्रीती
सुनिता मानन्धर
मय्जु श्रीती शाक्य थुगुसीया चैन लाकौल सिरपाः त्याकेत ताःलाःगु दु ।
थुगुसी बिउगु थ्व १८ क्वःगु चैन लाकौल सिरपाः खःसा वय्कलं त्याकादीगु धाःसा निगूगु सिरपाः खः। थ्व स्वयां न्ह्यः वय्कलं च्वखँ धेंधेंबल्लाखय् नं लिउ लाकाः सिरपाः त्याकादीगु खः। चैन लाकौल सिरपाः नेपालभाषा विषयय् एमए तगिमय् दकलय् अप्वः ल्याः हयाः पास याःम्ह छात्रायात बीगु खः ।
थः नेपालभाषा विषयपाखे आकर्षित जुयागु बारे वय्कलं धयादी, 'जिमि ततां नेपालभाषा विषय कयाः ब्वंगु खः। ततां जितः नं नेपालभाषा कयाः ब्वंसा बांलाः धायेवं जिं नं आइ.ए.लय् नेपालभाषा कया ।'
नेवाः जुइवं नेवाः समाजया भाषा, संस्कृति बारे दक्व खँ सियाच्वनी मखु। गुलि अध्ययन यात उलि यक्व सीके फइ। उकिं वय्कलं बागबजाःया पद्मकन्या क्याम्पसय् नेपालभाषा कयाः आईए शुरु यानादिल। अबलय्निसें हे वय्कलं नेपालभाषाय् बांलाक ल्याः नं हयादीगु दु ।
नेपालभाषा कयाः एमए यायेत्यनागु खँ पासापिंत कंबलय् सकस्यां नेपालभाषा ब्वने थाकु मजू ला धकाः न्ह्यसः छूगु जुयाच्वन। वय्कलं धयादी, 'नेपालभाषा ब्वनेगु धायेवं दक्व हे नेपाल लिपिं च्वये ब्वने यायेमाःगु धकाः तायेकीगु जुयाच्वन। वास्तवय् अथे मखु। नेपालभाषा ला ब्वनेगु माध्यम जक खः। थुकी दुने बृहत् विषय दुथ्यानाच्वंगु दु। गथेकि पाश्चात्य, पूर्वीय समालोचना, भाषा विज्ञान नापं नेवाः संस्कृति, साहित्य आदि ।'
थम्हं नेपालभाषा ब्वनागुया छुं हे बेफाइदा मदु धासें वय्कलं कनादी, 'ब्वनेगु धयागु ज्ञान आर्जन यायेत खः। नेपालभाषा ब्वनाः जक ज्ञान आर्जन याये फइ मखु धइगु जुइ मखु।'
येँ मनपाया वडा २३ ओमबाहाः त्वालय् च्वनादीम्ह वय्कः च्यादँ न्ह्यवंनिसें ग्रीन पिस एकेडमिइ शिक्षक कथं ज्या यानाच्वनादीगु दु। वय्कःया एमएया विषय नेपालभाषा खःसां अंग्रेजी ब्वंके थाकु मजूगु वय्कःया अनुभव दु। धयादी, 'भाषा धइगु खँल्हाबल्हा यायेगु माध्यम खः। थम्हं थुल कि न्ह्यागु भाषां ब्वंके फइ ।'
एमए क्वचाल। आः थनं लिपा नेपालभाषा ख्यलय् थम्हं फुगु थीथी ज्या याना वनेगु योजना वय्कःया दु ।
वय्कःयात थुगुसी चैन लाकौल सिरपाः कथं झिद्वः तका व दसिपौ लःल्हाःगु खः। थुगु सिरपाः नापं वय्कःयात कुमारी प्रकाशनपाखें कुमारी पदक नं लःल्हाःगु खः। ने.सं. ११०१ निसें न्ह्याःगु चैन लाकौल सिरपाःया संस्थापक बैकुण्ठप्रसाद लाकौल खः। भाजु लाकौल मदयेधुंकाः वय्कःया छेँजःपिंसं थुकियात निरन्तरता बिया च्वनादीगु दु ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
