अन्ततः माओवादी नं बहुपदीय प्रणालीइ

अन्ततः एनेकपा (माओवादी) नं पुलांगु ढाँचाया संरचनायात त्वःताः बहुपदीय प्रणालीइ प्रवेश जूगु दु। छुं कार्यकर्तातय् विरोधया वावजूद नं माओवादीं थःगु पार्टीयात बहुपदीय प्रणालीइ यंकेगु निर्णय याःगु खः। थ्व स्वयां न्ह्यः नेकपा (एमालें) नं थःगु पार्टीयात बहुपदीय प्रणालीइ यंकूगु खः। आः माओवादीं नं देशय् वःगु न्हूगु परिवेश व न्हूगु सन्दर्भयात ध्यानय् तयाः थःगु पार्टीयात बहुपदीय प्रणालीइ यंकूगु दु।
माओवादीइ आः तक अध्यक्षं छु निर्णय यात वहे मुक्कं पार्टीया निर्णय जुइगु जुयाच्वंगु खः। ताःई तक भूमिगत जुयाच्वंगु व उकिसनं जनयुद्ध संचालन यायेमाःगु पार्टी जूगु ल्याखं थुकिया संरचना अथे जुइगु स्वाभाविक नं खः। तर आः ई व माओवादीया पोजिशन हिलेधुंकल। थज्याःगु अवस्थाय् माओवादीं थःगु पार्टीया ढाँचा हिलेमाःगु आवश्यक नं जुइ। उकियात हे ध्यानय् तयाः थ्व निर्णय याःगु जुइमाः। तर न्हूगु संरचनाय् वनेसातकि उकिं ज्या या हे याइ धकाः दावी यायेगु धाःसा पाय्छि मजुइफु। गथे कि एमालें नं बहुपदीय संरचनाय् वनेसातकि अन दुने अध्यक्षया अधिकार गुलि, उपाध्यक्षया अधिकार गुलि, महासचिवया अधिकार गुलि धइगु खँय् विवाद पिहां वःगु खः। अज्याःगु विवाद माओवादीइ पिहां मवये माल। यक्व पद दयाः अधिकार क्षेत्र स्पष्ट मजुल धाःसा फुक्क हे पदया नेतातय्सं अधिकार लाकालुकु यायेत स्वइ। थुकियात शुरुइ हे व्यवस्थित याये मफुत धाःसा लिपा वनाः थ्व छगू प्रवृत्ति हे जुइगु नं खतरा दु। देशय् वःगु लोकतान्त्रिक सन्दर्भय् मंकाः नेतृत्वय् पार्टी न्ह्याकेगु ज्यां सकसितं सम्मान व सकसितं अधिकार दइगु ग्यारेन्टी याये फइ ।

More Stories Like this