चलखं ल्हानाः गुम्ह सित

स्यांजाय् छखा हे छेँया न्याम्ह नेवाः मंत

येँ (सन्ध्या टाइम्स)/देय्न्यंकं थीथी थासय् वःगु चलखं ल्हानाः वंगु चान्हय् जक गुम्ह मनू सीगु दुसा मेपिं छुं घाःपाः जूगु दु ।

स्यांजाया चित्रे भन्ज्याङ गाविसया वडा नम्बर ५ य् च्वंगु माथिल्लो हटियाय् वःगु चलखं ल्हानाः छगू हे परिवारया न्याम्ह दुजः सीगु दुसा प्यम्ह घाःपाः जूगु दु। चलःया कारणं उगु गाविसया ३० खा छेँय् च्वंपिं मनूत विस्थापित जूगु दु।
चलखय् लानाः ७० दँ दुम्ह टिकामाया मानन्धर, वया छय् मिलन मानन्धर, उगु हे परिवारया ८४ दँ दुम्ह तिलनारायण मानन्धर, ७० दँया भुवानी मानन्धर व ३२ दँया जौमाया मानन्धरपिं सीगु खः ।

चलखय् लानाः टिकामाया मानन्धरया निम्ह व तिलनारायण मानन्धरया निम्ह छेँजःपिं घाःपाः जूगु दु ।

वंगु छुं न्हि न्ह्यवंनिसें निरन्तर वयाच्वंगु वां यानाः टिकामाया मानन्धर व तिलनारायण मानन्धरया छेँ चुइकूगु खः ।

अनया स्थिति सीकेत प्रहरी थौं सुथय् उखेपाखे वनेधुंकूगु दु ।
अथे हे स्वन्हु न्ह्यवंनिसें लगातार वयाच्वंगु वां तनहुँया किहँ गाविस १ कोटडाँडाय् वंगु चलखं ल्हानाः छखा हे छेँया स्वम्हेसिया ज्यान वंगु दु ।

चलखं ल्हानाः सुइदँया बबिता रसाइली व वया च्यादँ व खुदँ दुपिं निम्ह म्ह्याय्पिं आरती रसाइली व अमृता रसाइली घटनास्थलय् तुं मदुगु प्रहरीं धाःगु दु ।

घटनास्थल सदरमुकामं तापाक ल्यनाच्वंगुलिं क्षतिया पूर्ण विवरण धाःसा मवःनि ।

अथे हे दैलेखया रानिवनस्थित काभ्रे खोलाय् वंगु चलखं ल्हानाः गोपाल शाही सीगु दु ।

उखे मदिक्क वःगु वां खुसिबाः वयाः चितवनया सौराहाय् च्वंगु च्यागू स्वयां अप्वः होटल डुबे जूगु दु। वंगु चान्हय् २ बजे राप्ति खुसिइ लःया बहाव तच्वयेवं अनया टाइगर क्याम्प, जंगल पप, सनसेट भ्यू रिसोर्ट, होली लज रिभर भ्यू जंगल रिसोर्ट लगायतया होटेलत डुबानय् लाःगु खः ।

खुसिबालं खुसि सिथय् दयेका तःगु छुं छुं रेष्टुरेन्ट नं चुइका यंकूगु दु ।

खुसिबाः वये स्वयां न्ह्यः हे अन दुगु सामानत सुरक्षित थासय् ल्ह्ययेगु ज्या जूगुलिं म्हो जक क्षति जूगु खँ पर्यटन व्यवसायीतय्सं धाःगु दु ।