ह्यापी फ्रेन्डशीप डे!

- 'ह्यापी फ्रेन्डशीप डे!'
- 'सुभाय् । छन्त नं ह्यापी ह्यापी फ्रेन्डशीप डे!'

थ्व धापू छिं नं छि पासापिंत धया च्वनादीगु जुइमाः । अले छी पासापिंसं नं थथे हे याना छितः भिंतुनाः बियाच्वंगु जुइमाः । खः, थौं थ्वहे भिंतुनाः कालबिल यायेगु न्हि खः अर्थात ईश्वी संवतया अगस्त महिनाया न्हापांगु आइतवाः - अन्तर्राष्ट्रिय फ्रेन्डशीप डे ।

झीगु जीवनय् दकलय् महत्वपूर्ण मनूत धइगु हे झीगु छेँजः, थःथीति व झी पासापिं हे खः । थ्वहे महत्वपूर्ण मनूत मध्ये पासापिनि निंतिं धकाः फ्यानातःगु न्हि खः - अन्तर्राष्ट्रिय फ्रेन्डशीप डे ।

थौं नेपाः नापं हनिमय् न्यंक पासाभाइपिंत थःगु आत्मियता क्यनाः थुगु दिं न्याय्का च्वंगु दु । थः पासापिंत पासाया कथं झीगू संसारयात अझ चकंका ब्यूगुलिं सुभाय् बियाः, भिं उसाँय कामना यानाः, भिंतुना कालबिल यानाः न्ययेकीगु न्हि खः, थौं ।

फ्रेन्डशीप डे हलिमय् दकलय् न्हापां संयुक्त राज्य अमेरिकां शुरु जूगु खः । सन् १९३५ स अमेरिकी सरकारं अगस्त महिनाया न्हापांगु शनिवाः कुन्हु छम्हेसित स्याःगु जुयाच्वन । अले उकीया कन्हय् कुन्हु अर्थात आइतवाः कुन्हु अमेरिकी सरकारं स्याम्ह वः मनूया पासां न्ह्यतः कुन्हु थः पासायात स्याःगु लुमन्ति आत्महत्या यात । थ्व घटना लिपाः अमेरिकी सरकारं अगस्त महिनाया न्हापांगु आइतवाःयात फ्रेन्डशीप डे कथं न्ह्याकेगु घोषणा यात ।

अमेरिकां सुरु जूगु थ्व पासापिंत थःगु आत्मियता क्यनेगु न्हि बुलंहु अमेरिका पिने नं यक्व मनूतय्सं न्याकेगु सुरु यात । थौं तकया दुने हनिमय्या आपलं थासय् थुगु न्हियात पासाभाइ दथुइया अतिकं महत्वपूर्ण न्हि कथं कयाः हनेगु यानाच्वंगु दु ।

पश्चिमि संस्कृति जूसां थौं थुगु न्हि नेपाःलय् नं थीथी ज्याझ्वः तकं यानाः न्याकीगु शुरु जुइधुंकूगु दु । विशेष यानाः ल्याम्ह पुस्तां अतिकं महत्व कथं कायेगु यानाच्वंगु थुगु न्हि थः पासापिंत भिंतुनाः नापं कार्ड, स्वां, चकलेट आदि उपहार नं बीगु चलन दु । नापं थ्वहे न्हि कुन्हु विशेष महत्व कथं फ्रेन्डशीप ब्याण्ड (नाडी चीगु छगू कथंया बाला) पासापिंत बीगु चलन दु ।

छिं नं थः पासापिन्त भिंतुना मबियानिगु जूसा थौंया दिं त्वः मफिइक भिंतुना बियादिसँ अले धयादिसँ - ह्यापी फ्रेन्डशीप डे !

More Stories Like this